CHILONGESA 14
Kwitava Chetu Nachivwisa Ngachilihi Kalunga Kuwaha?
Muchilongesa chinafumuho, twashimutwilanga ngwetu, Kalunga ketavila kala kwitavako. Chipwe ngocho, tunahase kulemesa Tengi yetu mujila yize nayimwivwisa kuwaha. Uno “kulemesa [chipwe kwitava]” muka chize cheji kwivwisanga Kalunga kuwaha? (WaYakova 1:27, kwinyikila chamwishi) Tala vyuma yanangula Mbimbiliya.
1. Uno kwitava chetu chatela kuzama haka?
Kwitava chetu chatela kuzama haMbimbiliya. Yesu ahanjikile kuli Kalunga ngwenyi: “Mazu ove apwa muchano.” (Yowano 17:17) Mauka amwe akwitava kawakavangiza muchano wamuMbimbiliya yize yapwa Mazu aKalunga ahwimako. Oloze eji kukavangizanga vyuma vanangula vatu navisemwa vyavo. Yehova ahunga vaze veji “kuleununanga jishimbi jaKalunga.” (Tanga Mako 7:9.) Oloze tunahase kwivwisa Kalunga kuwaha nge kwitava chetu nachizama haMbimbiliya nakukavangiza jishimbi jatwamamo.
2. Uno twatela kulemesanga ngachilihi Yehova?
Yehova uze apwa Tengi yetu, asaka tumulemesenga namuchima wetu wosena. (Kusoloka 4:11) Echi chalumbununa nge twatela kumuzanga nakumulemesanga kaha ikiye chakuzeneka kuzachisa tuponya chipwe vyuma vyeka.—Tanga Isaya 42:8.
Kwitava chetu chatela kupwa ‘chajila, chakwitavila’ kuli Yehova. (Wavaka-Loma 12:1) Echi chalumbununa nge twatela kukavangizanga jishimbi jenyi mukuyoya chetu chosena. Chakutalilaho, vaze vazanga Yehova vazanga nawa jishimbi jenyi jize jahanjika haulo nakujikavangizanga. Kaha nawa veji kulihendanga kukunwa makanya, nakukuzachisa maundu mujila yayipi, nakukunwa chikuma wala nakuvilinga vyeka vyavipi. a
3. Mwomwo ika twatela kulemesela Yehova hamwe navakwetu vaka-kwitava?
Kukunguluka tweji kupwanga nacho chalumingo hichalumingo, cheji kutukafwanga ‘twalise Yehova muchikungulwilo.’ (Samu 111:1, 2) Jila yimwe tweji kumwalishilangamo shina kumwimbila myaso. (Tanga Samu 104:33.) Yehova asaka tupwenganga kukukunguluka mwomwo atuzanga, kaha nawa atachikiza ngwenyi nachitukafwa tukalivwise kuwaha kuyoya haya myaka. Omu tweji kupwanga kukukunguluka tweji kulikolezezanga navakwetu.
LINANGULE VYAKUJIMINYINA
Wana ovyo Yehova akanyina kumulemesa kuzachisa tuponya. Wana jijila jajilemu jakwalishilamo Kalunga.
4. Katwatela kuzachisanga tuponya hakulemesa Kalungako
Twatachikiza ngachilihi ngwetu Kalunga ahunga kumulemesa kuzachisa tuponya? Talenu VINDIYO, nakushimutwila hachihula chino:
-
Chuma muka chasolokele omu vatu jaKalunga vakushikulu vamulemesele kuzachisa kaponya?
Vatu vamwe veji kuzachisanga tuponya hakulemesa Kalunga mwomwo yakushinganyeka ngwavo nachilingisa apwenga hakamwihi navakiko. Oloze kulinga ngocho kachalingisa Yehova apandame kuli vakikoko. Tangenu Kulovoka 20:4-6 naSamu 106:35, 36, kufumaho shimutwilenu havihula vino:
-
Tuponya muka chipwe vyuma vyeka muka vize wamonaho lyehi vatu vali nakuzachisa hakulemesa Kalunga?
-
Uno Yehova eji kwivwanga ngachilihi hakumona vatu vali nakumulemesa kuzachisa tuponya?
-
Nyi ove weji kwivwanga ngachilihi?
5. Kulemesa kaha Yehova chatusokola kuvishinganyeka vyakuhenga
Tala omwo kulemesa Yehova mujila yize etavila chatusokola kuvishinganyeka vyakuhenga. Talenu VINDIYO.
Tangenu Samu 91:14, nakushimutwila hachihula chino:
-
Vyuma muka atushika Yehova kutulingila nge natumulemesanga kaha ikiye mangana tusolole ngwetu twamuzanga?
6. Tweji kulemesanga Kalunga kukukunguluka chachikungulwilo
Tweji kwalisanga Yehova nakulitunga navakwetu hakwimba myaso nahakukumbululangaho nge tuli nakukunguluka. Tangenu Samu 22:22, nakushimutwila havihula vino:
-
Kutala weji kwivwanga kuwaha hakwivwa vyuma veji kukumbululanga vakwenu hakukunguluka tahi?
-
Kutala nayove uli nakusaka kuhitulukila chimweza mangana ukakumbululeho tahi?
7. Yehova mwawahilila nge natulwezangako vakwetu vyuma tunalinangula
Kuli jijila jajivulu jakulwezelamo vakwetu muchano wamuMbimbiliya. Tangenu Samu 9:1 na 34:1, nakushimutwila hachihula chino:
-
Chuma muka unalinangula muMbimbiliya chize uli nakusaka kulwezako vakwenu?
VATU VAMWE NGWAVO: “Mutu keshi kuhasa kwivwisa Kalunga kuwahako.”
-
Nyi ove washinganyeka muka?
CHISHINA UNALINANGULA
Tweji kwivwisanga Tengi kuwaha hakumulemesa ikiye kaha, nakumwalisanga kukukunguluka, nahakulwezangako vakwetu vyuma tunalinangula.
Kuhituluka
-
Chuma muka nachitukafwa tutachikize jila yamwaza yakulemeselamo Kalunga?
-
Mwomwo ika twatela kulemesanga kaha Yehova?
-
Mwomwo ika twatela kulemeselanga Kalunga hamwe navaze vasaka kumwivwisa kuwaha?
WANA VYAVIVULU
Tanga chihande chakwamba ngwavo “Kangweshi Kulemesa Cheka Makombeloko,” mangana uwane vyuma vyalingishile pwevo umwe echenga kulemesa tuponya.
Mbimbiliya Yeji Kwalumunanga Kuyoya chaVatu (Kaposhi Kakutalila, October 1, 2011)
Wana vyuma navikukafwa ukumbululengaho hakukunguluka.
“Alisenunga Yehova Mukachi kaChikungulwilo” (Kaposhi Kakutalila, January 2019)
Wana vyuma alivwishile kuwaha mukweze walunga umwe hakupwanga kukukunguluka numba tuhu chapwilenga chachikalu kupwako.
Vatu vavavulu vafwelela ngwavo kulusu veji kuyizachisanga mukwitava chavaka-Kulishitu. Kutala twatela kuyizachisanga hakulemesa Kalunga tahi?
a Vihande kana natukavishimutwila muvilongesa vili kulutwe.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
