CHILONGESA 15
Uno Yesu Apwa Iya?
Yesu aya fuma chikuma ngana mwavatu vamwe mukaye. Numba tuhu vatu vavavulu vatachikiza lijina lyenyi, oloze kavatachikiza vyavivulu hali ikiyeko. Vavavulu nawa vamutachikiza mujijila jakulisezaseza. Uno Mbimbiliya yahanjika vyuma muka hali Yesu?
1. Uno Yesu apwa iya?
Yesu apwa mutu wangolo wakushipilitu uze atwama mwilu. Vamutengele kuli Yehova Kalunga shimbu kanda vatenge vyuma vyeka vyosena. Echi chikiko vamuvulukila ngwavo “twatwa kuvyuma vyakutenga vyosena.” (Wavaka-Kolose 1:15) Mbimbiliya ngwayo Yesu apwa mwanaKalunga. Apwa “Mwanenyi umwe kaha wakulipwila” mwomwo ikiye kaha vatengele kuli ivene Yehova. (Yowano 3:16) Yesu azachililenga hamwe naIse Yehova hakumukafwa kutenga vyuma vyosena. (Tanga Vishimo 8:30.) Yesu achili lika nakulivwisa kuwaha usoko wamwaza naYehova. Apwa “Lizu” mwomwo apwa muka-kuhanjikilako Kalunga, hakwambulula mujimbu waKalunga najishimbi jenyi.—Yowano 1:14.
2. Mwomwo ika Yesu ejililile hano hamavu?
Kafwe myaka 2,000 kunyima, Yehova azachishile shipilitu yenyi yajila mujila yakukomwesa hakunungulula kuyoya chaYesu kufuma mwilu nakuchihaka mujimo lyaMaliya, uze apwile kanda achilisavaleho nalunga. Ngocho, omu Yesu asemukile apwile jino mutu wanyama namanyinga. (Tanga Luka 1:34, 35.) Yesu ejile hano hamavu mangana apwenga Meshiya, chipwe ngwetu Kulishitu, nakulwila nawa vatu. a Upolofweto wosena wamuMbimbiliya uze wahanjikile hali Meshiya, auteselemo. Echi chakafwile vatu vatachikize ngwavo Yesu ikiye “Kulishitu, MwanaKalunga ou ayoya.”—Mateu 16:16.
3. Uno Yesu ali kulihi oholyapwa?
Omu Yesu afwile, Kalunga amusangwile kupwa mutu wakushipilitu, kaha akindulukile mwilu. Kutwala muze, “Kalunga amuzezwile nakumuhaka hachihela chahelu.” (Wavaka-Fwilipi 2:9) Oholyapwa Yesu atwama hachihela chachinene, ikiye muhato waYehova.
LINANGULE VYAKUJIMINYINA
Wana vyuma vyavivulu hali Yesu novyo chapwila chachilemu kulinangula hali ikiye.
4. Yesu kapwa Kalunga Wangolo Josenako
Mbimbiliya yanangula ngwayo numba tuhu Yesu apwa mutu wangolo wakushipilitu mwilu, oloze eji kwononokanga Yehova uze apwa Kalunga kenyi, kaha nawa Ise. Mwomwo ika tunahanjikila ngocho? Talenu VINDIYO mumone vyuma yanangula Mbimbiliya mangana mutachikize chihandwa chatwama hali Yesu naKalunga wangolo josena.
Visoneka vinakavangizaho, vyatukafwa tutachikize kanawa usoko watwama hali Yehova naYesu. Tangenu chisoneka hichisoneka nakushimutwila havihula vinakavangizaho.
Tangenu Luka 1:30-32.
-
Uno kangelo alumbunwine ngachilihi usoko watwama hali Yesu naYehova Kalunga uze apwa “Wakulitulaho Chikuma”?
Tangenu Mateu 3:16, 17.
-
Vyuma muka lyahanjikile lize lizu lyafumine mwilu omu vapwile nakumbapachisa Yesu?
-
Uno washinganyeka ngwove lizu kana lyapwile lyeya?
Tangenu Yowano 14:28.
-
Uno hali mwana naise, iya apwa mukulwane, uze nawa atwama nawata?
-
Uno Yesu atwalile mulihi hakuvuluka Yehova ngwenyi, “Tata”?
Tangenu Yowano 12:49.
-
Uno Yesu ashinganyekele ngwenyi eseka hamwe naIse tahi? Nyi ove washinganyeka muka?
5. Vyuma vyasolwele nge Yesu ikiye Meshiya
MuMbimbiliya mwatwama upolofweto wauvulu uze wakafwile vatu vatachikize Meshiya uze vasakwile kuli Kalunga mangana asokole vatu. Talenu VINDIYO mangana mutachikize upolofweto umwe uze ateselemo Yesu omu apwile hano hamavu.
Tangenu upolofweto wamuMbimbiliya nakushimutwila havihula vinakavangizaho.
Tangenu Mika 5:2 haze vavulukilile chimweza okwo mwakasemukila Meshiya. b
-
Uno kusemuka chaYesu chateselemo upolofweto kana tahi?—Mateu 2:1.
Tangenu Samu 34:20 naZekaliya 12:10 mangana mumone vyuma vapolofwetele chimweza kutalisa kukufwa chaMeshiya.
-
Uno upolofweto kana wateselemo tahi?—Yowano 19:33-37.
-
Mwomwo ika natwambila ngwetu Yesu keshi ikiye alingishile upolofweto kana utesemoko?
-
Uno echi chinakunangula vyuma muka hali Yesu?
6. Kulinangula hali Yesu cheji kutukafwanga
Mbimbiliya yahanjika ngwayo chapwa chachilemu kulinangula hali Yesu nahavyuma vize Kalunga asaka Yesu alingenga. Tangenu Yowano 14:6 na 17:3, kufumaho shimutwilenu hachihula chino:
-
Mwomwo ika chapwila chachilemu kulinangula hali Yesu?
Yesu atusokwelelele jila mangana tupwenga tumasepa jaKalunga. Anangwile vyuma vyamuchano hali Yehova kaha natukapwa nakuyoya chahaya myaka yosena kuhichila muli ikiye
VATU VAMWE NGWAVO: “Vinjiho jaYehova kavafwelela Yesuko.”
-
Naukumbulula ngachilihi vatu kana?
CHISHINA UNALINANGULA
Yesu apwa mutu wangolo wakushipilitu. Apwa mwanaKalunga kaha nawa Meshiya.
Kuhituluka
-
Mwomwo ika Yesu vamuvulukila ngwavo “twatwa kuvyuma vyakutenga vyosena”?
-
Vyuma muka alingilenga Yesu shimbu kanda ezenga hano hamavu?
-
Uno twatachikiza ngachilihi ngwetu Yesu ikiye Meshiya?
WANA VYAVIVULU
Wana vyuma vyavivulu vize vyatulingisa tutachikize ngwetu Yesu ikiye Meshiya.
Uno Kalunga asemene Yesu ngana muze vatu veji kusemanga vana tahi? Wana vyuma yanangula Mbimbiliya.
“Mwomwo Ika Yesu Vamuvulukila Ngwavo MwanaKalunga?” (Chihande chili ha jw.org/lue)
Wana ovyo kunangula chaTulunga vatatu kachapwila kunangula chamuMbimbiliyako.
“Uno Yesu Apwa Kalunga Tahi?” (Chihande chamuKaposhi Kakutalila)
Tanga uwane omwo pwevo umwe alumwine kuyoya chenyi hakutachikiza vyuma yanangula Mbimbiliya hali Yesu.
“Pwevo wakaYuleya Mwalumbununa Vyuma Vyamulingishile Akekese Kanawa Vyuma Afwelelele” (Chihande chamuTonenu!)
a Chilongesa 26 na 27 nachikalumbununa ovyo vatu vasakiwila kuvalwila najila atulwililamo Yesu.
b Talenu Chinyikilo chakusongo 2 mangana mumone upolofweto uze wahanjikile halwola mwakasoloka Meshiya hano hamavu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
