CHILONGESA 19
Uno Vinjiho jaYehova Vapwa Vaka-Kulishitu vaMuchano Tahi?
Mwomwo ika etu Vinjiho jaYehova twafwelela ngwetu tuvaka-Kulishitu vamuchano? Wana oho hazama vyuma twafwelela, nalijina lize lyatuhandula kumauka eka nazangi tweji kulisolwelanga.
1. Uno vyuma vafwelela Vinjiho jaYehova vyazama haka?
Yesu ambile ngwenyi: “Mazu [aKalunga] apwa muchano.” (Yowano 17:17) Vyuma anangwilenga Yesu vyazamine haMazu aKalunga, kaha navyuma vafwelela Vinjiho jaYehova nawa vyazama haMazu aKalunga. Chakutalilaho, wana omwo Vinjiho jaYehova, vaze vavulukilenga ngwavo Vaka-Kulinangula Mbimbiliya, vanalinginga ngocho. Kafwe mumwaka wa 1870, lizavu lyavaka-kulinangula Mbimbiliya lyaputukile kukekesa kanawa Mbimbiliya. Kaha vyuma vafwelelele vyazamine haMbimbiliya, numba tuhu vyuma kana vyalihandunwine nakunangula chamujichachi. Ngocho vaputukile kulwezako vakwavo muchano vawanyine muMbimbiliya. a
2. Mwomwo ika twalivulukila ngwetu tuVinjiho jaYehova?
Yehova avuluka vaka-kumulemesa ngwenyi vinjiho jenyi mwomwo veji kuhanjikanga vyuma vyamuchano hali ikiye. (WavaHepeleu 11:4–12:1) Chakutalilaho, kushikulu Kalunga alwezele vatu jenyi ngwenyi: “Enu munapu muvinjiho jami.” (Tanga Isaya 43:10.) Yesu nawa vamuvuluka ngwavo, “Chinjiho Wakushishika.” (Kusoloka 1:5) Ngocho, kuheta mu 1931 twaputukile kulivuluka ngwetu tuVinjiho jaYehova. Twawahilila hakutuvulukila lijina kana.
3. Uno Vinjiho jaYehova veji kusololanga ngachilihi zangi ngana mwaYesu?
Yesu azangile chikuma tumbaji twenyi kwijiva nge hivausoko wenyi. (Tanga Mako 3:35.) NaVinjiho jaYehova nawa vapwa vakulinunga mukaye kosena ngana muze yapwa tanga. Echi chikiko twalivulukila ngwetu tuvandumbu. (WaFwilemone 1, 2) Kaha nawa twakavangiza lushimbi lwakwamba ngwavo: “Zangenunga vandumbwenu vosena.” (WaPetulu 1, 2:17) Vinjiho jaYehova veji kusololanga zangi mujijila jajivulu. Chakutalilaho, veji kukafwanga vandumbwavo mukaye kosena vaze vali muukalu.
LINANGULE VYAKUJIMINYINA
Linangule vyavivulu hali Vinjiho jaYehova vakunyima mangana umone unjiho wakusolola nge chikupu vene vapwa vaka-Kulishitu vamuchano.
Vyuma vafwelela vaka-Kulishitu vamuchano vyazama haMbimbiliya, kaha nawa veji kulwezangako vakwavo vyuma kana
4. Vyuma twafwelela vyazama haMbimbiliya
Yehova ahanjikilile chimweza ngwenyi vatu navakatachikiza muchano wamuMbimbiliya. Tangenu Ndanyele 12:4 nakwinyikila chamwishi, kufumaho shimutwilenu hachihula chino:
-
Chuma muka ahanjikile Kalunga ngwenyi “nachikavula” muli vatu jenyi, omu navakatwalaho kulinangula Mbimbiliya?
Tutale omwo lizavu lyavaka-kulinangula Mbimbiliya, kuhakilako vene naCharles Russell, valinangwilenga Mazu aKalunga. Talenu VINDIYO, nakushimutwila hachihula chino:
-
Uno Charles Russell navakwavo valinangwilenga ngachilihi Mbimbiliya?
Uno watachikiza tahi?
Lwola lumwe, etu Vinjiho jaYehova tunalumunangako vyuma twafwelela. Mwomwo ika? Ngana muze musana wakututuka chalikumbi weji kumunyikanga nakutukafwa tumone vyuma chindende chindende, naKalunga nawa eji kutukafwanga twivwishise Mazu enyi chindende chindende. (Tanga Vishimo 4:18.) Numba tuhu Mbimbiliya kayalumukako, oloze tweji kwalumunangako vyuma twafwelela mwomwo yaulumbunwiso wauhya wamuvisoneka.
5. Twalinga vyuma kweseka naulumbunwiso walijina lyetu
Mwomwo ika twalivulukila ngwetu tuVinjiho jaYehova? Talenu VINDIYO, nakushimutwila hachihula chinakavangizaho.
-
Mwomwo ika chapwila chakutamo kutuvuluka ngwavo tuVinjiho jaYehova?
Mwomwo ika Yehova asakwila vatu vapwenga vinjiho jenyi? Hakuwana nge vanamuvangijikilanga vyuma vyavivulu, ngocho asakula vatu mangana valweze vatu ngwavo ikiye Kalunga wamuchano. Chakutalilaho, tutale vyuma vivali vize vanamuvangijikilanga.
Mauka amwe akwitava etavisa vatu jawo kuzachisa tuponya hakulemesa Kalunga. Uno omu mukiko asaka Kalunga tahi? Tangenu VyavaLevi 26:1, nakushimutwila havihula vino:
-
Chishina muka chili muchisoneka unatange? Kutala Yehova etavila kumulemesa kuzachisa tuponya tahi?
Vatwamina vamwe vamukwitava vanangula ngwavo Yesu apwa Kalunga. Uno Yesu apwa Kalunga tahi? Tangenu Yowano 20:17, nakushimutwila havihula vino:
-
Chishina muka chili muchisoneka unatange? Uno Yesu ikiye vene Kalunga tahi?
-
Uli nakwivwa ngachilihi hakutachikiza ngwove Yehova atuma Vinjiho jenyi vambulule vyuma vyamuchano hali ikiye nahali Mwanenyi?
6. Twalizanga navakwetu
Mbimbiliya yafwanyisa vaka-Kulishitu kuvilyo vyamujimba. Tangenu Wavaka-Kolinde 1, 12:25, 26, nakushimutwila havihula vino:
-
Vaka-Kulishitu vamuchano vatela kulinga ika nge vandumbwavo vali nakuyanda?
-
Jijila muka wamona jize Vinjiho jaYehova veji kulisolwelangamo zangi?
Nge Vinjiho jaYehova kungalila yimwe vali muukalu, hahaze vene vandumbwavo mukaye kosena veji kuvakafwanga. Chakutalilaho, talenu VINDIYO. Kufumaho, shimutwilenu hachihula chinakavangizaho.
-
Uno wana veji kuhananga Vinjiho jaYehova wakukafwa vaze vali muukalu wakulijila, wasolola ngachilihi nge vatwama nazangi?
Vaka-Kulishitu vamuchano veji kusololanga zangi kuvatu vaze vali muukalu
VATU VAMWE NGWAVO: “Liuka lyaVinjiho jaYehova lyapwa lyalihya.”
-
Lwola muka aputukile Yehova kuvuluka vaka-kumulemesa ngwenyi vinjiho jenyi?
CHISHINA UNALINANGULA
Etu Vinjiho jaYehova twapwa tuvaka-Kulishitu vamuchano. Twatwama mutanga yamukaye kosena yavaka-kulemesa Kalunga, vaze vafwelela vyuma vyazama haMbimbiliya. Tweji kunangulanga vatu muchano waYehova.
Kuhituluka
-
Mwomwo ika twaputukilile kulivuluka ngwetu tuVinjiho jaYehova?
-
Uno tweji kusolwelanga ngachilihi vandumbwetu zangi?
-
Kutala wafwelela ngwove Vinjiho jaYehova vapwa vaka-Kulishitu vamuchano tahi?
WANA VYAVIVULU
Linangule mijimbu yaVinjiho jaYehova vakunyima.
Vinjiho jaYehova Vanasololanga Lufwelelo, Chihanda 1: Kufuma muMilima (1:00:53)
Tala chakutalilaho chakusolola omwo Vinjiho jaYehova vanasopololanga kunangula chamakuli.
Wana omwo vakumbulula vihula vimwe vize pamo walihulisaho lyehi hali Vinjiho jaYehova.
“Vihula Veji Kwihulanga Kuswakumwe Hali Vinjiho jaYehova” (Lifwo lyahaInternet)
Stephen ahungilenga vatu vavikova vyeka nakuvazungisa. Wana chuma amwene kuli Vinjiho jaYehova chize chamulingishile alumune vilinga vyenyi.
“Chiyoyelo Chami Chapwile Nakupihilako” (Kaposhi Kakutalila, July 1, 2015)
a Mangazini yaKaposhi Kakutalila yikiko tunazachisanga chikuma hakunangula vatu muchano wamuMbimbiliya kufuma vene mu 1879.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
