CHILONGESA 22
Watela Kulinga Ika Numba Wambulileko Vakwenu?
Nge uli nakulinangula muchano, unahase kushinganyeka ngwove, ‘Vatu vosena vatela kutachikiza muchano.’ Chikupu vene, vatu vosena vali nakusakiwa kuutachikiza. Chipwe ngocho, unahase kwivwa woma kulwezako vakwenu vyuma unalinangula. Tushimutwile mwakuhonesela woma kana, mangana wambulilenga vakwenu mujimbu wamwaza wamuMbimbiliya namuchima wakukasunuka.
1. Jijila muka unahase kulwezelamo vakwenu vyuma unalinangula?
Tumbaji twaYesu vambile ngwavo: “Katweshi kuhasa kulitwamina kuhanjika vyuma tunamono nakwivwako.” (Vilinga 4:20) Vamwene muchano kupwa waulemu, ngocho vafwililile kuwambulula kuvatu vavavulu. Uno omu mukiko weji kwivwanga nayove tahi? Nge mukiko, kaha fwilanga kuwana lwola lwakutamo mangana ulwezeko vausoko namasepa mujila yakavumbi vyuma unalinangula.—Tanga Wavaka-Kolose 4:6.
Jijila jimwe najikukafwa uputuke kushimutwila navatu
-
Nge uli nakusaka kulwezako kausoko vyuma vyamuMbimbiliya, hanjika ngwove: “Kuli vyuma vimwe vyamwaza ngunalinangula chalumingo chino.”
-
Nge sepa lyove naviji chipwe nalizakamina, kaha mulwezeko chisoneka chimwe chize nachimukolezeza.
-
Nge vakwenu vaka-milimo navakuhulisa omwo yili tanga yove, kaha valwezeko vyuma unalinangula hachilongesa chaMbimbiliya chipwe kukukunguluka chachikungulwilo.
-
Lwezako masepa jove keyala ya jw.org/lue.
-
Lweza vakwenu vapwengangako kuchilongesa chove chaMbimbiliya, chipwe kuvalweza vayenga ha jw.org valombe vavanangule Mbimbiliya.
2. Uno kwambulwila hamwe nachikungulwilo chalemena halihi?
Tumbaji twaYesu kavakuminyinyine kaha hakwambulila venyembo javoko. Yesu “avatumine vavali vavali valivange kuya [nakwambulwila] kujinganda josena.” (Luka 10:1) Kwambulula mujila kana eyi yakulonga chalingishile vatu vavavulu chikuma vevwenga mujimbu wamwaza. Tumbaji vawahililile chikuma mwomwo vazachililile hamwe. (Luka 10:17) Kutala nayove unahase kulitomena kwambulwila hamwe nachikungulwilo tahi?
LINANGULE VYAKUJIMINYINA
Wana omwo unahase kuhonesa woma, nakupwa uwakuwahilila mwomwo yakwambulula mujimbu wamwaza.
3. Yehova mwapwanga nayove
Vatu vamwe vaze vasaka kwambulula vanahase kwivwa woma hakushinganyeka mujila navavamwenamo vatu chipwe kushinganyeka mujila navavakumbulwilamo.
-
Uno weji kwivwanga woma kulwezako vakwenu vyuma unalinangula tahi? Kaha mwomwo ika?
Talenu VINDIYO, nakushimutwila hachihula chinakavangizaho.
-
Vyuma muka valingile Vinjiho vavakweze vamwe mangana vahone kwivwa jino woma?
Tangenu Isaya 41:10, nakushimutwila hachihula chino:
-
Mwomwo ika watela kulomba kachi nge uli nakwivwa woma kwambulula?
Uno watachikiza tahi?
Vinjiho jaYehova vavavulu hakavanga vashinganyekelenga ngwavo, kaveshi kukahasa kwambulila vakwavo mujimbu wamwazako. Chakutalilaho, Sergey alimwenenga kupwa wamokomoko kaha nawa chamukaluhwililenga kushimutwila navakwavo. Oloze omu alinangwile Mbimbiliya, ambile ngwenyi: “Numba tuhu ngwevwilenga woma oloze ngwaputukile kulwezako vakwetu vyuma ngwalinangwilenga. Ngwamwene jino ngwami kulwezako vakwetu vyuma vyamuMbimbiliya changulingishile nguhone kulimona kupwa nguwakukuminamo. Kaha nawa changulingishile ngufwelele chikuma vyuma vyavihya ngwalinangwilenga.”
4. Hanjikanga mukalemesa
Nge uli nakusaka kwambulula mujimbu wamwaza shinganyekanga havyuma nauhanjika namujila nauvihanjikilamo. Tangenu WaChimoteu 2, 2:24 naWaPetulu 1, 3:15, nakushimutwila havihula vino:
-
Nauzachisa ngachilihi jivesi kana nge uli nakulwezako vakwenu vyuma unalinangula?
-
Vyuma muka watela kulinga navize kawatela kulingako kachi nge vausoko vamwe namasepa navakana kwitavila vyuma nauvalweza?
-
Mwomwo ika nachipwila chamwaza kuhulisa vatu vihula mujila yakuzangama muchishishisa chakuvashinyinyika vetavile vyuma twafwelela?
5. Kwambulula mujimbu wamwaza cheji kunehanga kuwahilila
Yehova ahanyine Yesu mulimo wakwambulula mujimbu wamwaza. Uno Yesu amwenenga ngachilihi mulimo kana? Tangenu Yowano 4:34, nakushimutwila havihula vino:
-
Kulya vyakulya vyamwaza cheji kutukafwanga tutwaleho kuyoya nakupwa vakuwahilila. Mwomwo ika Yesu afwanyishilile kulinga mwaya muchima waKalunga kuhakilako vene nakwambulula mujimbu wamwaza kukulya?
-
Kuwaha muka chinahase kufumamo nge nawambululanga mujimbu wamwaza?
Vyuma navikukafwa
-
Hakukunguluka chamukachi kachalumingo, hakangako muchima mangana umone jijila jakuputukilamo kushimutwila navatu.
-
Shimutwila namuka-kukunangula mangana ulisonekese mushikola hakukunguluka chamukachi kachalumingo. Vihande vyamushikola navikukafwa upwenganga wakulizanga kulwezangako vakwenu vyuma uli nakulinangula.
-
Zachisa vihanda vyakwamba ngwavo “Vatu Vamwe Ngwavo” chipwe “Mutu Nahase Kuhulisa Ngwenyi,” vize vili mumukanda uno mangana ulijilise kukumbulula vihula vavula kuhulisa vatu navyuma veji kuhanjikanga mangana vatuhonese kuvambulila.
MUTU NAHASE KUHULISA NGWENYI: “Vyuma vili nakutambuka ngachilihi?”
-
Uno nauzachisa ngachilihi lwola kana mangana umulweze vyuma walinangulanga hachilongesa chaMbimbiliya?
CHISHINA UNALINANGULA
Kwambulila vakwenu mujimbu wamwaza cheji kunehanga kuwahilila. Kaha nawa kachapwa chachikalu ngana muze pamo washinganyekako.
Kuhituluka
-
Mwomwo ika twatela kwambulilanga vakwetu mujimbu wamwaza?
-
Unahase kwambulila ngachilihi vatu mujila yakavumbi?
-
Vyuma muka watela kulinga nge uli nakwivwa woma kwambulula?
WANA VYAVIVULU
Wana jijila jiwana jajashi jize najikukafwa wambulule mujimbu wamwaza kuzachisa kati yakulweza vatu jw.org.
Wana vyuma viwana vize navikukafwa wambulule mujimbu wamwaza.
“Kutala Munalizange Kupwa muVaka-Kufuta Vatu Tahi?” (Kaposhi Kakutalila, September 2020)
Tala chakutalilaho chamuMbimbiliya chize nachikafwa mutu ambulule mujimbu wamwaza nakumika numba tuhu achili kanyike.
Wana omwo unahase kushimutwila vyamuMbimbiliya navausoko vaze kanda valinangulengaho lyehi hali Yehova.
“Kuheta kuMichima yaVausoko Vakuzeneka Kwitava” (Kaposhi Kakutalila, March 15, 2014)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
