Yesu ambile ngwenyi vaka-Kulishitu vatela kuvambapachisa. (Tanga Mateu 28:19, 20.) Uno lumbapachiso lwapwa luka? Kaha vyuma muka atela kulinga mutu numba atengamo kumumbapachisa?

1. Uno lumbapachiso lwapwa luka?

Lizu “kumbapachisa,” lyafuma kulizu lyachiHelase lize lyalumbununa “kujimika” mumeya. Yesu vamumbapachishile hakumujimika muKalwiji Yotau. Kufumaho, “afumine mumeya.” (Mako 1:9, 10) Chochimwe nawa, vaka-Kulishitu vamuchano veji kuvambapachisanga hakuvajimika chipwe ngwetu kuvambwichika mumeya.

2. Uno lumbapachiso lweji kusololanga ika?

Mutu uze vanambapachisa, eji kusololanga hatoma ngwenyi nalihane lyehi kuli Yehova Kalunga. Uno mutu eji kulihananga ngachilihi? Shimbu kanda vamumbapachise, eji kuvangilanga kulomba kwaukawenyi nakulweza Yehova ngwenyi mwamuzachilanga haya myaka. Eji kushikanga Yehova ngwenyi mwamulemesanga ikiye kaha nakutwalaho kumona kulinga mwaya muchima waKalunga kupwa chachilemu mukuyoya chenyi. Eji ‘kulikananga ivene nakukavangizanga lika’ Yesu navyuma anangwilenga. (Mateu 16:24) Kulihana chenyi kuli Yehova nalumbapachiso lwenyi navimukafwa apwenga nausoko wakukola naYehova navakwavo vaka-kwitava.

3. Vyuma muka atela kulinga mutu numba atengamo kumumbapachisa?

Nge naulinangula hali Yehova nakumufwelela chikuma, kaha nautamo kukumbapachisa. (Tanga WavaHepeleu 11:6.) Kutachikiza kanawa Yehova nakumufwelela chikuma nachikulingisa umuzange. Ngocho naufwila jino kulwezako vakwenu vyaikiye nakulamanga jishimbi jenyi. (WaChimoteu 2, 4:2; WaYowano 1, 5:3) Nge mutu naputuka kuyoya kweseka namuze “mwatela kumeso aYehova nakumwivwisanga kuwaha chikuma,” eji kusakulanga jino kulihana kuli Kalunga nakumumbapachisa.—Wavaka-Kolose 1:9, 10. a

 LINANGULE VYAKUJIMINYINA

4. Vyuma natulinangula kulumbapachiso lwaYesu

Tangenu Mateu 3:13-17 mangana ulinangule vyuma vyavivulu kulumbapachiso lwaYesu. Kufumaho shimutwilenu havihula vino:

• Uno Yesu vamumbapachishile omu apwile kemba tahi?

• Uno vamumbapachishile ngachilihi? Kutala vamusapwililile kaha meya tahi?

Omu Yesu vamumbapachishile hakiko aputukile kuzata mulimo wenyi wakulipwila uze vamuhanyine kuli Kalunga. Tangenu Luka 3:21-23 naYowano 6:38, nakushimutwila hachihula chino:

• Mulimo muka amwene Yesu kupwa waulemu mukuyoya chenyi hanyima yakumumbapachisa?

5. Unahase kutamo kukumbapachisa

Hakavanga unahase kushinganyeka ngwove kaweshi kutamo kulihana kuli Yehova nakukumbapachisako. Oloze unahase kuzovoloka nakusaka jino kulinga vyuma kana. Hakusaka umone vatu vamwe vanalinginga ngocho, talenu VINDIYO.

Tangenu Yowano 17:3 naWaYakova 1:5, nakushimutwila hachihula chino:

• Chuma muka nachikafwa mutu amone ngwenyi natemo kumumbapachisa?

1. Tweji kulihananga kuli Yehova hakulomba kuli ikiye nakumushika ngwetu natumuzachilanga haya myaka

2. Omu veji kutumbapachisanga, tweji kulisololanga hatoma ngwetu tunalihane kuli Kalunga

 6. Lumbapachiso lweji kulingisanga mutu apwenga mutanga yaYehova

Nge vanatumbapachisa, tweji kupwanga jino mutanga yakulinunga yamukaye kosena. Numba tuhu twafuma kuvihela naviyoyelo vyakulisezaseza, oloze tuvosena twafwelela vyuma vyovimwe nakukavangiza jishimbi jojimwe. Tangenu Samu 25:14 naWaPetulu 1, 2:17, nakushimutwila hachihula chino:

• Uno lumbapachiso nalutulingisa tupwenga nausoko wakufwana ngachilihi naYehova navakwetu vaze veji kumulemesanga?

 CHISHINA UNALINANGULA

Yesu anangwile ngwenyi vaka-Kulishitu vatela kuvambapachisa. Hakusaka mutu atengamo kumumbapachisa, atela kufwelela chikuma Yehova, nakukavangizanga jishimbi jenyi nakulihana kuli ikiye.

Kuhituluka

• Lumbapachiso lwapwa luka, kaha lwalemena halihi?

• Uno lumbapachiso lweji kusololanga chuma muka?

• Vyuma muka atela kulinga mutu shimbu kanda alihane kuli Kalunga nakumumbapachisa?