CHILONGESA 24
Uno Vangelo Vapwa Veya Kaha Vazata Mulimo Muka?
Yehova asaka tutachikize tanga yenyi yamwilu. Mutanga kana mwatwama navangelo vaze vavuluka ngwavo “vana vaKalunga.” (Yopa 38:7) Vyuma muka yahanjika Mbimbiliya hali vangelo? Vyuma muka veji kulinganga vangelo kuli vatu? Uno vangelo vosena vatwama mutanga yaKalunga tahi?
1. Uno vangelo vapwa veya?
Yehova avangilile kutenga vangelo shimbu kanda atenge ano mavu. Vangelo vapwa vatu vakushipilitu vamwilu vaze katwamonako ngana muze apwa Yehova. (WavaHepeleu 1:14) Kwatwama mayongomena avangelo, kaha kangelo hikangelo apwa wakulipwila. (Kusoloka 5:11) Veji ‘kulinganga mwaya mazu [aYehova], nakwivwilila mulizu lyenyi.’ (Samu 103:20) Kushikulu lwola lumwe Yehova atuminenga vangelo vayenga nakwambulila vatu jenyi mujimbu, nakuvakafwa nakuvalwila. Namakumbi ano vangelo veji kutwaminyinanga vaka-Kulishitu vayenga kuvatu vaze vali nakusaka kulinangula hali Kalunga.
2. Uno Satana navandemone jenyi vapwa veya?
Vangelo vamwe kavatwalileho lika kupwa vakushishika kuli Yehovako. Kangelo watete kulikanga vamuvuluka ngwavo “Liyavolo kaha nawa Satana, uze ali nakuhungumwisa vatu vosena hamavu.” (Kusoloka 12:9) Satana asakile kupwa nangolo jakuyula, ngocho ahungumwishile vatu vakulivanga, kaha kutwala muze ahungumwishile navangelo vamwe mangana navakiko valikange kuli Kalunga. Ava vangelo vakulikanga vakiko vandemone. Yehova avafumishile mwilu nakuvambila hano hamavu, kaha navakavanongesa.—Tanga Kusoloka 12:9, 12.
3. Satana navandemone veji kusakanga kutuhungumwisa ngachilihi?
Satana navandemone veji kuhungumwisanga vatu vavavulu kuhichila mukupanda. Kupanda chapwa kuzachila hamwe navashipilitu vavapi. Chakutalilaho, vatu veji kuyanga kuli vaka-kuzachisa vatanganyika, navaka-kulweza vyuma vyakulutwe, navimbanda, navaka-kutaha, navatu veka vakufwana ngana. Veka nawa veji kwitavilanga kuvoka mujila yize yakundwiza vandemone. Vatu vavahungumwisa nawa vafwelele ngwavo vanahase kuhanjika navafu. Oloze Yehova atuhuhumuna ngwenyi: “Kanda mukaya kuli vaka-kutahisa vashipilitu, chipwe kuli vaka-kulweza vyuma vyakulutweko.” (VyavaLevi 19:31) Atuhuhumuna mujila kana mangana atukinge kuli Satana navandemone, mwomwo vapwa vaka-kole jenyi, kaha vasaka kutulemeka.
LINANGULE VYAKUJIMINYINA
Wana vyuma vyamwaza veji kulinganga vangelo, novyo kupanda chapwila chachipi, nomwo tunahase kulikinga kuli Satana navandemone.
4. Vangelo veji kukafwanga vatu valinangule hali Yehova
Vangelo jaKalunga veji kuzatanga mulimo wakwambulula hakutwaminyina vaka-kulemesa Kalunga kuvatu vaze vali nakusaka kulinangula hali ikiye. Tangenu Kusoloka 14:6, 7, nakushimutwila havihula vino:
-
Mwomwo ika twasakiwila kutukafwa kuli vangelo hakwambulula?
-
Uno kutachikiza ngwove vangelo vanahase kututwaminyina kuvatu vaze vali nakusaka kulinangula Mbimbiliya chinakukolezeza tahi? Mwomwo ika?
5. Hunga kupanda
Satana navandemone vapwa vaka-kole jaYehova. Kaha nawa vapwa vaka-kole jetu. Tangenu Luka 9:38-42, nakushimutwila hachihula chino:
-
Uno vandemone veji kulinganga vyuma muka kuli vatu?
Katwatela kuselanga vandemone kengililoko. Tangenu Lushimbi lwamuchivali 18:10-12, nakushimutwila havihula vino:
-
Vyuma muka vasaka kulinga vandemone mangana tuzachile navo hamwe nakuhanjika navo? Vyuma muka vyakundwiza vandemone vize veji kulinganga vatu vamungalila watwama?
-
Kutala wamona ngwove chapwa chamwaza Yehova kutukanyisa vilinga vyaundemone tahi? Mwomwo ika?
Talenu VINDIYO, nakushimutwila havihula vino:
-
Kutala washinganyeka ngwove lingona lyapwile kulivoko lyamwana Palesa lyamukingilenga tahi? Mwomwo ika?
-
Chuma muka atelele kulinga Palesa mangana alikinge kuvandemone?
Vaka-Kulishitu vamuchano vanemanyinanga vandemone nakole lwola lwosena. Tangenu Vilinga 19:19 naWavaka-Kolinde 1, 10:21, nakushimutwila hachihula chino:
-
Mwomwo ika chapwila chachilemu kumbila vyuma vyosena watwama navyo vize vyakundwiza vandemone?
6. Fungulula Satana navandemone jenyi
Vandemone veji kuvatwaminyinanga kuli Satana. Oloze vangelo vakushishika veji kuvatwaminyinanga kuli kangelo wakulitulaho Mikayele, ikiye Yesu. Uno Mikayele atwama nangolo chikuma tahi? Tangenu Kusoloka 12:7-9, nakushimutwila havihula vino:
-
Iya atwama nangolo chikuma? Mikayele navangelo jenyi tahi nyi Satana navandemone jenyi?
-
Kutala washinganyeka ngwove vaka-kukavangiza Yesu vatela kwivwa woma Satana navandemone jenyi tahi?
Unahase kufungulula Satana navandemone jenyi. Tangenu WaYakova 4:7, nakushimutwila hachihula chino:
-
Naulikinga ngachilihi kuli Satana navandemone?
VATU VAMWE NGWAVO: “Kachapwa chachipi kwazana mukuhema chahamakina chipwe kutala jivindiyo jize jakundwiza kupandako, mwomwo vyapwa vyakutalila chiseke kaha.”
-
Mwomwo ika chapwila chaponde kushinganyeka ngocho?
CHISHINA UNALINANGULA
Vangelo vakushishika veji kutukafwanga. Oloze Satana navandemone jenyi vapwa vaka-kole jaYehova, kaha veji kuzachisanga kupanda mangana vahungumwise vatu.
Kuhituluka
-
Uno vangelo jaYehova vali nakukafwa ngachilihi vatu valinangule hali ikiye?
-
Uno Satana navandemone jenyi vapwa veya?
-
Mwomwo ika watela kulihendela kukupanda?
WANA VYAVIVULU
Wana unjiho wakusolola nge Yesu ikiye Mikayele kangelo wakulitulaho.
“Iya Apwa Mikayele Uze Kangelo Wakulitulaho?” (Chihande chili ha jw.org/lue)
Wana unjiho wakusolola nge chikupu vene Liyavolo kwatwama.
“Uno Liyavolo Kwatwama Chikupu Tahi?” (Chihande chili ha jw.org/lue)
Wana vyuma vyakafwile pwevo umwe echenga kulikata navandemone.
“Apwa Jino Wakuwahilila muKuyoya” (Kaposhi Kakutalila, July 1, 1993)
Wana omwo Satana eji kuzachisanga kupanda mangana ongenga vatu.
“Kwijiva Mwalumbunukila Kupanda naUloji” (Jila YakuKuyoya ChaHaya Myaka Yosena, chihanda 5)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
