CHILONGESA 27
Uno Kufwa chaYesu Chatusokola Ngachilihi?
Tweji kuyandanga nakufwa nakulinga shili a mwomwo Alama naEve, vapwevo nalunga vatete, valikangile kuli Kalunga. Oloze omu keshi mukiko nachipwanga likako. Yehova awahisa jila yakutusokwelamo kushili nakukufwa kuhichila muli Mwanenyi Yesu Kulishitu. Mbimbiliya yanangula ngwayo Yesu ahanyine ndando yakusokola kuhichila mukufwa chenyi. Ndando yakusokola yapwa ndando yize veji kufwetanga mangana vasokole mutu. Ndando ahanyine Yesu shina kuyoya chenyi chakukupuka chahano hamavu. (Tanga Mateu 20:28.) Yesu alisuwile kuhana kuyoya chenyi chahaya myaka chahano hamavu, mangana tukapwe navyuma vyosena vize ajimbalishile Alama naEve. Yesu asolwele nawa ngwenyi, ikiye naYehova vatuzanga chikuma. Chino chilongesa nachikukafwa umonenga kufwa chaYesu kupwa chachilemu chikuma.
1. Uno kufwa chaYesu nachitukafwa ngachilihi oholyapwa?
Tweji kulinganga vyuma vyavivulu vize vyeji kwivwisanga Yehova kupihya mwomwo twapwa tuvaka-shili. Oloze natupwa nausepa wakukola naikiye nge natwivwa kupihya havyuma kana, nakumulomba kuhichila muli Yesu Kulishitu mangana atukonekele, nakukilikita tuhone cheka kulinga vyuma kana. (WaYowano 1, 2:1) Mbimbiliya ngwayo: “Kulishitu nawa afwile kamwe kaha kunahu hajishili jetu. Ou mutu wakwoloka afwililile vaka-kuhenga, mangana amitwaminyine kuli Kalunga.”—WaPetulu 1, 3:18.
2. Uno kufwa chaYesu nachikatukafwa ngachilihi kulutwe?
Yehova atumine Yesu ahane kuyoya chenyi chakukupuka chahamavu, “mangana ngwenyi weshowo mwamufwelela [Yesu] vakahone kumunongesa, oloze akapwe nakuyoya chahaya myaka yosena.” (Yowano 3:16) Mwomwo yachuma alingile Yesu, Yehova kalinwaha afumiseko vyuma vyavipi vyosena vize vyeza mwomwo yakulikanga chaAlama. Shikaho, nge natufwelela mundando yaYesu, kaha natukayoya haya myaka mupalachise hano hamavu.—Isaya 65:21-23.
LINANGULE VYAKUJIMINYINA
Linangule vyavivulu havyuma vyalingishile Yesu ahane kuyoya chenyi, nomwo kufwa chenyi chinahase kukukafwa.
3. Kufwa chaYesu chatusokola kushili nakukufwa
Talenu VINDIYO, nakushimutwila hachihula chinakavangizaho.
-
Chuma muka ajimbalishile Alama omu alikangile kuli Kalunga?
Tangenu Wavaka-Loma 5:12, nakushimutwila hachihula chino:
-
Uno shili yaAlama yaneha ukalu muka mukuyoya chove?
Tangenu Yowano 3:16, nakushimutwila hachihula chino:
-
Mwomwo ika Yehova atuminyinyine Mwanenyi ezenga hano hamavu?
-
Alama apwile mutu wakukupuka uze anehelelele vatu shili nakufwa mwomwo yakulikanga kuli Kalunga
-
Yesu apwile mutu wakukupuka uze ononokele Kalunga, nakulingisa vatu vapwenga nakutokwa chakukapwa vakukupuka nakukayoya haya myaka
4. Kufwa chaYesu chinahase kukafwa vatu vosena
Talenu VINDIYO, nakushimutwila hachihula chinakavangizaho.
-
Uno kufwa chamutu umwe chinahase kukafwa ngachilihi vatu vosena?
Tangenu WaChimoteu 1, 2:5, 6, nakushimutwila hachihula chino:
-
Alama apwile mutu wakukupuka uze anehelelele vatu shili nakufwa. Yesu nawa apwile mutu wakukupuka. Uno Yesu apwa ngachilihi “ndando yakulitombola yakusokola”?
5. Ndando yakusokola hiwana uze akuhana Yehova
Masepa jaYehova vamona ndando yakusokola kupwa wana uze avahana mutu himutu. Chakutalilaho, tangenu Wavaka-Ngalesha 2:20, nakushimutwila hachihula chino:
-
Uno kaposetolo Paulu asolwele ngachilihi ngwenyi amwene ndando yakusokola kupwa wana uze vamuhanyine?
Omu Alama alingile shili, ikiye navana venyi vavatongwelelele kufwa. Oloze Yehova atumine Mwanenyi kwiza nakukufwila mangana upwenga nakutokwa chakukayoya haya myaka.
Omu nautanga jino jivesi, shinganyeka omwo evwile Yehova hakumona Mwanenyi ali nakuyanda. Tangenu Yowano 19:1-7, 16-18, nakushimutwila hachihula chino:
-
Uno uli nakwivwa ngachilihi havyuma akulingila Yehova naYesu?
MUTU NAHASE KUHULISA NGWENYI: “Uno mutu umwe mwahasa kufwila ngachilihi vatu vosena?”
-
Uno naumukumbulula ngachilihi?
CHISHINA UNALINANGULA
Kufwa chaYesu chalingisa Yehova atukonekele jishili jetu nakutulingisa tupwenga nakutokwa chakukayoya haya myaka.
Kuhituluka
-
Mwomwo ika Yesu afwililile?
-
Uno kuyoya chaYesu chakukupuka chahano hamavu chapwile ngachilihi ndando yakulitombola yakusokola?
-
Uno kufwa chaYesu nachikukafwa ngachilihi?
WANA VYAVIVULU
Wana ovyo kuyoya chaYesu chakukupuka chahano hamavu vachivulukila ngwavo ndando yakusokola.
“Wana Ahanyine Yesu Wapwa Ngachilihi ‘Ndando Yakusokola Vavavulu’?” (Chihande chili ha jw.org/lue)
Wana vyuma twatela kulinga numba vakatusokole.
“Mujila Muka Yesu Alwila Vatu?” (Chihande chili ha jw.org/lue)
Kutala Yehova nahase kukonekela namutu nalingi shili yayinene tahi?
“Kukumbulula Vihula Vyakupandama kuMbimbiliya” (Chihande chamuKaposhi Kakutalila)
Wana omwo kulinangula handando yakusokola yaKulishitu chakafwile lunga uze anukilenga vyuma vyavipi amwene.
“Kangweshi Cheka Nakwazana muUlyanyiko” (Chihande chili ha jw.org/lue)
a Shili yalumbununa kulinga vyuma vyavipi. Kaha yalumbununa nawa kuhona kukupuka chize twaswana kuli Alama naEve.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
