Kutala wafwisaho lyehi mutu wazanga tahi? Halwola lwalukalu ngana, unahase kulihulisa ngwove: ‘Uno vyuma muka vyeji kusolokanga kuli mufu? Uno vatu twazanga vaze vafwa natukavamona cheka tahi?’ Muchilongesa chino nechi nachikavangizaho, naumona omwo Mbimbiliya yatuvendejeka hakukumbulula vihula kana.

1. Vyuma muka vyeji kusolokanga kuli mufu?

Yesu afwanyishile kufwa kukusavala tulo twatuvulu. Nge mutu nasavala tulo twatuvulu, keshi kutachikiza navyuma vili nakusolokako. Uno kufwa chalifwana ngachilihi nakusavala tulo? Mufu kevwa kukolako, kaha nawa keshi kuyanda chipwe kwivwa uliko. Mbimbiliya ngwayo, “Vafu kavatachikiza chuma numba chimweko.”—Tanga Muka-kwambulula 9:5.

2. Uno kutachikiza vyuma vyamuchano hali vafu nachitukafwa ngachilihi?

Vatu vavavulu veji kulizakaminanga havyuma vinahase kuvasolokela nge vanafu, nakwivwa woma vafu. Oloze vyuma yahanjika Mbimbiliya hakufwa vinahase kukuvendejeka. Yesu ambile ngwenyi: “Muchano naumilingisa kupwa vakulihehwa.” (Yowano 8:32) Mauka amwe akwitava anangula ngwawo, mutu atwama namwono uze weji kutwalangaho kuyoya nge nafu. Oloze Mbimbiliya kayanangula ngochoko. Shikaho kakweshi mutu eji kuyandanga nge nafuko. Kaha nawa vafu kaveshi kuhasa kutulinga mwamupiko, mwomwo kavatachikiza chuma numba chimweko. Shikaho katwatela kuvahananga mawana mangana tuvasuulwise chipwe kuvalombelangako kuli Kalungako.

Vatu vamwe veji kuhanjikanga ngwavo vanahase kuhanjika navafu. Olozenyi mutu keshi kuhasa kuhanjika namufuko. Ngana muze tunalinangula, vafu “kavatachikiza chuma numba chimweko.” Vaze veji kushinganyekanga ngwavo vali nakuhanjika navatu vazanga vaze vafwa, veji kuhanjikanga navandemone, vaze veji kulyonganga kupwa nge vatu vaze vafwa. Shikaho kutachikiza vyuma vyamuchano vyeji kusolokanga kuli mutu nge nafu, nachitukinga kuvandemone. Yehova atukanyisa kuhanjikanga navafu, mwomwo atachikiza ngwenyi kushimutwila navandemone nachitunehela ukalu.—Tanga Lushimbi lwamuchivali 18:10-12.

3. Tachikiza vyuma vyeji kusolokanga kuli mutu nge nafu

Vatu mukaye vafwelela vyuma vyakulisezaseza kutalisa kuvyuma vyeji kusolokanga kuli mutu nge nafu. Oloze vyuma vimwe vafwelela vatu vyapwa vyamakuli.

• Vyuma muka vafwelela vatu vamungalila yove kutalisa kuvafu?

 4. Kutachikiza vyuma vyamuchano hali vafu, cheji kutukafwanga

Kutachikiza vyuma vyamuchano vyeji kusolokanga kuli mutu nge nafu, chatukafwa tuhone kwivwa woma vafu. Tangenu Muka-kwambulula 9:10, nakushimutwila hachihula chino:

• Kutala vafu vanahase kutulinga mwamupi tahi?

Muchano wamuMbimbiliya weji kutukafwanga tulihende kumakuli akwamba ngwavo, twatela kuhananga mawana akusuulwisa vafu nakuvavumbika. Tangenu Isaya 8:19 naKusoloka 4:11, nakushimutwila hachihula chino:

• Washinganyeka ngwove Yehova eji kwivwanga ngachilihi hamutu uze eji kulifukulanga kuli mufu nakumulomba amukafwe?

5. Kutachikiza vyuma vyamuchano hali vafu cheji kutuvendejekanga

Vatu vavavulu vavanangula ngwavo nge mutu wavilinga vyavipi nafu, veji kumuzangamisanga mwomwo yashili alingile. Oloze chuma nachituvendejeka shina kutachikiza ngwetu, kakwatwama mutu veji kuzangamisanga nge nafuko, kuhakilako vene navaze valingilenga vyuma vyavipi chikuma. Tangenu Wavaka-Loma 6:7, nakushimutwila hachihula chino:

• Kachi nge Mbimbiliya yahanjika ngwayo ou nafu nasambe chipwe ngwetu nasokoka kushili yenyi, kutala washinganyeka ngwove mutu uze nafu vanahase kumuzangamisa mwomwo yashili alingile tahi?

Nge natutachikiza chikuma omwo apwa Yehova kaha natumona jino ngwetu, vafu kavavazangamisako, kaha nawa kunangula kana cheji kumwivwisanga kupihya. Tangenu Lushimbi lwamuchivali 32:4 naWaYowano 1, 4:8, nakushimutwila havihula vino:

• Kweseka navilinga vyamwaza vyaKalunga vize tunatange omu mujivesi, kutala nahase kuzangamisa vafu tahi?

• Uno kutachikiza vyuma vyamuchano vyeji kusolokanga kuli mutu nge nafu chinakuvendejeka tahi? Mwomwo ika?

 CHISHINA UNALINANGULA

Vafu kavatachikiza chuma numba chimweko. Kavayandako, kaha nawa kaveshi kuhasa kulinga mwamupi vavatonyiko.

Kuhituluka

• Vyuma muka vyeji kusolokanga kuli mufu?

• Uno kutachikiza vyuma vyamuchano hali vafu cheji kutukafwanga ngachilihi?

• Uno kutachikiza vyuma vyamuchano hali vafu cheji kutuvendejekanga ngachilihi?