CHILONGESA 30
Vatu Wazanga Vaze Vafwa Navakayoya Cheka
Kufwa cheji kunehanga ushona nakuhomba. Echi chikiko Mbimbiliya yavulukila kufwa ngwayo muka-kole. (Wavaka-Kolinde 1, 15:26) Chilongesa 27 chakunangwile ngwacho, Yehova mwakafumisako ou muka-kole. Jino chuma muka nachikasoloka kuli vaze vafwa lyehi? Muchilongesa chino, naulinangula lushiko lukwavo atushika Yehova lwakukasangula vatu vavavulu mangana vakayoye haya myaka. Kutala chuma kana nachikasoloka tahi? Uno navakavasangula vakayoyele mwilu nyi hano hamavu?
1. Uno Yehova ali nakusaka kukalinga ika kuli vatu twazanga vaze vafwa?
Yehova afwila kukasangula vafu. Yopa mutu wakushishika afwelelele ngwenyi numba nge nafu, Kalunga keshi kukamuvulyamako. Alwezele Kalunga ngwenyi: “Naukasanyika, kaha nangukakwitava [muFuka].”—Tanga Yopa 14:13-15.
2. Twatachikiza ngachilihi ngwetu vafu navakasanguka?
Omu Yesu apwile hano hamavu, Kalunga amuhanyine ngolo jakusangula vafu. Asangwile kanyike wapwevo wamyaka 12 namukweze walunga mwana tuliwe. (Mako 5:41, 42; Luka 7:12-15) Kutwala muze, Lazalu sepa lyaYesu nawa afwile. Yesu asangwile Lazalu numba tuhu mwahichile makumbi awana kufuma haze afwile. Alombele kuli Kalunga, kaha ahanjikile ngwenyi: “Ove Lazalu, lovokamo!” Kaha “mutu uze apwile wakufwa alovokelemo” wamutonyi. (Yowano 11:43, 44) Achishinganyeke ocho kuwaha vevwile vausoko waLazalu namasepa jenyi.
3. Chuma muka nachikasoloka kuli vatu wazanga vaze vafwa?
Mbimbiliya yatushika ngwayo: “Nakukapwa kusanguka.” (Vilinga 24:15) Vatu vaze asangwile Yesu omu apwile hano hamavu kavayile mwiluko. (Yowano 3:13) Vawahililile hakuvasangula mangana vayoyele hano hamavu. Chochimwe nawa, kalinwomu Yesu asangule mayongomena avatu mangana vakapwe nakutokwa chakuyoyela mupalachise hano hamavu. Ambile ngwenyi Kalunga mwakasangula vosena vaze ali nakwanuka, numba tuhu etu tunavavulyama.—Yowano 5:28, 29.
LINANGULE VYAKUJIMINYINA
Wana unjiho wamuMbimbiliya uze wasolola nge vafu navakavasangula. Wana omwo kusanguka chinahase kukuvendejeka nakukulingisa utalilile vyuma vyamwaza.
4. Unjiho wakusolola nge Yesu mwakasangula vafu
Linangule vyavivulu havyuma vize Yesu alingile kuli sepa lyenyi Lazalu. Tangenu Yowano 11:14, 38-44, nakushimutwila havihula vino:
-
Twatachikiza ngachilihi ngwetu chikupu vene Lazalu afwile?—Tala vesi 39.
-
Nge Lazalu ayile mwilu, kutala washinganyeka ngwove kachi Yesu amukindulwishile hano hamavu tahi?
5. Vatu vavavulu navakavasangula
Tangenu Samu 37:29, nakushimutwila hachihula chino:
-
Uno vatu vavavulu vaze navakasanguka navakatwama kulihi?
Yesu mwakasangula vaka-kulemesa Yehova navatu veka vavavulu. Tangenu Vilinga 24:15, nakushimutwila hachihula chino:
-
Mutu muka uli nakufwila kukamona nasanguka?
Shinganyeka hachuma chino: Nachikapwa chachashi kuli Yesu kusangula vafu ngana muze chapwa chachashi chisemi kuhindula mwanenyi uze nasavala tulo
6. Kusanguka chinahase kukuvendejeka nakukulingisa utalilile vyuma vyamwaza
Mujimbu wamuMbimbiliya wamwana Yailu unavendejekanga nakukolezeza vatu vavavulu vaze vanalishononga. Tangenu ou mujimbu wamuchano hali Luka 8:40-42, 49-56.
Shimbu kanda Yesu asangule mwana Yailu, alwezele Yailu ngwenyi: “Kanda nawivwa womako, ijiva kufwelela kaha.” (Tala vesi 50.) Uno kufwelela ngwove nakukapwa kusanguka chinahase kukukafwa ngachilihi . . .
-
nge unafwisa?
-
nge kuyoya chove chili muponde?
-
Uno kutalilila kusanguka chavafu chavendejekele ngachilihi visemi jaPhelicity nakuvakolezeza?
VATU VAMWE NGWAVO: “Chachikalu kufwelela ngwetu vafu navakasanguka.”
-
Ove unashinganyeka muka?
-
Chisoneka muka unahase kuzachisa chize chasolola nge vafu navakasanguka?
CHISHINA UNALINANGULA
Mbimbiliya yatushika ngwayo, vatu vavavulu vaze vafwa navakasanguka. Yehova asaka vakayoye cheka, kaha ahana Yesu ngolo jakukavasangula.
Kuhituluka
-
Twatachikiza ngachilihi ngwetu Yehova naYesu vafwila kukasangula vafu?
-
Uno vatu vavavulu vaze navakasanguka navakatwamanga mwilu nyi hano hamavu? Mwomwo ika?
-
Chuma muka chakukunyula witavile ngwove vatu wazanga vaze vafwa vanahase kukayoya?
WANA VYAVIVULU
Wana vyuma vize navikukafwa nge uli nakulishona.
Kutala Mbimbiliya yinahase kukafwa mutu uze ali nakulishona tahi?
Vyuma muka navikafwa vanyike nge vanafwisa kausoko chipwe sepa?
Kutala kuliko vatu vamwe vaze navakasanguka nakuya mwilu tahi? Vatu muka vaze kaveshi kukasangukako?
“Uno Kusanguka Chapwa Chika?” (Chihande chili ha jw.org/lue)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
