CHILONGESA 31
Wangana waKalunga Chuma Muka?
Chihande chachinene muMbimbiliya shina chaWangana waKalunga. Yehova mwakazachisa Wangana kana mangana akatesemo vyuma ajinyine kulinga hano hamavu. Uno ou Wangana wapwa uka? Tunatachikiza ngachilihi ngwetu uli nakuyula? Vyuma muka unatesamo lyehi? Kaha vyuma muka naukalinga kulutwe? Vihula kana navavikumbulula muchilongesa chino navilongesa vivali navikavangizaho.
1. Wangana waKalunga chuma muka, kaha iya apwa Mwangana wawo?
Wangana kana wapwa hifulumende yize ahakako Yehova Kalunga. Mwangana wawo apwa Yesu Kulishitu. Atwama mwilu kaha ali nakuyula. (Mateu 4:17; Yowano 18:36) Mbimbiliya yahanjika hali Yesu ngwayo: “Mwakapwanga Mwangana . . . haya myaka yosena.” (Luka 1:32, 33) Yesu mwakayula vatu vosena hano hamavu hakupwa ikiye Mwangana waWangana waKalunga.
2. Veya vapwa vaka-kuyula hamwe naYesu?
Yesu kayula ukawenyiko. Vatu vakufuma “kumiyachi yosena, nakumalimi osena, nakuvatu veka naveka, nakumafuchi osena . . . navakapwanga vamyangana nakuyula mavu.” (Kusoloka 5:9, 10) Vatu vangahi navakayula naKulishitu? Kufuma vene halwola luze Yesu apwile hano hamavu, vaka-Kulishitu vavavulu vanapunga vaka-kumukavangiza. Oloze vatu 144,000 kaha vakiko navakaya mwilu nakuyula naYesu. (Tanga Kusoloka 14:1-4.) Kaha vaka-Kulishitu veka vosena hano hamavu navakavayula kuWangana kana.—Samu 37:29.
3. Uno Wangana waKalunga wahambakana ngachilihi jifulumende javatu?
Numba tuhu vaka-kuyula vahano hamavu navalinga vyuma vyamwaza, oloze kaveshi nangolo jakulinga vyuma vyosena vanasakeko. Vanahase kuvashisa kuvatu vaze kaveshi kupwa namuchima wakuyula vatu mujila yamwazako. Oloze Yesu uze apwa Muka-kuyula Wangana waKalunga kaveshi kukamushisa kuli mutu wekako. Kalunga ahakako “wangana uze kaveshi kukanongesako.” (Ndanyele 2:44) Yesu mwakayula hamavu hosena, kaha nawa keshi kukapwa nakahandununako. Apwa wazangi, nalikoji, nachiyulo, kaha nawa mwakanangulanga vatu vakamulondezeze hakupwa nazangi, nalikoji, nachiyulo.—Tanga Isaya 11:9.
LINANGULE VYAKUJIMINYINA
Wana ovyo vyalingisa Wangana waKalunga upwenga wamwaza kuhambakana jifulumende javatu.
4. Wangana waKalunga naukayula hamavu
Yesu Kulishitu atwama nangolo jakuyula jakuhambakana kala vaka-kuyula vanapungako. Tangenu Mateu 28:18, nakushimutwila hachihula chino:
-
Uno wata atwama nawo Yesu wahambakana ngachilihi wavaka-kuyula vahano hamavu?
Jifulumende javatu jeji kulishisanga, kaha nawa kajayula kaye kosenako. Nyi ngachilihi Wangana waKalunga? Tangenu Ndanyele 7:14, nakushimutwila havihula vino:
-
Uno uli nakwivwa ngachilihi hakutachikiza ngwove Wangana waKalunga “kaveshi kukaunongesako”?
-
Mwomwo ika nachikapwila chamwaza Wangana kana kukayula hamavu hosena?
5. Jifulumende javatu vatela kujifumisako
Mwomwo ika Wangana waKalunga watela kushisa jifulumende javatu? Talenu VINDIYO, nakushimutwila hachihula chinakavangizaho.
-
Uno chiyulo chavatu chinanehe ukalu muka?
Tangenu Muka-kwambulula 8:9, nakushimutwila havihula vino:
-
Unashinganyeka ngwove chakutamo Wangana waKalunga kushisa jifulumende javatu tahi? Mwomwo ika?
6. Wangana waKalunga watwama navaka-kuyula vaze vatutachikiza kanawa
Hakuwana nge Mwangana wetu Yesu ayoyelaho lyehi hano hamavu, ngocho nahase “kutwivwila keke mukuhehela chetu.” (WavaHepeleu 4:15) Malunga namapwevo vakushishika vakuheta ku 144,000 vaze navakayula naYesu, vavasakula kuli Yehova kufuma “kumiyachi yosena, nakumalimi osena, nakuvatu veka naveka, nakumafuchi osena.”—Kusoloka 5:9.
-
Uno kutachikiza ngwove Yesu navaze mwakayula navo vatachikiza ukalu tuli nakumona nomwo tweji kwivwanga, chinakuvendejeka tahi? Mwomwo ika?
Yehova asakula malunga namapwevo vakufuma kuvisemwa vyosena mangana vakayule hamwe naYesu
7. Wangana waKalunga watwama najishimbi jamwaza
Jifulumende jeji kuhakangako jishimbi jize jatela kukafwa vatu nakuvakinga. NaWangana waKalunga nawa watwama najishimbi jize vatela kukavangiza vatu jawo. Tangenu Wavaka-Kolinde 1, 6:9-11, nakushimutwila havihula vino:
-
Washinganyeka ngwove kaye nakakapwa ngachilihi omu vatu vosena navakakavangizanga jishimbi jaKalunga? a
-
Kutala washinganyeka ngwove chakutamo Yehova kusaka ngwenyi, vatu vaze navakayula kuWangana wenyi vakavangizenga jishimbi kana tahi? Mwomwo ika?
-
Watachikiza ngachilihi ngwove vatu vaze kaveshi nakukavangiza jishimbi kanako vanahase kwalumuka?—Tala vesi 11.
Jifulumende jahakako jishimbi mangana jikinge vatu nakuvakafwa. NaWangana waKalunga nawa watwama najishimbi jamwaza chikuma jakukinga vatu nakuvakafwa
VATU VAMWE NGWAVO: “Wangana waKalunga watwama mumuchima wamutu.”
-
Naukafwa ngachilihi vatu kana?
CHISHINA UNALINANGULA
Wangana waKalunga hifulumende yamwilu yize nayikayula hamavu hosena.
Kuhituluka
-
Veya vapwa vaka-kuyula muWangana waKalunga?
-
Wangana waKalunga walihandununa ngachilihi najifulumende javatu?
-
Vyuma muka vimwe vize asaka Yehova kuli vatu vaze navakayula kuWangana wenyi?
WANA VYAVIVULU
Wana vyuma anangwile Yesu kutalisa kuchihela nakukapwila Wangana waKalunga.
“Uno Wangana waKalunga Watwama muMuchima Wove Tahi?” (Chihande chili ha jw.org/lue)
Mwomwo ika Vinjiho jaYehova vamwena ngwavo chapwa chachilemu chikuma kupwa vakushishika kuWangana waKalunga kuhambakana kupwa vakushishika kuviyulo vyavatu?
Wana vyuma yahanjika Mbimbiliya hali vaze 144,000 vaze asakula Yehova mangana vakayule hamwe naYesu.
Vyuma muka vyakunywile pwevo uze apwilenga mukamenga amone ngwenyi Kalunga kaha ikiye mwakawahisa vyuma mukaye?
“Ngwatachikiza Jino Owo Mwakafumisako Chiyulo Chakuhenga” (Tonenu!, November 2011)
a Eji jishimbi jimwe natukajishimutwila muChihanda 3.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
