CHILONGESA 32
Wangana waKalunga Uli Nakuyula
Wangana waKalunga waputukile kuyula mwilu, mu 1914. Mumwaka kana mukiko aputukile namakumbi akukuminyina achiyulo chavatu. Uno twatachikiza ngachilihi ngocho? Tushimutwile haupolofweto wamuMbimbiliya, navyuma vinasolokanga mukaye, navilinga vanapunga navyo vatu kufuma vene mu 1914.
1. Uno upolofweto wamuMbimbiliya wasolola ika?
Mukanda waNdanyele wasolwele ngwawo, Wangana waKalunga naukaputuka kuyula hakukuma chalwola vavuluka ngwavo “jitando 7.” (Ndanyele 4:16, 17) Omu mwahichile myaka yayivulu, Yesu avulukile lwola kana ngwenyi lunapu “lwola vatongola lwavaka-mafuchi eka,” kaha ahanjikile nawa ngwenyi lwola kana kanda luchikume. (Luka 21:24) Omu natulinangula natuwana nge jize jitando 7 jakumine mu 1914.
2. Vyuma muka vinasolokanga mukaye, kaha vilinga muka vanapunga navyo vatu kufuma mu 1914?
Tumbaji vahulishile Yesu ngwavo: “Chinjikizo muka chakukatachikijilaho kupwako chove nachikukulwishi chakatwamino kamyaka yino?” (Mateu 24:3) Yesu avakumbulwile hakuvuluka vyuma navikasoloka omu mwakaputuka kuyula mwilu, mwaMwangana waWangana waKalunga. Vyuma vimwe avulukile shina jijita, nakukeha chavyakulya namindenda. (Tanga Mateu 24:7.) Mbimbiliya nawa yahanjikilile chimweza ngwayo “hamakumbi akukuminyina” vilinga vyavatu navikalingisa chiyoyelo chavatu chikapwe ‘chachikalu.’ (WaChimoteu 2, 3:1-5) Vyuma kana vinasolokanga chikumanyi kufuma vene mu 1914.
3. Mwomwo ika vyuma vili nakupihilako chikuma mukaye, kufuma vene haze waputukile kuyula Wangana waKalunga?
Omu mwahichile katando kakandende kufuma haze Yesu vamuswanyishile kupwa Mwangana waWangana waKalunga, alwile jita naSatana navandemone mwilu. Satana vamufungulwile. Mbimbiliya yamba ngwayo, “vamumbilile hamavu, navangelo jenyi nawa vavambilile naikiye hamwe.” (Kusoloka 12:9, 10, 12) Satana ali namatoto amanene, mwomwo atachikiza ngwenyi navakamunongesa. Ikiye alingisa vatu mukaye kosena vayande nakwivwa kukola kumuchima. Echi chatukafwa tutachikize ovyo vyuma vili nakupihilako chikuma mukaye. Oloze Wangana waKalunga naukafumisako ukalu wosena ou.
LINANGULE VYAKUJIMINYINA
Wana vyuma vyatukafwa tutachikize ngwetu Wangana waKalunga waputukile kuyula mu 1914, nakuwaha chakutachikiza vyuma kana.
4. Upolofweto wamuMbimbiliya wenyikilile kumwaka wa 1914
Kalunga amwenesele Nevukataneza Mwangana waMbavilone yakushikulu muchilota vyuma navikasoloka kulutwe. Chize chilota alotele mwangana naulumbunwiso ahanjikile Ndanyele vyasolola nge chatalikishile kuchiyulo chaNevukataneza nakuWangana waKalunga.—Tangenu Ndanyele 4:17. a
Tangenu Ndanyele 4:20-26, nakuzachisa chati hakukumbulula vihula vino:
-
(A) Vyuma muka amwene Nevukataneza muchilota chenyi?—Tala vesi 20 na 21.
-
(B) Vyuma muka vambile ngwavo navikasoloka kuli uze mutondo?—Tala vesi 23.
-
(C) Vyuma muka vambile ngwavo navikasoloka omu najikakuma jize “jitando 7”?—Tala vesi 26.
Uno Chilota chaMutondo Chalikwatasanyina Halihi naWangana waKalunga?
UPOLOFWETO (Ndanyele 4:20-36)
Chiyulo
(A) Mutondo waunene
Kwimika chiyulo
(B) “Pakulenu ou mutondo,” palanga nomu “namuhita jitando 7”
Kukindulwisa chiyulo
(C) “Wangana wove navakakukindulwishilawo”
Hakutesamo chatete chaupolofweto kana . . .
-
(D) Uze mutondo wemanyinyineko iya?—Tala vesi 22.
-
(E) Uno chiyulo chenyi vachimikile ngachilihi?—Tangenu Ndanyele 4:29-33.
-
(F) Vyuma muka vyasolokele kuli Nevukataneza omu jakumine jize “jitando 7”?—Tangenu Ndanyele 4:34-36.
KUTESAMO CHATETE
Chiyulo
(D) Nevukataneza, Mwangana waMbavilone
Kwimika chiyulo
(E) Hanyima ya 606 B.C.E., Nevukataneza azalukile, kaha kayulileko hamyaka 7
Kukindulwisa chiyulo
(F) Kuzaluka chaNevukataneza chakumine, kaha aputukile kuyula cheka
Hakutesamo chamuchivali chaupolofweto kana . . .
-
(G) Uze mutondo wemanyinyineko veya?—Tangenu Mijimbu 1, 29:23.
-
(H) Uno chiyulo chavo vachimikile ngachilihi? Twatachikiza ngachilihi ngwetu chiyulo kana vachimikile lika nahalwola apwile Yesu hano hamavu?—Tangenu Luka 21:24.
-
(I) Lwola muka vakindulwishile echi chiyulo, kaha kumwe kulihi vachikindulwishilile?
KUTESAMO CHAMUCHIVALI
Chiyulo
(G) Vamyangana javaIsalele vaze vemanyinyineko chiyulo chaKalunga
Kwimika chiyulo
(H) Yelusalema vayinongesele, nakwimika chiyulo chavamyangana javaIsalele hamyaka 2,520
Kukindulwisa chiyulo
(I) Yesu aputukile kuyula mwilu mwaMwangana waWangana waKalunga
Uno jitando 7 japwa myaka yingahi?
Visoneka vimwe vyamuMbimbiliya vyeji kutukafwanga twivwishise visoneka vikwavo. Chakutalilaho, mukanda waKusoloka wamba ngwawo jitando jitatu nachimbwa jemanyinako makumbi 1,260. (Kusoloka 12:6, 14) Jitando jitatu nachimbwa kujifutula kavali najipwa jitando 7, chipwe ngwetu makumbi 2,520. Kaha nawa lwola lumwe, muMbimbiliya likumbi lyeji kwimanyinangako mwaka. (Ezekele 4:6) Omu mukiko japwa najitando 7 vavuluka mumukanda waNdanyele. Jemanyinako myaka 2,520.
5. Vyuma mukaye vinalumukanga kufuma vene mu 1914
Yesu avulukile vyuma navikasoloka mukaye omu mwakapwa Mwangana. Tangenu Luka 21:9-11, nakushimutwila hachihula chino:
-
Hali evi vyuma vanavuluka, vimwe vilihi uli nakumona chipwe uli nakwivwa?
Kaposetolo Paulu avulukile vilinga navakapwa navyo vatu hamakumbi akukuminyina achiyulo chavatu. Tangenu WaChimoteu 2, 3:1-5, nakushimutwila hachihula chino:
-
Havilinga kanevi, vimwe vilihi uli nakumona kuvatu makumbi ano?
6. Chiyulo chaWangana waKalunga chatela kutukunyula
Tangenu Mateu 24:3, 14, nakushimutwila havihula vino:
-
Mulimo muka waulemu vali nakuzata vatu uze wasolola nge Wangana waKalunga uli nakuyula oholyapwa?
-
Vyuma muka watela kulinga mangana uzate ou mulimo?
Wangana waKalunga uli nakuyula, kaha kalinwomu uputuke kuyula hamavu hosena. Tangenu WavaHepeleu 10:24, 25, nakushimutwila hachihula chino:
-
Vyuma muka twatela kulinga mutu himutu omu tuli nakumona ngwetu “likumbi kana linapandama kwakamwihi”?
Chuma muka naulinga nge unalinangula vyuma vize unamono ngwove navikafwa vakwenu nakuvayovola?
MUTU NAHASE KUHULISA NGWENYI: “Mwomwo ika Vinjiho jaYehova vazangila kuhanjika hamwaka wa 1914?”
-
Naumukumbulula ngachilihi?
CHISHINA UNALINANGULA
Upolofweto wamuMbimbiliya navyuma vili mukaye, vyasolola nge Wangana waKalunga uli nakuyula. Tweji kusololanga ngwetu twafwelela chuma kana hakuchilweza vakwetu nahakupwanga kukukunguluka.
Kuhituluka
-
Ika yasolokele hakukuma chajitando 7 chize vahanjikilile chimweza mumukanda waNdanyele?
-
Vyuma muka vyakukunyula witavile ngwove Wangana waKalunga waputukile kuyula mu 1914?
-
Nausolola ngachilihi ngwove chiyulo chaWangana waKalunga chinakukunyula?
WANA VYAVIVULU
Wana vyuma vanahanjikanga vaka-kulinangula vyakushikulu navatu veka havyuma vinalumukanga mukaye kufuma vene mu 1914.
“Omu Vilinga vyaVatu Vyaputukile Kupihya Chikuma” (Tonenu!, April 2007)
Tanga wivwenga omwo upolofweto wahali Mateu 24:14 walumwine kuyoya chalunga umwe.
“Ngwazangile Kwasa Ngunja Vavuluka Ngwavo Baseball” (Kaposhi Kakutalila Na. 3 2017)
Twatachikiza ngachilihi ngwetu upolofweto vasoneka hali Ndanyele kapetulu 4 watalisa kuWangana waKalunga?
“Uno Wangana waKalunga Waputukile Kuyula muMwaka Muka? (Chihanda 1)” (Chihande chamuKaposhi Kakutalila)
Unjiho muka wasolola nge “jitando 7” vavuluka mumukanda waNdanyele kapetulu 4 jakumine mu 1914?
“Uno Wangana waKalunga Waputukile Kuyula muMwaka Muka? (Chihanda 2)” (Chihande chamuKaposhi Kakutalila)
a Tala vihande vivali vyamakumishilo vili muchilongesa chino hachihanda chakwamba ngwavo Wana Vyavivulu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
