CHILONGESA 34
Natusolola Ngachilihi Ngwetu Twazanga Yehova?
Kutala unapandama chikuma kuli Yehova kuhambakana halwola luze waputukile kulinangula Mbimbiliya tahi? Uno uli nakusaka kutwalaho kuzamisa usepa wove naikiye tahi? Nge mukiko, kaha ijiva ngwove nge nauzanga chikuma Yehova, kaha naikiye mwakuzanga chikuma nakukuzakama. Nausolola ngachilihi ngwove wazanga Yehova?
1. Natusolola ngachilihi ngwetu twazanga Yehova?
Tweji kusololanga ngwetu twazanga Yehova hakumwononoka. (Tanga WaYowano 1, 5:3.) Yehova kashinjila vatu mangana vamwononokeko. Oloze atuhana lisesa lyakusakula kumwononoka chipwe chiku. Mwomwo ika? Mwomwo Yehova asaka ‘tumwononoke namichima yetu.’ (Wavaka-Loma 6:17) Echi chalumbununa nge asaka umwononoke mwomwo yakumuzanga keshi nge nakulishinjilako. Chihanda 3 na 4 chamumukanda uno nachikukafwa umone omwo unahase kuzanga Yehova hakulinga vyuma vize navimwivwisa kuwaha nakulihenda kuvyuma vize navimwivwisa kupihya.
2. Mwomwo ika chinahase kupwa chachikalu kuzanga Yehova?
Mbimbiliya ngwayo: “Muka-kwoloka eji kumonanga ukalu wauvulu.” (Samu 34:19) Tuvosena katwakupukako. Tunahase kupwa nawa naukalu wakuhona jimbongo, nakutumona ulumbi naukalu weka. Nge tuli nakumona ukalu, chinahase kupwa chachikalu kulinga vyuma vize asaka Yehova, mwomwo halwola kana chapwa chachashi kulinga vyuma vyakuhenga. Oloze nge naulinga vyuma vize asaka Yehova, kaha nausolola ngwove wamuzanga chikuma kuhambakana kala chuma. Nausolola nawa ngwove wapwa uwakushishika kuli ikiye, kaha ikiye nawa mwapwa wakushishika kuli yove. Keshi kukakusezako.—Tanga Samu 4:3.
LINANGULE VYAKUJIMINYINA
Wana ovyo Yehova asakila umwononokenga navyuma navikukafwa utwaleho lika kupwa uwakushishika kuli ikiye.
3. Chihande chize chakwata hali yove
Kweseka namukanda wamuMbimbiliya waYopa, Satana avangijikilile Yopa navatu vosena vaze vasaka kuzachila Yehova. Tangenu Yopa 1:1, 6–2:10, nakushimutwila havihula vino:
-
Vyuma muka ahanjikile Satana ngwenyi vyalingishile Yopa ononoke Yehova?—Tala Yopa 1:9-11.
-
Vyuma muka vize Satana avangijikila vatu vosena kuhakilako nayove?—Tala Yopa 2:4.
Tangenu Yopa 27:5b, nakushimutwila hachihula chino:
-
Uno Yopa asolwele ngachilihi ngwenyi chikupu vene azangile Yehova?
Yopa asolwele ngwenyi azanga Yehova hakutwalaho lika kupwa wakushishika kuli ikiye
Tweji kusololanga ngwetu twazanga Yehova hakutwalaho lika kupwa tuvakushishika kuli ikiye
4. Ivwisanga Yehova kuwaha
Tangenu Vishimo 27:11, nakushimutwila havihula vino:
-
Uno Yehova eji kwivwanga ngachilihi nge naupwa namangana nakumwononoka? Mwomwo ika?
5. Unahase kupwa wakushishika kuli Yehova
Kuzanga Yehova cheji kutukunyulanga mangana tukafwe vakwetu vamutachikize. Kupwa vakushishika kuli ikiye cheji kutulingisanga tufwile kukafwa vakwetu nahalwola nachitukaluhwila. Talenu VINDIYO, nakushimutwila havihula vino:
-
Uno cheji kukukaluhwilanga kulwezako vakwenu hali Yehova tahi?
-
Kweseka navindiyo unatale, vyuma muka vyakafwile Grayson ahone jino kwivwa woma?
Chapwa chachashi kupwa vakushishika kuli Yehova nge natuzanga vyuma azanga nakuhunga vyuma ahunga. Tangenu Samu 97:10, nakushimutwila havihula vino:
-
Kweseka navyuma unalinangula, vyuma muka vimwe vize azanga Yehova? Kaha vyuma muka vimwe vize ahunga?
-
Ika nayikukafwa uzange vyuma vyamwaza nakuhunga vyuma vyavipi?
6. Kwononoka Yehova cheji kutukafwanga
Chapwa chamwaza kwononoka Yehova. Tangenu Isaya 48:17, 18, nakushimutwila havihula vino:
-
Kutala washinganyeka ngwove chakutamo kufwelela ngwetu Yehova atachikiza vyuma vize navitukafwa mukuyoya tahi? Mwomwo ika?
-
Uno kulinangula Mbimbiliya nakutachikiza Kalunga wamuchano Yehova, chinakukafwe ngachilihi?
VATU VAMWE NGWAVO: “Kangweshi kuhasa kwivwisa Kalunga kuwahako.”
-
Chisoneka muka unahase kuzachisa chize nachisolola nge vyuma natulinga vinahase kwivwisa Yehova kuwaha chipwe kupihya?
CHISHINA UNALINANGULA
Unahase kusolola ngwove wazanga Yehova hakumwononoka nakutwalaho kupwa wakushishika kuli ikiye chamokomoko naukalu.
Kuhituluka
-
Uno vyuma ahichilemo Yopa vinakunangula ika?
-
Nausolola ngachilihi ngwove wazanga Yehova?
-
Vyuma muka navikukafwa utwaleho lika kupwa wakushishika kuli Yehova?
WANA VYAVIVULU
Wana vyuma navikukafwa upwenga wakushishika kuli Yehova nakuchikungulwilo.
“Kuli Mutu Wakushishika Weji Kupwanga Uwakushishika” (16:49)
Linangule vyavivulu havyuma vize Satana eji kuvangijikilanga vatu.
“Yopa Mwalama Kulonga Chenyi” (The Bible—What Is Its Message? chihanda 6)
Wana omwo navanyike nawa vanahase kusolola ngwavo vazanga Yehova.
Uno mukweze nahase kutwalaho ngachilihi kupwa wakushishika kuli Kalunga numba tuhu vakwavo vali nakumushinyinyika alinge vyuma vyavipi?
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
