CHILONGESA 35
Vyuma Muka Navikukafwa Usakulenga Kanawa Vyakulinga?
Tuvosena tweji kusakulanga vyakulinga. Vyuma natusakula kulinga vinahase kutukafwa chipwe chiku. Kaha nawa vinahase kutulingisa tupwenga nausepa wakukola naYehova chipwe chiku. Chakutalilaho, tunahase kusakula kwakutwama, namwakuwanyina jimbongo, chipwe kusakula kumbata nakusomboka. Nge natusakulanga kanawa vyakulinga, kaha natupwa vakuwahilila nakwivwisa nawa Yehova kuwaha.
1. Uno Mbimbiliya nayikukafwa ngachilihi usakulenga kanawa vyakulinga?
Shimbu kanda usakule kulinga chuma, lomba Yehova akukafwe nakukekesa nawa Mbimbiliya umone omwo amona chuma kana. (Tanga Vishimo 2:3-6.) Yehova atuhana jishimbi jize jahanjika hatoma havihande vimwe. Shikaho nge nausakula kwononoka jishimbi kana, kaha naulinga kanawa.
Nyi ngachilihi nge kakweshi lushimbi lwakukulweza hatoma vyuma watela kulingako? Kawatela kulizakaminako, Yehova mwakutwaminyina ‘mujila yize watela kuya.’ (Isaya 48:17) Uno mwakutwaminyina ngachilihi? Kunahase kupwa jindongi jimwe jize najikukafwa. Jindongi jamuMbimbiliya japwa muchano uvene uze wasolola mwaya vishinganyeka vyaKalunga nomwo eji kwivwanga. Kakavulu tweji kutachikizanga omwo eji kwivwanga Kalunga nge natutanga mujimbu wamuMbimbiliya. Kutachikiza omwo eji kwivwanga Yehova nachitukafwa tusakule kulinga vyuma vize navimwivwisa kuwaha.
2. Vyuma muka watela kushinganyekaho shimbu kanda usakule vyakulinga?
Mbimbiliya ngwayo: “Mutu wakuzangama eji kuhehwojolanga jijila jenyi josena.” (Vishimo 14:15) Echi chalumbununa nge shimbu kanda tusakule chuma, twatela kuvangila kutwama hamavu nakushinganyekaho. Omu naushinganyeka hachuma kana, lihulise ngwove: ‘Uno jindongi muka jamuMbimbiliya jize ngwatela kuzachisa? Uno nangwivwa ngachilihi nge nanguchilinga? Uno chuma nangusakula kulinga nachihukanyisa vakwetu tahi? Chachilemunyi, kutala nachivwisa Yehova kuwaha tahi?’—Lushimbi lwamuchivali 32:29.
Yehova kaha ikiye atela kutulweza vyuma twatela kulinga navize katwatela kulingako. Shikaho, nge natutachikiza kanawa jishimbi jenyi najindongi jenyi nakufwila kujikavangiza, kaha natunangula kanawa chivezu chetu. Chivezu chapwa chuma chize cheji kutukafwanga tutachikize vyuma vyakwoloka nevi vyakuhenga. (Wavaka-Loma 2:14, 15) Chivezu chakunangula kanawa, nachitukafwa tusakulenga kanawa vyakulinga.
LINANGULE VYAKUJIMINYINA
Wana omwo jindongi jamuMbimbiliya nachivezu chetu vinahase kutukafwa tusakulenga kanawa vyakulinga.
3. Pendaminanga haMbimbiliya
Uno jindongi jamuMbimbiliya najitukafwa ngachilihi hakusakula vyakulinga? Talenu VINDIYO, nakushimutwila havihula vinakavangizaho.
-
Wana muka wamwaza atuhana Yehova?
-
Mwomwo ika Yehova atuhanyina lisesa lyakulisakwila vyakulinga?
-
Chuma muka atuhana chitukafwe tuzachise kanawa lisesa lyakulisakwila vyakulinga?
Hakusaka kumona chakutalilaho chimwe chalundongi lwamuMbimbiliya, tangenu Wavaka-Efwesu 5:15, 16. Kufumaho, shimutwilenu ‘mwakuzachishila kanawa lwola’ mangana . . .
-
utangenga Mbimbiliya lwola lwosena.
-
upwengaupwevo wambwende, chipwe ulunga wambwende, chipwe uchisemi wambwende, chipwe umwana wambwende.
-
upwenganga kukukunguluka lwola lwosena.
4. Nangula chivezu chove chikukafwe kusakulanga kanawa vyakulinga
Chapwa chachashi kusakula chuma nge kuli lushimbi lwamuMbimbiliya luze lwahanjika hatoma hachuma kana. Nyi ngachilihi nge kakweshi lushimbi lwahanjika hatomako? Talenu VINDIYO, nakushimutwila hachihula chinakavangizaho.
-
Vyuma muka alingile ou ndumbwetu mangana anangule chivezu chenyi nakulinga chuma chize chevwishile Yehova kuwaha?
Mwomwo ika katwatela kulweza vakwetu vatusakwile vyuma vize twatelanga kulisakwila etu vaveneko? Tangenu WavaHepeleu 5:14, nakushimutwila havihula vino:
-
Numba tuhu chapwa chachashi kulweza vakwetu vatusakwile vyakulinga, uno kulisakwila etu vavene nachitukafwa tulinge ika?
-
Vinoma muka twatwama navyo vize navikukafwa unangule chivezu chove nakusakulanga kanawa vyakulinga?
Chivezu cheji kututwaminyinanga mukuyoya, ngana muze mapu yeji kutukafwanga tutachikize okwo tuli nakuya
5. Vumbikanga vivezu vyavakwenu
Hakuwana nge etu vatu twalihandununa, tweji kusakulanga nawa vyuma vyakulihandununa. Uno natusolola ngachilihi ngwetu twavumbika vivezu vyavakwetu? Tushimutwile havyakutalilaho vivali:
Chakutalilaho 1: Ndumbwetu wapwevo uze azanga chikuma kulilenga kumeso nanungulukila kuchihela cheka kuze vandumbwetu vamapwevo kavasuuluka najila eji kulilengelangamoko.
Tangenu Wavaka-Loma 15:1 naWavaka-Kolinde 1, 10:23, 24, nakushimutwila havihula vino:
-
Kweseka neji jivesi, chuma muka nahase kusakula kulinga ou ndumbwetu? Naulinga ngachilihi nge mutu uli nenyi, chivezu chenyi chamukanyisa kulinga chuma chize chivezu chove chakwitavisa kulinga?
Chakutalilaho 2: Ndumbwetu walunga atachikiza ngwenyi Mbimbiliya yetavisa kunwako tuwala twatundende, oloze ikiye asakula kulihenda kukunwa numba twatundende. Vanamusanyika kuchilika, kaha mwamona vandumbwetu vali nakunwa wala.
Tangenu Muka-kwambulula 7:16 naWavaka-Loma 14:1, 10, nakushimutwila havihula vino:
-
Kweseka neji jivesi, chuma muka nahase kusakula kulinga ou ndumbwetu? Naulinga ngachilihi nge mutu uli nenyi chivezu chenyi chamwitavisa kulinga chuma chize chivezu chove chakukanyisa kulinga?
Vyuma muka navikukafwa usakulenga kanawa vyakulinga?
1. Lomba Yehova akukafwe usakule kanawa vyakulinga.—WaYakova 1:5.
2. Hehwojola muMbimbiliya namumikanda yize yahanjika haMbimbiliya mangana uwane jindongi jize najikukafwa. Unahase nawa kuhulisa muka-Kulishitu wakuhya kushipilitu.
3. Shinganyeka havyuma navifumamo. Uno vyuma nausakula naviyanjisa chivezu chove navivezu vyavakwenu tahi, nyi chiku?
VATU VAMWE NGWAVO: “Nguli nalisesa lyakulinga vyosena ovyo ngunasake. Kangweshi kuzakama vishinganyeka vyavakwetuko.”
-
Mwomwo ika twatela kuzakamina omwo navevwa vakwetu, nomwo mwevwa Kalunga havyuma natusakula?
CHISHINA UNALINANGULA
Vyuma navitukafwa tusakule kanawa vyakulinga shina kutachikiza omwo Yehova eji kwivwanga hachuma kana, nakumona nawa numba nge chuma kana nachikafwa vakwetu nyi nachivevwisa kupihya.
Kuhituluka
-
Vyuma muka navikukafwa usakule kulinga vyuma vize navivwisa Yehova kuwaha?
-
Nauhasa kunangula ngachilihi chivezu chove?
-
Nausolola ngachilihi ngwove wavumbika vivezu vyavakwenu?
WANA VYAVIVULU
Nausakula ngachilihi kulinga vyuma vize navizamisa usepa wove naKalunga?
“Sakulenu Vyuma Vyakulinga Vize Navineha Kavumbi Kuli Kalunga” (Kaposhi Kakutalila, April 15, 2011)
Wana jila eji kuzachisanga Yehova hakutuhana jindongi.
Tachikiza chuma chakafwile lunga umwe asakule kwecha chuma chize azangile chikuma.
Yehova Eji Kutesangamo Vyuma Vyosena Vyamwaza Atufwelelesa (5:46)
Wana omwo tunahase kusakula kulinga chuma chize nachivwisa Yehova kuwaha numba tuhu kakweshi lushimbi lwahanjika hatoma hachuma kanako.
“Kutala Mwasaka Kumitwaminyina naJishimbi JamuMbimbiliya Shimbu Yosena Nyi?” (Kaposhi Kakutalila, December 1, 2003)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
