CHILONGESA 36
Pwakonga Wakashishi muVyuma Vyosena
Vatu vosena vasaka kupwa namasepa vakashishi. NaYehova nawa asaka masepa jenyi vapwenga vakashishi. Oloze chapwa chachikalu kupwa vakashishi muno mukaye kali navatu vavavulu vaze kavapwa vakashishiko. Uno kupwa vakashishi chawahila halihi?
1. Chuma muka chachilemu chikuma chatela kutulingisa tupwenga vakashishi?
Nge natupwanga vakashishi kuli vakwetu, kaha Yehova mwamona ngwenyi twamuzanga nakumuvumbika. Tachikiza ngwove, Yehova atachikiza vyuma vyosena tweji kushinganyekanga navize tweji kulinganga. (WavaHepeleu 4:13) Nge tunasakula kupwa vakashishi, Yehova eji kutachikizanga nakwivwa kuwaha. Mazu enyi amba ngwawo: “Yehova ahunga muka-kutangisa, oloze apwa sepa lyavaka-kusungama.”—Vishimo 3:32.
2. Jijila muka tunahase kusolwelamo ngwetu twapwa vakashishi mukuyoya chetu?
Yehova asaka ‘tuhanjikenga muchano navakwetu.’ (Zekaliya 8:16, 17) Uno echi chalumbununa ika? Chalumbununa nge twatela kuhanjikanga muchano nakuhona kuhana unjiho wamakuli numba nge tuli nakuhanjika kuli vausoko wetu, chipwe vakwetu vaka-milimo, chipwe vakwetu vaka-Kulishitu chipwe vilolo jafulumende. Vatu vakashishi kaveshi kwiva vyuma vyavakwavo chipwe kwonga vakwavoko. (Tanga Vishimo 24:28 naWavaka-Efwesu 4:28.) Kaha nawa veji kufwetanga mitelo yosena yize vatela kufweta. (Wavaka-Loma 13:5-7) Tweji kupwanga “vakashishi muvyuma vyosena” mujijila kaneji najeka.—WavaHepeleu 13:18.
3. Vyuma muka vinahase kufumamo nge natupwa vakashishi?
Nge natupwa vakashishi, kaha vatu navatufwelela. Natulingisa nawa vatu muchikungulwilo valivwe kupwa vakukingiwa ngana muze chapwa mutanga yazangi. Natupwa nawa nachivezu chitoma. Kupwa vakashishi chinahase nawa “[kuwahisa] kunangula chakuli Mulwilo wetu Kalunga,” nakulingisa vatu vaze kavetavako vezenga mukulemesa chamuchano.—WaChituse 2:10.
LINANGULE VYAKUJIMINYINA
Wana omwo kupwa vakashishi chakwata hali Yehova nahali yove, nomwo nawa unahase kupwa uwakashishi mujijila jakulisezaseza.
4. Kupwa vakashishi cheji kwivwisanga Yehova kuwaha
Tangenu Samu 44:21 naMalaki 3:16, nakushimutwila havihula vino:
-
Mwomwo ika chapwila chakuhenga mutu kushinganyeka ngwenyi katela kuhanjikanga muchano wosenako?
-
Washinganyeka ngwove Yehova eji kwivwanga ngachilihi nge natuhanjikanga muchano nahalwola nachipwa chachikalu kulinga ngocho?
Nge vana navahanjikanga muchano kaha visemi veji kuwahililanga. Yehova nawa eji kuwahililanga nge natuhanjikanga muchano
5. Pwakonga wakashishi lwola lwosena
Vatu vavavulu vashinganyeka ngwavo kachapwa chamwaza kuhanjikanga muchano lwola lwosenako. Oloze wana ovyo vyatela kutulingisa tupwenganga vakashishi lwola lwosena. Talenu VINDIYO.
Tangenu WavaHepeleu 13:18, nakushimutwila omwo tunahase kupwa vakashishi . . .
-
mutanga.
-
kumilimo chipwe kushikola.
-
muvyuma vyeka.
6. Kupwa vakashishi cheji kutukafwanga
Shimbu jimwe, kupwa vakashishi chinahase kutunehela ukalu. Oloze kutwala muze cheji kunehanga vyuma vyamwaza. Tangenu Samu 34:12-16, nakushimutwila hachihula chino:
-
Uno kupwa uwakashishi nachikukafwa ngachilihi upwenga nachiyoyelo chamwaza?
VATU VAMWE NGWAVO: “Makuli amwe apwa amandende kaha, shikaho ngunahase tuhu kuwahanjika.”
-
Mwomwo ika wetavila ngwove Yehova ahunga makuli osena?
CHISHINA UNALINANGULA
Yehova asaka masepa jenyi vapwenganga vakashishi lwola lwosena muvyuma natuhanjika nevi natulinga.
Kuhituluka
-
Jijila muka tunahase kusolwelamo ngwetu twapwa tuvakashishi?
-
Mwomwo ika chapwila chakuhenga kushinganyeka ngwetu katwatela kuhanjikanga muchano lwola lwosenako?
-
Mwomwo ika uli nakusakila kupwa uwakashishi lwola lwosena?
WANA VYAVIVULU
Uno visemi vanahase kunangula ngachilihi vana vavo vapwenganga vakashishi?
Mwomwo ika chapwila chamwaza kutesamo vyuma tunashiki?
Wana ovyo twatela kuhanyinanga mitelo numba tuhu navayizachisa mujila yakuhenga.
“Uno Mwatela Kufwetanga Mitelo Tahi?” (Kaposhi Kakutalila, October 1, 2011)
Vyuma muka vyakunywile mutu uze kapwile wakashishiko alumuke nakupwa jino wakashishi?
“Ngwalinangwile Nge Yehova Apwa waKeke, Muka-Kutetela” (Kaposhi Kakutalila, May 1, 2015)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
