CHILONGESA 37
Vyuma Yahanjika Mbimbiliya Hakuzata Milimo NahaJimbongo
Kutala walizakaminaho lyehi hamilimo chipwe hajimbongo tahi? Chinahase kupwa chachikalu kupwa nalwola lwakuwana vyakulikafwa navyo oku nawa tuli nakuzachila Yehova namuchima wosena. Oloze muMbimbiliya mwatwama jindongi jize jinahase kutukafwa.
1. Vyuma muka yahanjika Mbimbiliya kutalisa kukuzata milimo?
Kalunga asaka tulivwisenga kuwaha kuzata milimo. Mbimbiliya ngwayo, “kakweshi chuma chamwaza atela kulinga mutu kuhambakana . . . kulivwisa kuwaha hamilimo yenyi eji kukilikitangako.” (Muka-kwambulula 2:24) Yehova apwa muka-kukilikita. Shikaho nge natumulondezeza hakuzatanga nangolo, kaha natupwa vakusuuluka nakumwivwisa kuwaha.
Milimo yapwa yayilemu. Oloze katwatela kuyimona kupwa yayilemu chikuma kuhambakana kulemesa Yehovako. (Yowano 6:27) Atushika ngwenyi, nge natumuhaka kulutwe mukuyoya chetu kaha mwatuhananga vyuma vyakulikafwa navyo mukuyoya.
2. Jila muka yamwaza yize twatela kumwenamo jimbongo?
Numba tuhu Mbimbiliya yamba ngwayo “jimbongo japwa mukingo,” oloze yatuhuhumuna nawa ngwayo kajeshi kuhasa kutulingisa tupwenga vakuwahililako. (Muka-kwambulula 7:12) Shikaho, katwatela kuzanga jimbongoko, oloze twatela ‘kusuulukanga navyuma tuli navyo.’ (Tanga WavaHepeleu 13:5.) Nge natusuulukanga navyuma tuli navyo, kaha katweshi kwivwa kupihya mwomwo yakushinganyeka ngwetu tuli navyuma vyavindendeko. Nachitukafwa nawa tuhone kwingila mumikuli. (Vishimo 22:7) Kaha nawa nachitukafwa tulihende kukuhema chalizangamina nakusekasana chize vamona vatu ngwavo nachineha washi jimbongo.
3. Jila muka yamwaza twatela kuzachishilamo jimbongo?
Yehova apwa Kalunga muka-kuhana, kaha tweji kumulondezezanga hakupwa “[tuvaka-kuhanahana], vaze valizanga kulipangilanga vyuma navakwavo.” (WaChimoteu 1, 6:18) Tunahase kuzachisa kanawa jimbongo jetu nge natuhanangako jimwe kuchikungulwilo nakukafwa vaze vanakalikiza, chikumanyi vandumbwetu. Chuma cheji kutulingisanga tuhane wana chikiko amona Yehova kupwa chachilemu, keshi nge kutohwa chawanako. Nge natuhananga namuchima wakusuuluka, kaha natupwa tuvakuwahilila nakwivwisa nawa Yehova kuwaha.—Tanga Vilinga 20:35.
LINANGULE VYAKUJIMINYINA
Wana ovyo chapwila chamwaza kumona milimo mujila yamwaza nakusuuluka navyuma tuli navyo.
4. Jila nauzachilamo milimo yatela kusolola nge wavumbika Yehova
Usepa wetu naYehova watela kutulingisa tuhakenga mangana kumilimo. Talenu VINDIYO, nakushimutwila havihula vino:
-
Uli nakwivwa ngachilihi hamuchima apwile nawo Jason navilinga asolwelenga kumilimo?
-
Vyuma muka alingilenga mangana ahone kundupukila chikuma mukuzata milimo?
Tangenu Wavaka-Kolose 3:23, 24, nakushimutwila hachihula chino:
-
Mwomwo ika chapwila chamwaza kumona milimo kupwa yayilemu?
Milimo yapwa yayilemu. Oloze katwatela kuyimona kupwa yayilemu chikuma kuhambakana kulemesa Yehovako
5. Kusuuluka navyuma tuli navyo cheji kutukafwanga
Vatu vavavulu veji kukilikitanga mangana vapwenga najimbongo jajivulu. Oloze Mbimbiliya kayatukolezeza tulingenga ngochoko. Tangenu WaChimoteu 1, 6:6-8, nakushimutwila hachihula chino:
-
Uno Mbimbiliya yatukolezeza tulingenga ika?
Tunahase kupwa vakuwahilila numba tuhu tuli navyuma vyavindende. Talenu VINDIYO, nakushimutwila hachihula chinakavangizaho.
-
Chuma muka chalingisa eji jitanga jipwenga jakuwahilila numba tuhu kajatwama najimbongo jajivuluko?
Nyi ngachilihi nge tuli lyehi navikumba vyakutamo oloze tuli nakusaka kupwa navyavivulu? Yesu ahanjikile chakutalilaho chize chasolola ponde yatwama hakusaka kupwa navikumba vyavivulu. Tangenu Luka 12:15-21, nakushimutwila hachihula chino:
-
Vyuma muka unalinangula kuchifwanyisa ahanjikile Yesu?—Tala vesi 15.
Tangenu chisoneka chaVishimo 10:22 naWaChimoteu 1, 6:10, nakuvyesekesa kuchihande chino. Kufumaho shimutwilenu havihula vino:
-
Uno washinganyeka ngwove chuma chachilemu shina kutunga usepa naYehova tahi, nyi kupwa najimbongo jajivulu? Mwomwo ika?
-
Ukalu muka weji kwizanga mwomwo yakupwa namuchima wakufwila kupwa najimbongo jajivulu?
6. Yehova mwatuzakamanga
Kulizakamina hamilimo chipwe kushinganyeka ngwetu tuli najimbongo jajindende chinahase kutulingisa tumone numba nge twafwelela Yehova nyi chiku. Talenu VINDIYO, nakumona vyuma twatela kulinga kachi nge tuli muukalu kana. Kufumaho shimutwilenu havihula vinakavangizaho.
-
Kweseka navindiyo unatale, ukalu muka apwile nakulipika nawo ndumbwetu?
-
Vyuma muka alingile mangana afungulule ukalu kana?
Tangenu Mateu 6:25-34, nakushimutwila hachihula chino:
-
Vyuma muka ashika Yehova kulingila vatu vaze vamuhaka kulutwe mukuyoya chavo?
VATU VAMWE NGWAVO: “Ngwatela kuzata nangolo nguzakame tanga yami. Shikaho kangwatela kuyanga kukukunguluka chalumingo hichalumingoko.”
-
Visoneka muka vyakukunyula umone ngwove chapwa chamwaza chikuma kuhaka kulutwe kulemesa Yehova?
CHISHINA UNALINANGULA
Milimo yakukaye najimbongo vyapwa vyavilemu, oloze kavyatela kututangula tuhone kuzachila Yehovako.
Kuhituluka
-
Vyuma muka vyakukafwa umone milimo mujila yamwaza?
-
Uno kusuuluka navyuma uli navyo nachikukafwa ngachilihi?
-
Nausolola ngachilihi ngwove wafwelela vyuma vize Yehova ashika kulingila vatu jenyi?
WANA VYAVIVULU
Kekesa umone numba nge Mbimbiliya yahanjika ngwayo jimbongo japwa jajipi.
“Uno Jimbongo Jikiko Jika-Kuneha Vyuma Vyavipi Vyosena Tahi?” (Chihande chili ha jw.org/lue)
Wana jila yize twatela kuzachishilamo kanawa jimbongo yize yeji kwivwisanga Kalunga kuwaha.
“Vyuma Muka Yahanjika Mbimbiliya Kutalisa kuKuhana?” (Chihande chili ha jw.org/lue)
Uno chapwa chamwaza kwazana mukuhema chalizangamina tahi?
“Omu Yahanjika Mbimbiliya—Kuhema Njuka” (Tonenu!, March 2015)
Wana vyuma vyakafwile lunga umwe echenga kwazana mukuhema chalizangamina nawiji.
“Ngwazangilenga Chikuma Kuhema chaKunyina haTuvalu” (Chihande chamuKaposhi Kakutalila)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
