CHILONGESA 38
Solola Kusakwilila Chove haWana waKuyoya
Kuli vyuma vyavivulu tunahase kulivwisa kuwaha mukuyoya. Numba tuhu natumonanga ukalu, oloze tunahase kupwa vakuwahilila mukuyoya. Natusolola ngachilihi ngwetu twasakwilila Yehova hakutuhana kuyoya? Kaha chuma muka chachilemu chikuma chize chatela kutulingisa tulinge ngocho?
1. Mwomwo ika twatela kusakwililanga Kalunga hakutuhana kuyoya?
Twatela kupwa namuchima wakusakwilila hakupwa nakuyoya mwomwo wapwa wana wakufuma kuli Setu wazangi Yehova. Kuli ikiye “kukiko kwafuma kuyoya” mwomwo ikiye atengele vyuma vyosena vyakuyoya. (Samu 36:9) “Ikiye eji kuhananga vatu vosena kuyoya nakuhwima navyuma vyosena.” (Vilinga 17:25, 28) Yehova eji kutuhananga vyuma vize navitukafwa tutwaleho lika kuyoya. Chachinenenyi, eji kutukafwanga tulivwise kuwaha kuyoya.—Tanga Vilinga 14:17.
2. Natusolola ngachilihi ngwetu twasakwilila Yehova hakutuhana kuyoya?
Yehova nakuzakamanga kufuma vene halwola vakwimichile. Ndavichi, ngamba yaKalunga uze vasoneka muMbimbiliya alombele ngwenyi: “Meso ove angumwene shimbu ngwapwile ngumuvisu.” (Samu 139:16) Yehova amona kuyoya chove kupwa chachilemu. (Tanga Mateu 10:29-31.) Shikaho eji kwivwanga kupihya nge mutu mwajiha mukwavo chakuchisakula kumuchima, chipwe kulijiha ivene. a (Kulovoka 20:13) Yehova eji kwivwanga nawa kupihya nge natuhaka kuyoya chetu muponde, chipwe kuhona kulikinga etu vavene navakwetu. Shikaho nge natukinganga kuyoya chetu nechi chavakwetu, kaha natusolola ngwetu twasakwilila Kalunga hakutuhana kuyoya.
LINANGULE VYAKUJIMINYINA
Wana jijila unahase kusolwelamo ngwove wasakwilila Kalunga hakukuhana kuyoya.
3. Zakamanga kulikangula chove
Vaka-Kulishitu vaze valihana kuli Yehova veji kumuzachilanga mukuyoya chavo chosena. Chili kwijiva nge vahana mijimba yavo kuli Kalunga kupwa chimuna wakuvatula. Tangenu Wavaka-Loma 12:1, 2, nakushimutwila havihula vino:
-
Vyuma muka vyatela kukukunyula mangana uzakame kulikangula chove?
-
Jijila muka jimwe unahase kuzakaminamo kulikangula chove?
4. Lihende kuvyuma vize navihaka kuyoya chove nechi chavakwenu muponde
Mbimbiliya yatulweza tulihendenga kukulinga vyuma vize navihaka kuyoya chetu nechi chavakwetu ponde. Talenu VINDIYO, nakumona vyuma watela kulinga mangana ulikinge.
Tangenu Vishimo 22:3, nakushimutwila omwo yove navakwenu munahase kupwa vakukingiwa nge . . .
-
uli hembo.
-
uli kumilimo.
-
uli nakuhema.
-
uli nakutambukisa minyau chipwe kutambukisa chuma cheka chipwe nge vanakumbateko.
5. Monanga kuyoya chamwana ali mujimo kupwa chachilemu
Ndavichi ahanjikile ngwenyi Yehova eji kumonanga vyuma vyosena vize vyeji kusolokanga kuli mwana ali mujimo. Tangenu Samu 139:13-17, nakushimutwila hachihula chino:
-
Uno Yehova amona ngwenyi kuyoya chamutu cheji kuputukanga hakumwimita tahi, nyi hakusemuka?
Jishimbi jize Yehova ahanyine vaIsalele vakushikulu jakingilenga mapwevo navana vavo vaze vapwile mumajimo. Tangenu Kulovoka 21:22, 23, nakushimutwila havihula vino:
-
Uno Yehova amwenenga ngachilihi mutu uze mwajiha mwana uze achili mujimo chakuzeneka kutachikiza?
-
Jino Yehova mwevwa ngachilihi nge mutu mwajiha mwana ali mujimo chakuchisakula kumuchima? b
-
Uli nakwivwa ngachilihi hajila Kalunga amwenamo chihande kana?
Napwevo uze amona kuyoya kupwa chachilemu nahase kupwa muukalu uze unahase kumulingisa ashinganyeke ngwenyi nachiwaha kulifumisa lijimo. Tangenu Isaya 41:10, nakushimutwila havihula vino:
-
Uno nge pwevo vali nakumushinyinyika alifumise lijimo, atela kulweza iya mangana amukafwe? Mwomwo ika?
VATU VAMWE NGWAVO: “Pwevo akwechi lisesa lyakufumisa lijimo nge nasake, mwomwo mujimba wenyi.”
-
Vyuma muka vyakukunyula umone ngwove Yehova amona kuyoya chapwevo nechi chamwanenyi ali mujimo kupwa chachilemu?
CHISHINA UNALINANGULA
Mbimbiliya yatunangula tuzangenga kuyoya chize atuhana Yehova nakuchimona kupwa chachilemu nakuchikinga. Omu mukiko twatela kumona kuyoya chetu nechi chavakwetu.
Kuhituluka
-
Mwomwo ika kuyoya chamutu chapwila chachilemu kuli Yehova?
-
Uno Yehova eji kwivwanga ngachilihi nge mutu mwalijiha ivene chipwe kujiha mukwavo chakuchisakula kumuchima?
-
Vyuma muka vyakulingisa usakwilile Kalunga hakukuhana kuyoya?
WANA VYAVIVULU
Natusolola ngachilihi ngwetu twasakwilila Yehova hakutuhana wana wakuyoya?
Wana muvakumbulwila chihula chino: Kutala Kalunga nahase kukonekela pwevo uze alifumisaho lyehi lijimo tahi?
“Vyuma Muka Yahanjika Mbimbiliya Kutalisa Kukufumisa Lijimo?” (Chihande chili ha jw.org/lue)
Tachikiza jila Kalunga amwenamo kuyoya nomwo yatela kutulingisa tusakulenga vyakuhemahema vize kavyeshi kuneha pondeko.
“Kutala Mwatela Kwazana ‘muKuhema chaPonde’ Tahi?” (Tonenu!, October 8, 2000)
Wana omwo Mbimbiliya yinahase kukafwa mutu uze ali nakusaka kulijiha.
a Yehova azakama vaze vali nakulyonyinga mumichima. (Samu 34:18) Atachikiza kanawa vyuma vyeji kuvalingisanga vashinganyeke ngwavo nakufwa chinawahe, kaha asaka kuvakafwa. Hakusaka umone omwo Yehova nahase kukafwa mutu echenga kushinganyeka hakulijiha, tanga chihande chakwamba ngwavo “Uno Mbimbiliya Yinahase Kungukafwa Nge Nguli naVishinganyeka Vyakusaka Kulijiha Tahi?,” chize chili muchilongesa chino hachihanda chakwamba ngwavo Wana Vyavivulu.
b Vaze valifumisaho lyehi lijimo kavatela kuhomba chikumako, Yehova nahase kuvakonekela. Hakusaka uwane vyavivulu, tanga chihande chakwamba ngwavo, “Vyuma Muka Yahanjika Mbimbiliya Kutalisa Kukufumisa Lijimo?,” chize chili muchilongesa chino hachihanda chakwamba ngwavo Wana Vyavivulu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
