CHILONGESA 39
Uno Kalunga Amona Ngachilihi Manyinga?
Manyinga apwa amalemu. Nge manyinga auchi katweshi kuyoyako. Hakuwana nge Kalunga ikiye Tengi yetu, ngocho akwechi lisesa lyakutulweza mujila twatela kuzachishilamo manyinga. Uno vyuma muka ahanjika kutalisa kumanyinga? Uno vatu vatela kulya manyinga chipwe kuvahakawo tahi? Jino namusakula ngachilihi kanawa vyakulinga kutalisa kuchihande kana?
1. Uno Yehova amona ngachilihi manyinga?
Yehova alwezele vangamba jenyi vakushikulu ngwenyi: “Mwono wachuma chakuyoya akiko manyinga.” (VyavaLevi 17:14) Shikaho Yehova amona ngwenyi manyinga emanyinako kuyoya. Hakuwana nge kuyoya chapwa wana wajila wakufuma kuli Kalunga ngocho namanyinga nawa apwa ajila.
2. Jila muka yakuzachishilamo manyinga yize akanyisa Kalunga?
Hanyima yalivaji Yehova alwezele vangamba jenyi vazenekenga kulya manyinga. Kufumaho alwezele cheka vaIsalele lushimbi kana. (Tanga Kuputuka 9:4 naVyavaLevi 17:10.) Yehova ahanjikile cheka lushimbi kana hanyima yakutunga chikungulwilo chavaka-Kulishitu. Lizavu lyakutwaminyina lyalwezele vaka-Kulishitu ngwalyo: “Lihendenunga . . . kumanyinga.”—Tanga Vilinga 15:28, 29.
Uno kulihenda kumanyinga chalumbununa ika? Chakutalilaho, nge ndotolo nakulweze ngwenyi ulihende kuwala, kaha kaweshi kuunwako. Hakuwana nge kaweshi kuunwako, kutala naulya vyakulya vize vanahakeko wala chipwe kuuhaka mundongo nakulituvayo tahi? Nduma, kaweshi kulinga ngochoko. Shikaho, nalushimbi lwaKalunga lwakulihenda kumanyinga lwalumbununa nge katwatela kunwa manyinga chipwe kulya kanyama wakulifwilako. Kaha nawa katwatela kulya vyakulya vize vanahakeko manyingako.
Nyi ngachilihi jila yakukilamo vatu kuzachisa manyinga? Jijila jimwe jakukilamo vatu jalimbalaka najishimbi jaKalunga. Jila yimwe shina kuhaka mutu manyinga avene, chipwe kumuhaka vihanda vyavinene vize vyatunga manyinga. Vihanda kana shina, red cells, white cells, platelets, naplasma. a Oloze jijila jimwe jakukilamo vatu kajasolola hatoma numba nge jalimbalaka najishimbi jaKalunga nyi chiku. Jila yimwe shina kuzachisa tuvihanda twatundende tuze twafuma kuvihanda vyavinene vyatunga manyinga. Jila yikwavo nawa yapwa kuka mutu kuzachisa manyinga enyi. Shikaho hakukekesa jijila kana mutu himutu atela kulisakwila ivene vyakulinga. b—Wavaka-Ngalesha 6:5.
LINANGULE VYAKUJIMINYINA
Kekesa uwane mwakusakwila kanawa jila yamwaza yakukukilamo.
3. Sakula jila yakukukilamo yize nayivwisa Yehova kuwaha
Nausakula ngachilihi jila yakukukilamo yize yalitombola nomwo Kalunga amwenamo manyinga? Talenu VINDIYO, nakushimutwila hakulema chatwama hakulinga vyuma vinakavangizaho:
-
Kulomba Yehova akuhane mangana.—WaYakova 1:5.
-
Kuhehwojola jindongi jamuMbimbiliya nakuwana omwo jazata.—Vishimo 13:16.
-
Kuwana jijila jakukilamo mutu veji kuzachisanga okwo watwama.
-
Kuwana jijila jimwe jakukilamo jize kawatela kwitavilako.
-
Kusakula vyuma vize navikulingisa usale nachivezu chitoma.—Vilinga 24:16. c
-
Kutachikiza ngwove vyuma vimwe kavavikanyisa hatoma muMbimbiliyako. Shikaho kakweshi mutu mwakusakwila vyakulinga, numba apwa muka-mahyove, chipwe mukulwane muchikungulwilo chipwe muka-kukunangula Mbimbiliya.—Wavaka-Loma 14:12.
-
Kusoneka vyuma unasakula.
4. Vinjiho jaYehova veji kusakulanga jila yamwaza yakuvokilamo
Kachapwa chachikalu kukavangiza lushimbi lwaKalunga lwahanjika hamanyinga mangana vatuke chakuzeneka kutuhaka manyingako. Talenu VINDIYO.
Tangenu WaChituse 3:2, nakushimutwila hachihula chino:
-
Mwomwo ika twatela kuhanjikila mujila yayivwovu nakavumbi nge tuli nakushimutwila navaka-chipatela?
|
Vize kavetavisako |
Vize mwalisakwila muka-Kulishitu |
|---|---|
|
A. Plasma |
Tuvihanda twakuplasma |
|
B. White cells |
Tuvihanda twakuwhite cells |
|
C. Platelets |
Tuvihanda twakuplatelets |
|
D. Red cells |
Tuvihanda twakured cells |
5. Nge vali nakusaka kukuka kuzachisa tuvihanda twatundende twatunga manyinga
Manyinga atwama muvihanda viwana vyavinene. Vihanda kana shina, red cells, white cells, platelets, naplasma. Omu muvihanda vyavinene mwatwama tuvihanda tweka twatundende twatuvulu. d Tuvihanda tumwe veji kutuzachisanga hakuka mutu chipwe kumukafwa echenga kunokola.
Kutalisa kutuvihanda twatundende twatunga manyinga, muka-Kulishitu himuka-Kulishitu atela kulisakwila ivene kweseka nachivezu chenyi chize vanangula naMbimbiliya. Vaka-Kulishitu vamwe vanahase kukana kuvoka kuzachisa tuvihanda twatundende twatunga manyinga. Kaha veka vanahase kwitavila kuvoka mujila kana kweseka nachivezu chavo.
Hakusaka kusakula vyuma watela kulinga, lihulise chihula chino:
-
Nanguhasa kulumbunwina ngachilihi ndotolo ovyo ngunakanyina chipwe kwitavila vanguke kuzachisa tuvihanda twatundende twatunga manyinga?
MUTU NAHASE KUHULISA NGWENYI: “Uno kunguhaka manyinga chapihila halihi, okunyi nachinguyovola?”
-
Uno naumukumbulula ngachilihi?
CHISHINA UNALINANGULA
Yehova asaka tumonenga manyinga kupwa ajila.
Kuhituluka
-
Mwomwo ika Yehova amwena manyinga kupwa ajila?
-
Uno twatachikiza ngachilihi ngwetu lushimbi lwaKalunga lwakulihenda kumanyinga lwatalisa nawa kukukana kutuhaka manyinga?
-
Vyuma muka navikukafwa usakule kanawa jila yakukukilamo?
WANA VYAVIVULU
Vyuma muka watela kushinganyekaho shimbu kanda usakule kukuka kuzachisa manyinga ove?
“Vihula Vyakufuma Kuli Vaka-Kutanga” (Kaposhi Kakutalila, November 1, 2000)
Vyuma muka watela kushinganyekaho shimbu kanda usakule kukuka kuzachisa tuvihanda twatundende twatunga manyinga?
“Vihula Vyakufuma Kuli Vaka-Kutanga” (Kaposhi Kakutalila, June 15, 2004)
Vyuma muka vyalingishile ndotolo umwe etavile ngwenyi, jila yize Yehova amwenamo manyinga yapwa yakwoloka?
“Ngwetavilile Jila Kalunga Amwenamo Manyinga” (Tonenu!, December 8, 2003)
Wana omwo vakulwane vaze vatwama mujiKomiti jaKulivwasana naVipatela veji kukafwanga vandumbwavo.
a Vihanda kana muPortuguese vavivuluka ngwavo, Células vermelhas, glóbulos brancos, plaquetas naplasma.
b Tala Chilongesa 35 chakwamba ngwavo, “Vyuma Navikukafwa Usakulenga Kanawa Vyakulinga.”
c Tala kamutwe 5 kakwamba ngwavo, “Nge Vali Nakusaka Kukuka Kuzachisa Tuvihanda Twatundende Twatunga Manyinga” naChinyikilo chaKusongo 3, chakwamba ngwavo, “Jijila Jakukilamo Kuzachisa Manyinga naMulimo Wetu waWangana waNovermber 2006, lifwo 3-6.”
d Vandotolo vamwe vamona evi vihanda viwana vyatunga manyinga ngwavo tuvihanda twatundende. Ngocho watela kuvalumbunwina kanawa ovyo vyakulingisa ukane kukuhaka manyinga avene chipwe evi vihanda viwana vyavinene vyatunga manyinga.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
