CHILONGESA 40
Natuhasa Kupwa Ngachilihi Vatoma kuMeso aKalunga?
Achishinganyeke havyuma eji kulinganga chisemi wapwevo wazangi hakuwahisa mwanenyi mangana ayenga kushikola. Atela kumona ngwenyi mwanenyi nasane, kaha nawa uvwalo wenyi waunyoji. Echi nachikafwa ou mwana apwenga wakulikangula, kaha nawa vatu navamona ngwavo visemi jenyi vamuzakama. Chochimwe nawa, Setu wazangi Yehova asaka tupwenga vaunyoji nakupwa vatoma muvishinganyeka namuvilinga. Kupwa vatoma nachitukafwa nakuneha nawa kavumbi hali ikiye.
1. Vyuma muka twatela kulinga mangana tupwenga vaunyoji?
Yehova atulweza ngwenyi: “Pwenunga mwajila.” (WaPetulu 1, 1:16) Hakusaka tupwenga vajila, twatela kupwa vaunyoji, kaha nawa tuvatoma muvishinganyeka namuvilinga. Tunahase kupwa vaunyoji nge natusananga hakumbi hakumbi nakulama uvwalo wetu, nalimbo lyetu naminyau yetu kupwa vyaunyoji. Tunahase nawa kuzachila hamwe nachikungulwilo hakuwahisanga haZuvo yaWangana. Nge natupwa vaunyoji kaha natutohwesa Yehova.—Wavaka-Kolinde 2, 6:3, 4.
2. Jitato muka twatela kulihendako mangana tupwenga vaunyoji?
Mbimbiliya yatulweza “[tulitomesenga] kuvyuma vyosena vyakupihisa mujimba nashipilitu.” (Wavaka-Kolinde 2, 7:1) Shikaho tweji kuzatanga nangolo mangana tulihende kuvyuma vize navitupihisa kumujimba namuvishinganyeka. Vyuma natushinganyeka vyatela kwivwisa Yehova kuwaha, shikaho twatela kukilikita mangana tuzeneke kushinganyekanga vyuma vyavipi. (Samu 104:34) Twatela nawa kuzata nangolo tupwenga nahanjikiso yamwaza.—Tanga Wavaka-Kolose 3:8.
Vyuma vyeka muka vinahase kutupihisa kumujimba namuvishinganyeka? Vyuma vimwe vyeji kwenyekanga mujimba. Shikaho twatela kulihenda kukunwa makanya nakutafunya mikoswa yabetel nut chipwe mafwo acoca, nakunwa maundu akupendesa nakuzachisa vitumbo mujila yakuhenga. Nge natulihenda kuvyuma kana, kaha natupwa vakulikangula, nakusolola nawa ngwetu twamona kuyoya kupwa chachilemu. Twatela nawa kukilikita tumbile tato yakulisokota kuusonyi, natato yakutala chipwe kutanga chipwe kwivwilila kuvyuma vyakuneha peha yakusaka kulisavala. Echi nachitukafwa tupwenga vatoma muvishinganyeka namuvilinga. (Samu 119:37; Wavaka-Efwesu 5:5) Numba tuhu chachikalu kumbila jitato kana, oloze Yehova mwatukafwa tujimbile.—Tanga Isaya 41:13.
LINANGULE VYAKUJIMINYINA
Wana ovyo kupwa vaunyoji cheji kunehelanga kavumbi halijina lyaYehova, navyuma watela kulinga mangana umbile jitato jajipi.
3. Kupwa vaunyoji cheji kunehanga kavumbi halijina lyaYehova
Nge natutanga jishimbi jize Yehova ahanyine vaIsalele kushikulu, kaha natutachikiza ngwetu asaka vatu jenyi vapwenganga vaunyoji. Tangenu Kulovoka 19:10 na 30:17-19, nakushimutwila havihula vino:
-
Kweseka neji jivesi, Yehova amona ngachilihi unyoji?
-
Vyuma muka watela kulinga lwola lwosena mangana upwenganga uwaunyoji?
Kupwa vaunyoji chasakiwa lwola nakukilikita. Oloze tunahase kupwa vaunyoji chamokomoko nokwo twatwama numba tupwa najimbongo jajivulu chipwe chiku. Talenu VINDIYO, nakushimutwila hachihula chinakavangizaho.
-
Uno kulamanga vikumba vyetu kupwa vyaunyoji nachilingisa ngachilihi vatu vetavile kuvambulila?
4. Mbila jitato jajipi
Yehova nahase kutukafwa tumbile kala tato twatwama nayo
Nge weji kunwanga makanya chipwe kunwa maundu mwomwo yachiseke, kaha pamo watachikiza omwo chakaluhwa kumbila tato kana. Jino chuma muka nachikukafwa? Shinganyeka haukalu weji kwizanga mwomwo yatato kana. Tangenu Mateu 22:37-39, nakushimutwila omwo kunwa makanya nakuzachisa maundu mujila yakuhenga chinahase kwenyeka . . .
-
usoko wamutu naYehova.
-
usoko wamutu navaka-tanga yenyi chipwe navatu veka.
Shinganyekela chimweza vyuma watela kulinga mangana umbile tato yove. a Talenu VINDIYO.
Tangenu Wavaka-Fwilipi 4:13, nakushimutwila hachihula chino:
-
Uno kulombanga lwola lwosena nakulinangulanga Mbimbiliya nakupwanga kukukunguluka nachikafwa ngachilihi mutu ambile tato yenyi?
5. Kilikita umbile vishinganyeka vyavipi navilinga vyavipi
Tangenu Wavaka-Kolose 3:5, nakushimutwila havihula vino:
-
Twatachikiza ngachilihi ngwetu Yehova amona kutala mivwimbimbi yavatu vali uselesele, nakulitumina mijimbu yauvumbi nakulisokota kuusonyi kupwa vyamajilo?
-
Kutala tunahase kupwa vatoma muvishinganyeka namuvilinga, ngana muze asaka Yehova tahi? Mwomwo ika?
Wana vyuma navikukafwa umbile vishinganyeka vyavipi. Talenu VINDIYO.
Yesu ahanjikile chifwanyisa chize chasolola nge twatela kuzata nangolo mangana tupwenga vatoma muvishinganyeka namuvilinga. Tangenu Mateu 5:29, 30, nakushimutwila hachihula chino:
-
Yesu katulweza tulilemekeko, oloze alumbunwine ngwenyi twatela kulingako vyuma vimwe. Chuma muka atela kulinga mutu mangana alihende kuvishinganyeka vyavipi? b
Nge uli nakukilikita umbile vishinganyeka vyavipi, kaha Yehova ali nakwivwa kuwaha. Tangenu Samu 103:13, 14, nakushimutwila hachihula chino:
-
Uno echi chisoneka chinakukafwe ngachilihi uhonenga kuzeya, nge chili nakukukaluhwila kumbila tato yayipi, kaha echi?
Kanda kuzeyako
Unahase kushinganyeka ngwove, ‘Ngunahono, shikaho nangulitwamina kwami.’ Oloze shinganyeka hachumechi: Nge muka-kulaha tunda yayisuku nalimbuka, kachalumbunwine nge nahonoko, kaha nawa kaveshi kumulweza akinduluke nakuputuka chekako. Chochimwe nawa, kuhilukila hatato yove kachalumbunwine nge kaweshi kuhasa kuyimbilako. Kaha nawa kukilikita unakilikita kunyima kachayile mwanganaveneko. Nge unahilukila hatato yove, kanda kuhombako, mwomwo mukiko chapwa kuli vatu. Twalaho kuzata nangolo. Yehova mwakukafwa umbile tato kana.
VATU VAMWE NGWAVO: “Tato kana ngunayijilila chikuma. Kangweshi kuhasa kuyimbilako.”
-
Chisoneka muka unahase kuzachisa hakukafwa mutu atachikize ngwenyi Yehova nahase kumukafwa ambile tato yayipi?
CHISHINA UNALINANGULA
Tweji kwivwisanga Yehova kuwaha hakupwa vaunyoji, nakupwa vatoma muvishinganyeka namuvilinga.
Kuhituluka
-
Mwomwo ika chapwila chachilemu kupwa tuvatoma?
-
Vyuma muka twatela kulinga mangana tupwenga vaunyoji?
-
Unahase kupwa ngachilihi utoma muvishinganyeka namuvilinga?
WANA VYAVIVULU
Vyuma muka vyavyashi unahase kulinga mangana upwenga uwaunyoji numba tuhu uwakuhutwa?
Wana vyuma watela kulinga mangana wechenga kunwa makanya.
“Munahase Chikupu Kulitwamina Kunwa Makanya” (Tonenu!, July 2010)
Wana ukalu weji kufumanga hakutala mivwimbimbi yavatu vali uselesele.
“Mivwimbimbi Yauselesele Yeji Kwenyekanga Vatu Tahi?” (Kaposhi Kakutalila, October 1, 2013)
Wana vyuma vyakafwile lunga umwe ambile tato yakutala mivwimbimbi yavatu vali uselesele.
a Chihande chakwamba ngwavo “Munahase Chikupu Kulitwamina Kunwa Makanya,” chize chili muchihanda chakwamba ngwavo Wana Vyavivulu muchilongesa chino, chinalumbununa vyuma nahase kulinga mutu mangana ambile tato yenyi.
b Hakusaka uwane mwakukumishila tato yakulisokota kuusonyi, tala chihande chakwamba ngwavo “Vyuma Muka Navingukafwa Ngumbile Tato yaKulisokota kuUsonyi?” chinafumu mumukanda waChingeleshi wakwamba ngwavo Questions Young People Ask—Answers That Work, Volyumu 1, kapetulu 25.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
