CHILONGESA 41
Vyuma Muka Yahanjika Mbimbiliya Kutalisa kuKulisavala?
Vatu vavavulu veji kwivwanga nganganyi kuhanjika hachihande chakulisavala. Oloze Mbimbiliya yahanjika hatoma chihande kana, kaha nawa mujila yakavumbi. Vyuma yahanjika hachihande kana vyeji kutukafwanga. Chapwa chakutamo Mbimbiliya kuhanjika mujila kana mwomwo Yehova ikiye Tengi yetu. Shikaho atachikiza kanawa vyuma vyamwaza twasakiwa. Atulweza vyuma twatela kulinga vize navimwivwisa kuwaha, nakutukafwa tulivwise kuwaha kuyoya haya myaka.
1. Uno Yehova amona ngachilihi kulisavala?
Kulisavala chapwa wana uze atuhana Yehova. Asaka vapwevo nalunga valimbata valivwisengacho kuwaha. Hijila yize vapwevo nalunga valimbata veji kusemenangamo vana nakulisolwela zangi kweseka namuze asaka Kalunga, kaha nawa nakulivwisa kuwaha. Echi chikiko Mazu aKalunga ahanjikila ngwawo: “Wahilila napwevo wahaukweze wove.” (Vishimo 5:18, 19) Yehova asaka vaka-Kulishitu vaze vatwama muulo vapwenganga vakushishika kuli vaka-mahyavo kuchina kulinga ukoji.—Tanga WavaHepeleu 13:4.
2. Uno ujila chuma muka?
Mbimbiliya yatulweza ngwayo, “vaka-ujila . . . kaveshi kukaswana Wangana waKalungako.” (Wavaka-Kolinde 1, 6:9, 10) Vaze vasonekele visoneka vyachiHelase vazachishile lizu por·neiʹa kulumbununa ujila. Lizu kana lyazata (1) kukulisavala chapwevo nalunga vaze kavalimbatako, a (2) kukulisavala chavatu vausonyi woumwe, (3) nakukusavala kanyama. Nge ‘natulihenda kuujila,’ kaha natwivwisa Yehova kuwaha nakupwa nachiyoyelo chitoma.—Wavaka-Tesolonyika 1, 4:3.
LINANGULE VYAKUJIMINYINA
Wana omwo unahase kulihenda kuujila nakuwaha nauwanamo.
3. China ujila
Yosefwe mutu wakushishika akanyinenga kulinga ujila. Tangenu Kuputuka 39:1-12, nakushimutwila havihula vino:
-
Chuma muka chalingishile Yosefwe akane kulinga ujila?—Tala vesi 9.
-
Kutala washinganyeka ngwove Yosefwe alingile chuma chakwoloka tahi? Mwomwo ika?
Uno vakweze navahasa kulondezeza ngachilihi Yosefwe mangana valihende kuujila? Talenu VINDIYO.
Yehova asaka tuvosena tulihendenga kuujila. Tangenu Wavaka-Kolinde 1, 6:18, nakushimutwila havihula vino:
-
Vyuma muka vinahase kulingisa mutu alinge ujila?
-
Uno nauhasa kulihenda ngachilihi kuujila?
4. Unahase kufungulula cheseko
Chuma muka chinahase kulingisa mutu chimukaluhwile kufungulula cheseko chakulinga ujila? Talenu VINDIYO, nakushimutwila hachihula chinakavangizaho.
-
Chuma muka alingile ou ndumbwetu omu amwene ngwenyi vishinganyeka navilinga vyenyi vinahase kumulingisa ahone kupwa wakushishika kuli pwevo lyenyi?
Navaka-Kulishitu vakushishika lwola lumwe veji kusakiwanga kuzata nangolo numba vapwenga lika navishinganyeka vitoma. Vyuma muka navikukafwa ulihende kukushinganyeka havyuma vyakupandama kuujila? Tangenu Wavaka-Fwilipi 4:8, nakushimutwila havihula vino:
-
Vyuma muka twatela kushinganyekanga?
-
Uno kutanga Mbimbiliya nakupwa navyakulinga vyavivulu mumulimo waYehova nachitukafwa ngachilihi tufungululenga vyeseko?
5. Jishimbi jaYehova jeji kutukafwanga
Yehova atachikiza vyuma vyamwaza vize twasakiwa. Shikaho atulweza mwakupwila vatoma muvishinganyeka namuvilinga, nakuwaha nawa cheji kufumangamo. Tangenu Vishimo 7:7-27, chipwe talenu VINDIYO, nakushimutwila havihula vinakavangizaho.
-
Vyuma muka vyalingishile ou mukweze engile mucheseko?—Tala Vishimo 7:8, 9.
-
Kweseka naVishimo 7:23, 26, kulinga ujila chinahase kuneha ukalu waunene. Ukalu muka tunahase kulihendako nge natupwa tuvatoma?
-
Uno kupwa tuvatoma nachitukafwa ngachilihi tulivwise kuwaha kuyoya haya myaka?
Vatu vamwe vashinganyeka ngwavo, vyuma yahanjika Mbimbiliya hakulisavala chavatu vausonyi woumwe vyasolola nge Kalunga katwama nazangiko. Oloze Yehova Kalunga wazangi asaka vatu vosena vakalivwise kuwaha kuyoya haya myaka. Twatela kukavangiza jishimbi jenyi numba tukayoye. Tangenu Wavaka-Kolinde 1, 6:9-11, nakushimutwila hachihula chino:
-
Uno Kalunga amona kulisavala chavatu vausonyi woumwe ngana muze amona vilinga vyeka vyavipi tahi?
Tuvosena twatela kwalumunako vyuma vimwe mukuyoya chetu numba twivwise Kalunga kuwaha. Kutala kukilikita chetu nachiya mwanganavene tahi? Tangenu Samu 19:8, 11, nakushimutwila havihula vino:
-
Uno washinganyeka ngwove jishimbi jaYehova japwa jajashi kujikavangiza tahi? Mwomwo ika?
Yehova nakafwe vatu vavavulu vakavangize jishimbi jenyi. Kaha nahase kukukafwa nayove
VATU VAMWE NGWAVO: “Mutu nahase kulisavala nakala mutu nasake, chikalu kaha nge vanalizange.”
-
Ove ngwove ngachilihi?
CHISHINA UNALINANGULA
Kulisavala chapwa wana wakufuma kuli Yehova uze vatela kulivwisa kuwaha vapwevo nalunga valimbata.
Kuhituluka
-
Uno lizu ujila lyatalisa nakuvyuma muka?
-
Vyuma muka navitukafwa tulihendenga kuujila?
-
Uno kukavangiza jishimbi jaYehova cheji kutukafwanga ngachilihi?
WANA VYAVIVULU
Wana ovyo Kalunga akanyishila vapwevo nalunga kutwama hamwe nge kavalimbatako.
Wana numba nge vyuma yanangula Mbimbiliya hakulisavala chavatu vausonyi woumwe vyasolola nge twatela kuhunga vatu vavilinga kana nyi chiku.
“Uno Chapwa Chakuhenga Vatu vaUsonyi Woumwe Kulisavala Tahi?” (Chihande chili ha jw.org/lue)
Wana ovyo jishimbi jaKalunga jize jahanjika havyuma vyakupandama kuujila japwila jamwaza.
“Uno Kulisavala Mukanwa Chapwa Kulisavala Chikupu Tahi?” (Chihande chili ha jw.org/lue)
Muchihande chakwamba ngwavo “Vanguvumbikile,” wana omwo lunga uze alisavalilenga navakwavo malunga alumwine kuyoya chenyi nakwivwisa Kalunga kuwaha.
“Mbimbiliya Yeji Kwalumunanga Kuyoya chaVatu” (Chihande chamuKaposhi Kakutalila)
a Kulisavala chize ahunga Yehova mwaliweza nawa kulisavala chapwevo nalunga vaze kavalimbatako, nakulisavala mukanwa, namundumbi, nakuhemesa usonyi wamukwenu mangana evwenga peha.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
