CHILONGESA 42
Vyuma Muka Yahanjika Mbimbiliya haUjike naUlo?
Muvisemwa vimwe, vatu vafwelela ngwavo mutu keshi kuhasa kupwa wakuwahilila nge keshi kumbata chipwe kusombokako. Oloze tachikiza ngwove, keshi nge vosena vaze vatwama muulo vapwa vakuwahililako, kaha nawa keshi nge vajike vosena vapwa vakuhombako. Mbimbiliya ngwayo naujike naulo vyosena vyapwa wana wakufuma kuli Kalunga.
1. Uno muujike mwatwama kuwaha muka?
Mbimbiliya ngwayo: “Weshowo mwengila muulo mwalinga kanawa, oloze weshowo keshi kwingila muuloko mwalinga kanawa chikuma.” (Tanga Wavaka-Kolinde 1, 7:32, 33, 38.) Muvyuma muka muze mujike “mwalinga kanawa chikuma”? Vaka-Kulishitu vavajike kavatwama namulimo uze vatwama nawo vaka-Kulishitu vaze vali muulo wakuzakama vaka-mahyavoko. Shikaho vapwa vakulihehwa chikuma. Vajike vamwe veji kutohwesanga mulimo wavo wakwambulula. Chakutalilaho, veji kuyanga kuze kuli nakusakiwa vaka-kwambulula Wangana. Chuma chachinene chikumanyi shina vatwama nalwola lwaluvulu lwakulinga vyuma vize navivapandamisa kuli Yehova.
2. Uno kulimbata kweseka najishimbi chawahila halihi?
Ngana mwaujike, naulo nawa weji kunehanga vyuma vyamwaza. Mbimbiliya ngwayo, “vavali vanawahe kuhambakana mutu umwe.” (Muka-kwambulula 4:9) Chuma kana chapwa chachilemu chikumanyi kuli vaka-Kulishitu vaze veji kukavangizanga jindongi jamuMbimbiliya muulo wavo. Vatu vaze veji kulimbatanga kweseka najishimbi veji kulishikanga ngwavo navalizanganga nakulivumbika nakulizakama umwe namukwavo. Kaha veji kulivwanga kupwa vakukingiwa chikuma kuhambakana vatu vaze kavalimbata kweseka najishimbiko. Ngocho navana vavo nawa veji kulivwanga kupwa vakukingiwa.
3. Uno Yehova amona ngachilihi ulo?
Omu Yehova ahakileko ulo watete, ambile ngwenyi: “Lunga mwakaseza ise nanaye nakukalipanjika napwevo lyenyi.” (Kuputuka 2:24) Yehova asaka valunga napwevo valizangenga nakutwamanga hamwe palanga nakukufwa chavo. Etavisa valunga napwevo kulilukulula kuvanga kaha nge umwe nalingi ukoji. Oloze ahana lisesa uze keshi namulongako alisakwile ivene kujiha ulo chipwe chiku. a (Mateu 19:9) Yehova nawa ketavisa vaka-Kulishitu kupwa muluhaliko.—WaChimoteu 1, 3:2.
LINANGULE VYAKUJIMINYINA
Wana vyuma unahase kulinga mangana upwenga uwakuwahilila, nomwo unahase kwivwisa Yehova kuwaha numba nge wapwa umujike chipwe nge watwama muulo.
4. Zachisa kanawa wana wove waujike
Yesu amwenenga ujike kupwa hiwana. (Mateu 19:11, 12) Tangenu Mateu 4:23, nakushimutwila hachihula chino:
-
Uno Yesu azachishile ngachilihi ujike wenyi mangana azachile Ise Yehova nakukafwa vakwavo?
Navaka-Kulishitu vanahase kuzachisa kanawa ujike wavo ngana muze alingile Yesu. Talenu VINDIYO, nakushimutwila hachihula chinakavangizaho.
-
Jila muka yamwaza yize vaka-Kulishitu vanahase kuzachishilamo kanawa ujike wavo?
Uno watachikiza tahi?
Mbimbiliya kayavuluka myaka atela kupwa nayo mutu numba engile muuloko. Oloze yahanjika ngwayo, mutu atela kuvandamina avangile kuhita “hatwitwi yaukweze,” lwola luze peha yakusaka kulisavala yeji kulingisanga mukweze ahone kusakula kanawa vyakulinga.—Wavaka-Kolinde 1, 7:36.
5. Sakula kanawa mutu wakulimbata nenyi
Kusakula mutu wakulimbata nenyi hichuma chimwe havyuma vyavilemu nausakula mukuyoya chove. Tangenu Mateu 19:4-6, 9, nakushimutwila hachihula chino:
-
Mwomwo ika muka-Kulishitu katela kulusuka kwingila muuloko?
Mbimbiliya nayikukafwa utachikize mutu wamwenemwene watela kulimbata nenyi. Chuma chachilemunyi, tonda mutu uze azanga Yehova. b Tangenu Wavaka-Kolinde 1, 7:39 naWavaka-Kolinde 2, 6:14. Kufumaho, shimutwilenu havihula vino:
-
Mwomwo ika twatela kulimbata kaha namukwetu muka-Kulishitu?
-
Unashinganyeka ngwove Yehova mwevwa ngachilihi nge mutu mwalimbata namutu uze kazanga Yehovako?
Nge namukasa tunyama vavali vakulihandununa kutoka yoyimwe, kaha navayanda. Chochimwe nawa namuka-Kulishitu uze mwalimbata namutu uze ketavako, mwamonanga ukalu wauvulu
6. Monanga ulo nganomu aumona Yehova
MuIsalele yakushikulu, malunga vamwe valukulwilenga mapwevo javo chakuzeneka mulonga. Tangenu Malaki 2:13, 14, 16, nakushimutwila hachihula chino:
-
Mwomwo ika Yehova ahungila kulilukulula chakuzeneka mulonga uze vavuluka muMbimbiliya?
Kulinga ukoji nakulilukulula cheji kunehanga ukalu hali uze keshi namulongako nahali vana
Talenu VINDIYO, nakushimutwila hachihula chinakavangizaho.
-
Nge muka-mahyove ketavako, vyuma muka watela kulinga mangana upwenga uwakuwahilila muulo wove?
7. Kavangizanga jishimbi jaYehova jahanjika haulo
Chasakiwa kukilikita numba mutu akavangize jishimbi jaYehova jize jahanjika haulo. c Chipwe ngocho, Yehova eji kukisulanga vaze veji kukilikitanga. Talenu VINDIYO.
Tangenu WavaHepeleu 13:4, nakushimutwila havihula vino:
-
Washinganyeka ngwove chachashi kukavangiza jishimbi jaYehova jahanjika haulo tahi? Mwomwo ika?
Yehova asaka vaka-Kulishitu vasonekese malo avo nakulilukulula nawa kweseka najishimbi kachi nge mukiko yakasa fulumende yamulifuchi lyavo. Tangenu WaChituse 3:1, nakushimutwila hachihula chino:
-
Nge watwama muulo, kutala ulo wove wapwa wakusonekesa kufulumende tahi?
MUTU NAHASE KUHULISA NGWENYI: “Mwomwo ika ngwatela kusonekesela ulo wami kufulumende?”
-
Uno naumukumbulula ngachilihi?
CHISHINA UNALINANGULA
Ujike naulo vyapwa wana wakufuma kuli Yehova. Vyosena vivali vinahase kulingisa mutu apwenga wakusuuluka nakuwahilila, chikalu kaha nge mwalinganga mwaya muchima waYehova.
Kuhituluka
-
Uno mutu nahase kuzachisa ngachilihi kanawa ujike wenyi?
-
Mwomwo ika Mbimbiliya yahanjikila ngwayo mutu atela kulimbata kaha namukwavo muka-Kulishitu?
-
Chuma muka vahanjika muMbimbiliya chize chinahase kujiha ulo?
WANA VYAVIVULU
Uno kumbachila chipwe kusombokela “muli Mwata kaha” chalumbununa ika?
“Vihula Vyakufuma Kuli Vaka-Kutanga” (Kaposhi Kakutalila, July 1, 2004)
Tala jivindiyo jitatu jize najikukafwa usakule kanawa vyakulinga kutalisa kukulishikamisa chakufwila kukalimbata nakuulo.
Wana vyuma vyalingisa ndumbwetu umwe amone ngwenyi vyuma namuhane Yehova vyavilemu chikuma kuhambakana vize asezele.
Vyuma muka atela kushinganyekaho mutu shimbu kanda asakule kujiha ulo chipwe kulihandununa?
“Vumbikenunga ‘Chuma Chize Kalunga Nanungu Hamwe’” (Kaposhi Kakutalila, December 2018)
a Tala Chinyikilo chakusongo 4 chili nakuhanjika hakulihandununa numba tuhu kaheshi mulonga waukojiko.
b Muvisemwa vimwe, visemi veji kusakwilanga vana vavo mutu wakulimbata nenyi. Visemi kana kavatela kutala hajimbongo chipwe hapuho yamutu uze vali nakusaka alimbate namwanavoko. Oloze vatela kumona numba nge mutu kana azanga Yehova nyi chiku.
c Nge mwalyalukila, kaha chili kuli ove ivene kusakula kulihandununa chipwe kulimbata.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
