Vatu mukaye vakwechi vishinganyeka vyakulisezaseza kutalisa kukunwa wala. Vamwe vasaka kunwako tuwala twatundende lwola lumwe nge vali namasepa javo. Oloze veka kavasaka kunwa tuwala numba twatundendeko. Kaha vakwavo nawa veji kunwanga nakupenda. Jino Mbimbiliya yahanjika ika hakunwa wala?

1. Uno chapwa chakuhenga kunwa wala tahi?

Mbimbiliya kayakanyisa kunwa walako. Oloze yaulavila hamawana aze atuhana Kalunga. Yamba ngwayo, ‘vinyo vyeji kulingisanga muchima wamutu uwahilile.’ (Samu 104:14, 15) Mapwevo namalunga vamwe vakushishika vaze vavuluka muMbimbiliya vanwinenga wala.—WaChimoteu 1, 5:23.

2. Mbimbiliya yahanjika ika kuli vaze navasakula kunwa wala?

Yehova ahunga kunwa wala wauvulu, kaha nawa ahunga kupenda. (Wavaka-Ngalesha 5:21) Mazu enyi ngwawo: “Kanda mulikata navaka-kunwa chikuma vinyo[ko].” (Vishimo 23:20) Shikaho, nge tunasakula kunwa wala numba vene kupenge, katwatela kunwa wauvulu uze nautulingisa tuhone kushinganyeka kanawa, chipwe kuhanjika chipwe kulinga vyuma vyakuhingama, chipwe kulikokela pondeko. Nge cheji kutukaluhwilanga kunwa wala wamweseke, kaha twatela kulitwamina kunwa.

3. Natuvumbika ngachilihi vyuma navasakula vakwetu kutalisa kukunwa wala?

Mutu himutu atela kulisakwila kunwa wala chipwe chiku. Katwatela kuhana mulonga mutu uze mwasaka kunwako wala wamwesekeko, kaha nawa katwatela kushinjila mutu uze kasakile kunwa mangana anwengako. (Wavaka-Loma 14:10) Tweji kulihendanga kukunwa wala nge tunamono ngwetu nachinehela vakwetu ukalu. (Tanga Wavaka-Loma 14:21.) Katwasaka ‘kulinganyalisa etu vaveneko, oloze kunganyalisa vakwetu.’—Tanga Wavaka-Kolinde 1, 10:23, 24.

 LINANGULE VYAKUJIMINYINA

4. Lisakwile ove ivene kunwa chipwe chiku

Uno Yesu amwenenga ngachilihi kunwa wala? Hakusaka kukumbulula chihula kana, ivwa chakukomwesa chatete chize alingile. Tangenu Yowano 2:1-11, nakushimutwila havihula vino:

• Uno echi chakukomwesa chasolola nge Yesu amona ngachilihi wala navaze veji kuunwanga?

• Hakuwana nge Yesu kamwene kunwa wala kupwa chachipiko, uno vaka-Kulishitu vatela kumona ngachilihi mutu uze mwasakula kunwa wala?

Numba tuhu muka-Kulishitu akwechi lisesa lyakunwa wala, oloze echi kachalumbununa nge chapwa chamangana kunwanga lwola lwosenako. Tangenu Vishimo 22:3, nakukekesa vyuma vino umone numba nge watela kunwa wala nyi chiku:

• Nge nautambukisa minyau chipwe kuzachisa likina lyeka.

• Nge unemita.

• Nge ndotolo nakukanyisa kunwa wala.

• Nge cheji kukukaluhwilanga kunwa wala wamweseke.

• Nge jishimbi jafulumende kajakwitavisa kunwa walako.

• Nge uli namutu uze keshi nakusaka kunwako mwomwo kunyima chamukaluhwililenga kwecha kunwa.

Kutala hachilika chove chawenga chipwe hachilika cheka hatela kupwa wala tahi? Hakusaka umone vyuma navikukafwa kusakula vyakulinga, talenu VINDIYO.

Tangenu Wavaka-Loma 13:13 naWavaka-Kolinde 1, 10:31, 32. Hanyima yakutanga chisoneka hichisoneka shimutwilenu hachihula chino:

• Uno nauzachisa ngachilihi lundongi kana mangana usakule vyuma vize navivwisa Yehova kuwaha?

 5. Litomenenga seteko yawala naunwa

Nge nausaka kunwa wala, kaha anukanga chishina chino: Numba tuhu Yehova kakanyisa kunwa walako, oloze ahunga kunwa wala wauvulu. Mwomwo ika? Tangenu Hozeya 4:11, 18, nakushimutwila hachihula chino:

• Vyuma muka vinahase kusoloka nge mutu mwanwa wala wauvulu?

Vyuma muka navitukafwa twesekelenga kunwa wala? Twatela kupwa vakulikehesa nakutachikiza kuhehela chetu. Tangenu Vishimo 11:2, nakushimutwila hachihula chino:

• Mwomwo ika chapwila chamwaza kulitomena seteko yawala naunwa?

6. Vyuma muka navikafwa mutu akeheseko kunwa wala?

 CHISHINA UNALINANGULA

Yehova atuhana wala mangana tulivwisenga kuwaha, oloze ahunga kunwa wala wauvulu, kaha nawa ahunga kupenda.

Kuhituluka

• Vyuma muka yahanjika Mbimbiliya hawala?

• Uno kunwa wala wauvulu cheji kunehanga ukalu muka?

• Natusolola ngachilihi ngwetu twavumbika vyuma navasakula vakwetu kutalisa kukunwa wala?