CHILONGESA 44
Uno Vilika Vyosena Vyapwa Vyamwaza Kuli Kalunga Tahi?
Yehova asaka tulivwisenga kuwaha kuyoya nakupwangako navilika lwola lumwe. Uno vilika vyosena vyeji kumwivwisanga kuwaha tahi? Natuhasa kusolola ngachilihi ngwetu twazanga Yehova nge tuli nakusaka kwazana muchilika?
1. Mwomwo ika vilika vyavivulu vyapwila vyavipi kuli Yehova?
Unahase kulikomokela kutachikiza ngwove vilika vyavivulu kavyafuma muvisonekako, kaha vyeka vyafuma mukwitava chamakuli. Vilika kana vinahase kukundwiza kupanda chipwe kunangula chakwamba ngwavo mwono kawafwako. Vilika vimwe vyazama havyuma vyamakuli vafwelela vatu chipwe mwomwo yakufwelela muvyuma vize vamona ngwavo navivanehela kutokwa. (Isaya 65:11) Yehova ahuhumuna vaka-kumulemesa ngwenyi: “Lihandununenuko, . . . kaha kanda namukwata kuchuma chimwe chachipiko.”—Wavaka-Kolinde 2, 6:17. a
2. Uno Yehova amona ngachilihi vilika vize vahakako mangana vavumbike chikuma vatu?
Yehova atuhuhumuna tulihende ‘kukufwelela vatu.’ (Tanga Yelemiya 17:5.) Vilika vimwe vavihakilako kuvumbika vaka-kuyula navatu veka vavalemu. Vyeka nawa vavihakilako kuvumbika tutachikijilo twamafuchi chipwe kwanuka makumbi akusokoka. (WaYowano 1, 5:21) Vilika vyeka nawa vyakundwiza mauka amapolitiki, chipwe mauka eka. Uno Yehova mwevwa ngachilihi nge natuvumbikanga vatu chipwe mauka chikumanyi aze akundwiza vyuma vize ahunga ikiye?
3. Vyuma muka vinahase kulingisa chilika chipwenga chachipi?
Mbimbiliya yakanyisa “kunwa chikuma vinyo, nakulinga viwanyino vyaliuya, nakupenda.” (WaPetulu 1, 4:3) Havilika vimwe vatu veji kulinganga vyuma chamulingila nakulinga ujila. Hakusaka tutwaleho kupwa tumasepa jaYehova, twatela kulihenda kuvyuma kanevi vyamajilo.
LINANGULE VYAKUJIMINYINA
Wana omwo unahase kwivwisa Yehova kuwaha hakusakula kanawa vilika unahase kwazanamo.
4. Hunga vilika vize kavyevwisa Yehova kuwahako
Tangenu Wavaka-Efwesu 5:10, nakushimutwila havihula vino:
-
Vyuma muka twatela kutachikiza kachi nge tuli nakusaka kwazana muchilika?
-
Vilika muka vyalisala kungalila watwama?
-
Uno washinganyeka ngwove vilika kana vyeji kwivwisanga Yehova kuwaha tahi?
Chakutalilaho, kutala washinganyekaho lyehi omwo Kalunga amona chilika chakwanuka likumbi lyakusemuka tahi? MuMbimbiliya kavavulukamo muka-kulemesa Yehova uze alingile chilika chakwanuka likumbi lyakusemukako. Oloze vasonekamo vilika vivali vyakwanuka makumbi akusemuka vize valingile kuli vatu vaze kavamulemeselengako. Tangenu Kuputuka 40:20-22 naMateu 14:6-10. Kufumaho shimutwilenu havihula vino:
-
Uno vilika vyosena evi vivali vyakwanuka makumbi akusemuka vyalifwanyina halihi?
-
Kweseka neyi mijimbu, uno washinganyeka ngwove Yehova amona ngachilihi chilika chakwanuka likumbi lyakusemuka?
Unahase kulihulisa ngwove, ‘Uno nachipwa chachipi kuli Yehova nge nangwazana muchilika chakwanuka likumbi lyakusemuka chipwe chilika cheka chize kavetavisa muMbimbiliyako tahi?’ Tangenu Kulovoka 32:1-8. Kufumaho, talenu VINDIYO nakushimutwila havihula vino:
-
Mwomwo ika twatela kukekesanga tumone vyuma vize etavila Yehova?
-
Uno tunahase kulinga ngachilihi ngocho?
Mwakutachikijila vilika vize amona Kalunga kupwa vyavipi
-
Uno chilika kana chazama hakunangula chize chalimbalaka navisoneka tahi? Hakusaka kukumbulula chihula kana, tondatonda uwane okwo kwafuma chilika kana.
-
Kutala cheji kuvumbikanga chikuma vatu namauka natutachikijilo twalifuchi tahi? Tweji kuvumbikanga chikuma Yehova nakufwelela ngwetu ikiye mwakakumisa ukalu wosena uli mukaye.
-
Uno visemwa navyuma veji kulinganga hachilika kana vyalimbalaka najindongi jamuMbimbiliya tahi? Twatela kutwalaho lika kupwa navilinga vitoma.
5. Kafwa vakwenu vamone kulema chavyuma wafwelela
Chinahase kupwa chachikalu kukana, nge vakwenu vali nakukushinjila wazane muchilika chize ahunga Yehova. Valumbunwine mujila yamwaza kaha nawa mukuzangama, vyuma unasakula kulinga. Hakusaka kumona chakutalilaho chimwe chamwakulingila ngocho, talenu VINDIYO.
Tangenu Mateu 7:12, nakushimutwila havihula vino:
-
Kweseka neyi vesi, kutala watela kukanyisa vausoko wove vaze kavapwa Vinjihoko kwazana muchilika chimwe tahi?
-
Vyuma muka watela kulinga mangana vausoko wove vamone ngwavo wavazanga nakuvamona kupwa vavalemu, numba tuhu unakane kwazana navo muchilika?
6. Yehova asaka tuwahilile
Yehova asaka tulivwisenga kuwaha kupwa hamwe navatanga namasepa. Tangenu Muka-kwambulula 8:15, nakushimutwila hachihula chino:
-
Uno eyi vesi yasolola ngachilihi nge Yehova asaka tuwahililenga?
Yehova asaka vatu jenyi valivwisenga kuwaha kupwa hamwe navakwavo. Talenu VINDIYO nakumona kuwaha chize veji kulivwisanga kukukunguluka changalila.
Tangenu Wavaka-Ngalesha 6:10, nakushimutwila havihula vino:
-
Uno kulinga “vyuma vyamwaza” kuli vakwetu chasakiwa kwazana muvilika vize vyaya fuma tahi?
-
Uno nausaka kuhana mutu chuma mwomwo kuli chilika chimwe tahi, nyi mwomwo yakuchisakula kumuchima wove?
-
Lwola lumwe, Vinjiho jaYehova vavavulu veji kulivwishilanga hamwe kuwaha navana vavo nakuvahana nawa mawana. Kachi nge watwama navana, vyuma muka vimwe vize unahase kuvalingila?
VATU VAMWE NGWAVO: “Oho hafuma chilika kaheshi ukaluko, chikalu kaha muli nakulivwisa kuwaha natanga namasepa.”
-
Ove ngwove ngachilihi?
CHISHINA UNALINANGULA
Yehova asaka tulivwisenga kuwaha kupwa hamwe navatanga namasepa. Oloze asaka nawa tulihendenga kuvilika vize amona kupwa vyavipi.
Kuhituluka
-
Vihula muka twatela kulihulisa mangana tumone numba nge Yehova amona chilika kana kupwa chamwaza nyi chachipi?
-
Uno natukafwa ngachilihi vausoko namasepa vatachikize omwo twamona vilika vimwe?
-
Watachikiza ngachilihi ngwove Yehova asaka tulivwisenga kuwaha?
WANA VYAVIVULU
Wana vilika vimwe vize kavalinga Vinjiho jaYehovako.
Wana vyuma viwana vyatulingisa tufwelele ngwetu Kalunga amona chilika chakwanuka likumbi lyakusemuka kupwa chachipi.
Wana chuma alingile mukweze umwe mujila yakuzangama omu vamusekelekelenga vakwavo vaka-shikola mwomwo yakukana kwazana muchilika chaKulisimasi.
Vaka-Kulishitu vavavulu kavazana muchilika chaKulisimasiko. Uno veji kwivwanga ngachilihi hachuma kana?
“Vawana Jino Chuma Chamwaza” (Chihande chamuKaposhi Kakutalila)
a Tala Chinyikilo chakusongo 5 mangana umone vyuma watela kulinga nge vakwenu vali nakwazana muchilika.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
