CHILONGESA 45
Uno Kulihenda kuVihande vyaLifuchi naChiyulo Chalumbununa Ika?
Yesu anangwile ngwenyi vaka-kumukavangiza ‘kavatela kupwa vaka-kayeko.’ (Yowano 15:19) Echi chalumbununa nge kavatela kwazana muvihande vyamapolitiki chipwe mujijitako. Kuhanjika muchano, kachapwa chachashi lwola lwosena kulihenda kuvihande vyalifuchi nachiyuloko. Vatu vanahase kututoleka mwomwo yachuma kana. Uno natuhasa kulihenda ngachilihi kuvihande vyalifuchi nachiyulo nakutwalaho kupwa vakushishika kuli Yehova Kalunga?
1. Uno vaka-Kulishitu vamuchano vamona ngachilihi jifulumende javatu?
Etu vaka-Kulishitu tweji kuvumbikanga fulumende. Tweji kulinganga vyuma anangwile Yesu “[nakuhananga] vyuma vyaKesale kuli Kesale.” Echi chalumbununa nge tweji kukavangizanga jishimbi jamulifuchi twatwama. Chakutalilaho tweji kutelanga mitelo. (Mako 12:17) Mbimbiliya yanangula ngwayo jifulumende javatu jili nakuyula mwomwo Yehova ajitavisa jiyule. (Wavaka-Loma 13:1) Shikaho twatachikiza ngwetu jifulumende javatu jatwama nawata wamweseke kaha. Twafwelela ngwetu ukalu vali nakumona vatu navakaukumisa kaha kuli Kalunga naWangana wenyi.
2. Natusolola ngachilihi ngwetu twalihenda kuvihande vyalifuchi nachiyulo?
Tweji kulihendanga kuvihande vyamapolitiki ngana muze alingile Yesu. Omu vatu vamwene vyakukomwesa alingile Yesu, vasakile kumulingisa kupwa mwangana wavo hano hamavu, oloze ikiye akanyine. (Yowano 6:15) Mwomwo ika? Mwomwo ivene ahanjikile ngwenyi, “Wangana wami kaweshi wamukaye kanoko.” (Yowano 18:36) Hakupwa tutumbaji twaYesu, tweji kusololanga ngwetu twalihenda kuvihande vyalifuchi nachiyulo mujijila jajivulu. Chakutalilaho, katwazana mujitako. (Tanga Mika 4:3.) Kaha nawa, numba tuhu katwasaula lipandelo natutachikijilo veka valifuchiko, oloze katwalifukula kuvikikoko mwomwo kulinga ngocho nachisolola nge tuli nakuvilemesa. (WaYowano 1, 5:21) Katwakundwiza chipwe kupopolola liuka limwe lyamapolitiki chipwe twamina waliuka kanako. Eji hijijila jimwe tweji kusolwelangamo ngwetu twashishika namichima yetu yosena kufulumende yaKalunga chipwe ngwetu Wangana wenyi.
LINANGULE VYAKUJIMINYINA
Wana vyuma vinahase kutulingisa chitukaluhwile kulihenda kuvihande vyalifuchi nachiyulo, nomwo unahase kusakula vyuma vize navivwisa Yehova kuwaha.
3. Vaka-Kulishitu vamuchano valihenda kuvihande vyalifuchi nachiyulo
Yesu navaka-kumukavangiza vatusela chakutalilaho. Tangenu Wavaka-Loma 13:1, 5-7 naWaPetulu 1, 2:13, 14. Kufumaho, talenu VINDIYO nakushimutwila havihula vino:
-
Mwomwo ika twatela kuvumbikanga vaka-fulumende?
-
Jijila muka jimwe tweji kusolwelangamo ngwetu twaliluula kuli vakiko?
Nge mafuchi amwe ali nakulizungisa, mafuchi eka anahase kwamba ngwawo kaweshi nakwazana muvikokojola kanako, okunyi vali nakuvakundwiza mujijila jimwe. Uno chikupu kulihenda kuvihande vyalifuchi nachiyulo chalumbununa ika? Tangenu Yowano 17:16. Kufumaho, talenu VINDIYO nakushimutwila hachihula chino:
-
Uno kulihenda kuvihande vyalifuchi nachiyulo chalumbununa ika?
Naulinga ngachilihi nge vaka-fulumende vali nakusaka ulinge vyuma vize vyalimbalaka najishimbi jaKalunga? Tangenu Vilinga 5:28, 29. Kufumaho, talenu VINDIYO nakushimutwila havihula vino:
-
Nge jishimbi javatu jinalimbalaka najishimbi jaKalunga, kaha jimwe jilihi twatela kwononoka?
-
Washinganyeka ngwove vyuma muka vinahase kulingisa muka-Kulishitu akane kwononoka vaka-fulumende?
4. Lihendenga kuvihande vyalifuchi nachiyulo muvishinganyeka namuvilinga
Tangenu WaYowano 1, 5:21. Kufumaho, talenu VINDIYO nakushimutwila havihula vino:
-
Kweseka navindiyo, mwomwo ika Ayenge akanyinyine kukundwiza liuka lyamapolitiki chipwe kulifukula kulipandelo?
-
Uno washinganyeka ngwove chuma asakwile chakwoloka tahi?
Vyuma vyeka muka vinahase kutulingisa chitukaluhwile kulihenda kuvihande vyalifuchi nachiyulo? Talenu VINDIYO, nakushimutwila havihula vino:
-
Natuhasa ngachilihi kulihenda kuvihande vyalifuchi nachiyulo nge mafuchi ali nakuhema chakulitapa?
-
Uno natuhasa kulihenda ngachilihi kuvihande vyalifuchi nachiyulo numba tuhu vyuma vanakase vaka-mapolitiki navitukafwa chipwe kutunehela ukalu?
-
Uno vaka-mijimbu navatu tweji kulikatanga navo vanahase kulingisa ngachilihi chitukaluhwile kulihenda kuvihande vyalifuchi nachiyulo?
Vyuma muka atela kulihendako muka-Kulishitu mangana asolole ngwenyi keshi nakwazana muvihande vyalifuchi nachiyulo muvishinganyeka namuvilingako?
MUTU NAHASE KUHULISA NGWENYI: “Mwomwo ika kamwalifukwila kulipandelo chipwe kwimba mwaso walifuchiko?”
-
Uno naumukumbulula ngachilihi?
CHISHINA UNALINANGULA
Vaka-Kulishitu veji kukilikitanga valihende kuvihande vyamapolitiki muvishinganyeka, namuhanjikiso namuvilinga.
Kuhituluka
-
Vyuma muka twatela kuhana jifulumende javatu?
-
Mwomwo ika tweji kulihendelanga kuvihande vyamapolitiki?
-
Vyuma muka vinahase kulingisa chitukaluhwile kulihenda kuvihande vyalifuchi nachiyulo?
WANA VYAVIVULU
Vyuma muka tunahase kulisuula kuseza mangana tutwaleho kulihenda kuvihande vyalifuchi nachiyulo?
Vyuma muka yinahase kulinga tanga mangana yilizange kufungulula cheseko chakwazana muvihande vyalifuchi nachiyulo?
Mwomwo ika kuhakwila lifuchi lyove kachaneha ulemu wamwenemweneko?
Wana omwo unahase kusolola ngwove kawapwa uwakukayeko hakusakula milimo.
“Mutu hiMutu Mwalimbachila Chiteli Chenyivene” (Kaposhi Kakutalila, March 15, 2006)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
