CHILONGESA 46
Mwomwo Ika Watela Kulihana Kuli Kalunga Nakukumbapachisa?
Kulihana kuli Yehova chalumbununa kulomba kuli ikiye nakumushika ngwove naulemesanga ikiye kaha, nakulinga mwaya muchima wenyi mukuyoya chove. (Samu 40:8) Kufumaho jino hinavakumbapachisa. Echi nachilingisa vatu vamone ngwavo unalihane kuli Yehova. Kulihana kuli Yehova hichuma chachilemu chikuma chize tunahase kusakula kulinga. Vyuma muka navikukunyula usakule chuma kanechi chachilemu ngana, chize nachalumuna kuyoya chove?
1. Vyuma muka vyeji kukunyulanga mutu alihane kuli Yehova?
Zangi yikiko yeji kutukunyulanga tulihane kuli Yehova. (WaYowano 1, 4:10, 19) Mbimbiliya yatulweza ngwayo: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena, nangolo jenu josena.” (Mako 12:30) Tweji kusololanga ngwetu twazanga Kalunga, kuhichila muvyuma natuhanjika navize natulinga. Nganomu zangi yeji kulingisanga vapwevo nalunga valimbate, nakuzanga Yehova nawa cheji kutukunyulanga tulihane kuli ikiye nakutumbapachisa.
2. Uno Yehova eji kukisulanga ngachilihi Vinjiho jenyi vakumbapachisa?
Nge navakumbapachisa, kaha naupwa jino mutanga yaYehova yakuwahilila. Naumona omwo mwakusolwela zangi yenyi mujijila jajivulu, kaha nawa naupandama chikuma kuli ikiye. (Tanga Malaki 3:16-18.) Yehova mwapwa Iso, kaha nawa naupwa navandumbwove vakushipilitu vamukaye kosena vaze vamuzanga nakukuzanga nawa yove. (Tanga Mako 10:29, 30.) Oloze kuli vyuma vimwe watela kulinga numba vakumbapachise. Watela kulinangula hali Yehova umutachikize nakumuzanga, nakufwelela Mwanenyi. Chamakumishilo, watela kulihana kuli Yehova mangana umuzachilenga mukuyoya chove. Nge naulinga vyuma kanevi nakukumbapachisa, kaha naupwa mujila yakuya kukuyoya chahaya myaka. Mazu aKalunga ngwawo: ‘Lumbapachiso luli nakukulwila nayove nawa.’—WaPetulu 1, 3:21.
LINANGULE VYAKUJIMINYINA
Kekesa umone ovyo chapwila chachilemu kulihana kuli Yehova nakukumbapachisa.
3. Tuvosena twatela kusakula owo natuzachilanga
MuIsalele yakushikulu, vatu vamwe vashinganyekele ngwavo vanahase kulemesa Yehova oku nawa vali nakulemesa kalunga wamakuli Mbale. Oloze Yehova atumine kapolofweto kenyi Elija olole evi vishinganyeka vyavaIsalele vyakuhenga. Tangenu Vamyangana 1, 18:21, nakushimutwila hachihula chino:
-
Chuma muka vatelelele kusakula vaIsalele?
Ngana muze chapwile kuli vaIsalele, nayetu twatela kusakula owo natuzachilanga. Tangenu Luka 16:13, nakushimutwila havihula vino:
-
Mwomwo ika katwatela kulemesa Yehova oku nawa tuli nakulemesa mutu weka chipwe chuma cheka?
-
Natusolola ngachilihi kuli Yehova ngwetu tunasakula kulemesa ikiye kaha?
4. Shinganyeka omwo Yehova akuzanga
Yehova atuhana mawana amwaza amavulu. Uno yetu tunahase kumuhana vyuma muka? Talenu VINDIYO.
Mujijila muka jimwe muze Yehova nakusolwela zangi? Tangenu Samu 104:14, 15 naWaYowano 1, 4:9, 10, nakushimutwila havihula vino:
-
Mawana muka akuhana Yehova aze wamona kupwa amalemu chikuma?
-
Uno mawana kana akulingisa umumone ngachilihi?
Nge mutu natuhane wana uze tunazange chikuma, tweji kufwilanga kusolola kusakwilila chetu kumutu kana. Tangenu Lushimbi lwamuchivali 16:17, nakushimutwila hachihula chino:
-
Uno kushinganyeka havyuma akulingila Yehova chinakukunyula ufwile kumuhana ika?
5. Yehova mwakukisula mujijila jajivulu nge naulihana kuli ikiye
Vatu vavavulu vafwelela ngwavo kuya fuma chipwe kupwa hamilimo yayinene, chipwe kupwa najimbongo chikiko nachivalingisa vapwenga vakuwahilila. Uno mukiko tahi? Talenu VINDIYO, nakushimutwila havihula vino:
-
Numba tuhu ou lunga azangile kwasa ngunja, oloze mwomwo ika echelelele?
-
Asakwile kulihana kuli Yehova muchishishisa chakutwalaho kwasa ngunja. Uno washinganyeka ngwove asakwile chuma chakwoloka tahi? Mwomwo ika?
Shimbu kanda kaposetolo Paulu apwenga muka-Kulishitu, afwililile kupwa hachihela chaulemu. Alinangwile mwaya jishimbi javaYuleya kuli muka-kunangula uze ayile fuma. Oloze asezele vyuma vyosena mangana apwenga muka-Kulishitu. Uno Paulu aliveyele hachuma asakwile tahi? Tangenu Wavaka-Fwilipi 3:8, nakushimutwila havihula vino:
-
Mwomwo ika Paulu ahanjikilile ngwenyi vyuma alingile shimbu kanda apwenga muka-Kulishitu vyapwile “majilo” chipwe ngwetu swali?
-
Kuwaha muka chafuminemo?
-
Washinganyeka ngwove chiyoyelo chove nachipwa chamwaza nge nausakula kuzachila Yehova tahi? Mwomwo ika?
Omu Paulu alumukile nakupwa muka-Kulishitu, alivwishile kuwaha vyuma vyavivulu kuhambakana vize asezele
VATU VAMWE NGWAVO: “Ngunatachikiza ngwami ou ukiko muchano, olozenyi kanda ngulizange kungumbapachisa.”
-
Washinganyeka ngwove chakwoloka kulihana kuli Yehova tahi? Mwomwo ika?
CHISHINA UNALINANGULA
Zangi yikiko yeji kutukunyulanga tulihane kuli Yehova nakutumbapachisa.
Kuhituluka
-
Mwomwo ika natwambila ngwetu Yehova atamo kumulemesa nakumuzanga namuchima wetu wosena?
-
Uno Yehova eji kukisulanga ngachilihi Vinjiho jenyi vakumbapachisa?
-
Uno uli nakusaka kulihana kuli Yehova tahi?
WANA VYAVIVULU
Wana ovyo muka-kwimba myaso namuka-kwasa ngunja yarugby vasakwilile kulihana kuli Yehova.
Wana vyuma vikwavo vyatela kukulingisa ulihane kuli Yehova.
“Mwomwo Ika Mwatela Kulihana Kuli Yehova?” (Kaposhi Kakutalila, January 15, 2010)
Muvindiyo yino yamwaso, tala kuwahilila veji kupwanga nacho vaze veji kulihananga kuli Yehova.
Muchihande chakwamba ngwavo, “Ngwalihulishilenga haMyaka Yayivulu Ngwami, ‘Uno Tweji Kuyoyelanga Ika?’” wana vyuma vyakunywile pwevo umwe amone vyuma vyavilemu mukuyoya.
“Mbimbiliya Yeji Kwalumunanga Kuyoya chaVatu” (Chihande chamuKaposhi Kakutalila)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
