CHILONGESA 47
Kutala Unalizange Kukumbapachisa Tahi?
Vyuma unalinangula muMbimbiliya vinakulingisa utachikize vyavivulu hali Yehova. Pamo kuli vyuma vimwe unalumunako mukuyoya chove mangana uzachise vyuma unalinangula. Chipwe ngocho, pamo kuli chuma chimwe chili nakukuhonesa kulihana kuli Yehova mangana vakumbapachise. Muchilongesa chino, natushimutwila haukalu uze weji kuhonesanga vatu vavavulu kuvambapachisa namwakuukumishila.
1. Uno chinyingi chakuheta halihi watela kupwa nacho shimbu kanda vakumbapachise?
Hakusaka vakumbapachise, watela kupwa “nachinyingi chakwoloka chakutachikiza muchano.” (WaChimoteu 1, 2:4) Echi kachalumbununa nge watela kutachikiza mwakukumbulwila vihula vyosena vyamuMbimbiliya shimbu kanda vakumbapachiseko. Navaka-Kulishitu vaze vambapachishile lyehi veji kutwalangaho lika kulinangula. (Wavaka-Kolose 1:9, 10) Chipwe ngocho, watela kutachikiza kunangula chamaputukilo chamuMbimbiliya. Vakulwane muchikungulwilo navakukafwa umone numba nge uli nachinyingi chakutamo nyi chiku.
2. Vyuma muka vimwe watela kulinga shimbu kanda vakumbapachise?
Shimbu kanda vakumbapachise, watela ‘kupihilila nakwalumuka, nakukinduluka kuli Kalunga.’ (Tanga Vilinga 3:19.) Echi chalumbununa nge watela kwivwa kupihya hajishili unalinginga nakulomba Yehova akukonekele. Watela nawa kuzata nangolo umbile vilinga vyavipi nakufwila kuyoya mujila yize nayivwisa Kalunga kuwaha. Kaha nawa, watela kuputuka kukunguluka nakupwa muka-kwambulula wakuzeneka kumbapachisa mangana uyenganga nakwambulula hamwe nachikungulwilo.
3. Mwomwo ika kawatela kwechelela woma ukuhoneseko?
Vatu vamwe veji kwivwanga woma ngwavo kaveshi kukahasa kutesamo vyuma navamushika Yehovako. Kuhanjika muchano, lwola lumwe naulimbenjanga ngana muze valimbenjelenga vatu vakushishika vaze vavuluka muMbimbiliya. Oloze naYehova atachikiza vene ngwenyi natulimbenjanga mwomwo katwakupukako. (Tanga Samu 103:13, 14.) Eji kwivwanga kuwaha nge naukilikita noho hakumina ngolo jove, kaha nawa mwakukafwa. Yehova atufwelelesa ngwenyi, kakweshi chuma ‘nachihasa kutuhandununa kuzangi yenyiko.’—Tanga Wavaka-Loma 8:38, 39.
LINANGULE VYAKUJIMINYINA
Wana omwo kutachikiza kanawa Yehova nakwitavila kukafwa chenyi vinahase kukukafwa ukumise ukalu uze nausaka kukuhonesa kukumbapachisa.
4. Tachikiza kanawa Yehova
Uno watela kutachikiza Yehova kuheta halihi shimbu kanda vakumbapachise? Watela kumutachikiza kanawa mangana umuzange nakufwila kumwivwisa kuwaha. Talenu VINDIYO nakumona omwo vatu vamwe mukaye kosena vaze vanalinangulanga Mbimbiliya vanalinginga ngocho. Kufumaho, shimutwilenu hachihula chinakavangizaho.
-
Kweseka navindiyo, vyuma muka vanalinginga vatu vamwe mangana valizange vavambapachise?
Tangenu Wavaka-Loma 12:2, nakushimutwila havihula vino:
-
Kutala weji kuhuhwasananga vyuma vimwe yanangula Mbimbiliya, chipwe vize veji kunangulanga Vinjiho jaYehova tahi?
-
Nge mukiko, kaha vyuma muka watela kulinga hachuma kana?
5. Kumisa ukalu uze unahase kukuhonesa kukumbapachisa
Tuvosena tweji kumonanga ukalu nge tunasakula kulihana kuli Yehova nakutumbapachisa. Hakusaka kumona chakutalilaho chimwe, talenu VINDIYO, nakushimutwila havihula vinakavangizaho.
-
Kweseka navindiyo, ukalu muka atelele kukumisa Narangerel mangana azachile Yehova?
-
Uno kuzanga Yehova chamukafwile ngachilihi afungulule ukalu kana?
Tangenu Vishimo 29:25 naWaChimoteu 2, 1:7, nakushimutwila hachihula chino:
-
Vyuma muka vyeji kutukafwanga tufungulule vyeseko?
6. Fwelela ngwove Yehova mwakukafwa
Yehova mwakukafwa ulinge vyuma vize navimwivwisa kuwaha. Talenu VINDIYO, nakushimutwila havihula vinakavangizaho.
-
Kweseka navindiyo, chuma muka chapwile nakuhonesa ou muka-kulinangula Mbimbiliya kulisuula vamumbapachise?
-
Chuma muka alinangwile chize chamukafwile afwelele chikuma Yehova?
Tangenu Isaya 41:10, 13, nakushimutwila hachihula chino:
-
Mwomwo ika watela kufwelela ngwove naukatesamo vyuma naumushika Yehova hakulihana chove?
7. Sakwililanga chikuma Yehova hazangi yenyi
Kushinganyeka chikuma omwo Yehova akuzanga nachikulingisa umusakwililenga nakufwila kumuzachila haya myaka. Tangenu Samu 40:5, nakushimutwila hachihula chino:
-
Vyuma muka akulingila Yehova vize vyeji kukulingisanga umusakwilile chikuma?
Kapolofweto Yelemiya azangile Yehova namazu enyi, kaha nawa amusakwililile hakupwa nakutokwa chakumuzachila. Ambile ngwenyi: “Mazu ove angulingishile ngulisambe nakuwahilila mumuchima wami. Ove Yehova Kalunga . . . , ami vanguvulukila lijina lyove.” (Yelemiya 15:16) Kumbulula vihula vino:
-
Mwomwo ika chapwila hikutokwa chachinene kupwa Chinjiho chaYehova?
-
Kutala uli nakusaka vakumbapachise upwenga uChinjiho chaYehova tahi?
-
Kutala kuli chuma chili nakukuhonesa kulinga ngocho tahi?
-
Vyuma muka washinganyeka vize watela kulinga numba utengamo kukumbapachisa?
VATU VAMWE NGWAVO: “Nguli nakwivwa woma ngwami kangweshi kukahasa kutesamo vyuma vyosena nangumushika Yehovako.”
-
Uno omu mukiko uli nakwivwa nayove tahi?
CHISHINA UNALINANGULA
Yehova mwakukafwa ukumise ukalu uze unahase kukuhonesa kukumbapachisa.
Kuhituluka
-
Uno chinyingi chamuMbimbiliya chakuheta halihi watela kupwa nacho numba vakumbapachise?
-
Vyuma muka watela kwalumunako mukuyoya chove shimbu kanda vakumbapachise?
-
Mwomwo ika kawatela kwivwila woma kukumbapachisako?
WANA VYAVIVULU
Wana vyuma vyatela kukulingisa usakule kukumbapachisa.
“Kutala Munalizange Kumimbapachisa Tahi?” (Kaposhi Kakutalila, March 2020)
Linangule mwakukumishila ukalu uze unahase kukuhonesa kusakula vakumbapachise.
“Chuma Muka Nachinguhonesa Ami Kungumbapachisa?” (Kaposhi Kakutalila, March 2019)
Tala omwo lunga umwe akumishile ukalu waunene uze wamuhoneselenga kumumbapachisa.
Hakavanga, Ataa evwilenga woma kumumbapachisa. Tala vyuma vyamukunywile alinge chuma kanechi chachilemu.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
