CHILONGESA 50
Uno Tanga Yove Yinahase Kupwa Ngachilihi Yakuwahilila?—Chihanda 2
Vana vapwa wana wakufuma kuli Yehova. Shikaho asaka visemi vazakamenga wana kana. Yehova ahakako jindongi jize jinahase kukafwa visemi vatesemo mulimo kana. Jindongi jenyi jinahase kukafwa nawa vana valinge vyuma vize navikafwa tanga yipwenga yakuwahilila.
1. Jindongi muka jize Yehova ahana visemi?
Yehova asaka visemi vazangenga vana vavo nakushikamanga navo. Asaka nawa vakingenga vana vavo nakuvanangula kuzachisa jindongi jamuMbimbiliya. (Vishimo 1:8) Alweza visemi vamalunga ngwenyi: “Valelenunga [vana venu] . . . mukuhuhumuna chakuli Yehova.” (Tanga Wavaka-Efwesu 6:4.) Yehova eji kwivwanga kuwaha nge visemi navakavangiza jindongi jenyi hakulela vana vavo, kaha nawa nge kaveshi kuhana vakwavo mulimo wakuvalelela vanako.
2. Jindongi muka jize Yehova ahana vana?
Yehova alweza vana ngwenyi: “Ononokenunga kuli visemi jenu.” (Tanga Wavaka-Kolose 3:20.) Nge vana navavumbikanga visemi javo nakuvononoka, kaha navevwisa kuwaha Yehova navisemi javo. (Vishimo 23:22-25) Omu Yesu apwile kanyike ahanyine chakutalilaho chamwaza. Numba tuhu apwile wakukupuka, oloze ononokelenga visemi jenyi nakuvavumbika.—Luka 2:51, 52.
3. Vyuma muka watela kulinga mangana tanga yove yipandame kuli Kalunga?
Nge wapwa uchisemi, twafwelela wasaka vana vove vazange Yehova ngana muze wamuzanga yove. Uno unahase kuvakafwa ngachilihi vamuzange? Hakulinga chuma yahanjika Mbimbiliya ngwayo: “[Mazu aYehova] muwanangulenga vana venu, muwahanjikenga hakutwama mujizuvo jenu, nahakutambuka mujila.” (Lushimbi lwamuchivali 6:7) ‘Kunangula’ vanavuluka hano chalumbununa kunangula nakuhilukila hilukilaho. Pamo nayove watachikiza ngwove watela kuhilukila hilukila vyuma mangana vana vove vavyanukenga. Echi chisoneka chalumbununa nge watela kuwanangako lwola lwakushimutwila navana vove hali Yehova hakumbi hakumbi. Chapwa nawa chamwaza kunonekangako lwola lwakulemesanga Kalunga mwatanga chalumingo hichalumingo. Numba nge kawatwama navanako, unahase kulivwisa kuwaha kulinangula Mazu aKalunga chalumingo hichalumingo.
LINANGULE VYAKUJIMINYINA
Wana vyuma vize vinahase kukafwa vatu vosena mutanga vapwenga vakukingiwa nakuwahilila.
4. Nangulanga vana vove muzangi
Chinahase kupwa chachikalu kunangula mwana. Uno Mbimbiliya yinahase kukukafwa ngachilihi? Tangenu WaYakova 1:19, 20, nakushimutwila havihula vino:
-
Uno visemi vanahase kusolola ngachilihi ngwavo vazanga vana vavo nge vali nakushimutwila navo?
-
Mwomwo ika chisemi katela kuzangamisa mwanenyi oku napihililako? a
5. Kinganga vana vove
Hakusaka ukinge vana vove, watela kushimutwilanga namwana himwana hachihande chakulisavala, numba tuhu chinahase kupwa chasonyi kulinga ngocho. Talenu VINDIYO, nakushimutwila havihula vino:
-
Mwomwo ika cheji kukaluhwililanga visemi vamwe kuhanjika navana vavo chihande chakulisavala?
-
Uno visemi vamwe vanashimutwilanga ngachilihi navana vavo hachihande chakulisavala?
Ngana muze vapolofwetele lyehi, vilinga vyavatu mukaye kaSatana vili nakupihilako lika. Tangenu WaChimoteu 2, 3:1, 13, nakushimutwila hachihula chino:
-
Vaka-kuhuka vamwe vaze vanavuluka muvesi 13, shina vaka-kusavala vanyike. Jino mwomwo ika chapwila chachilemu visemi kunangula vana vavo chihande chakulisavala namwakulikingila kuli vaka-kusavala vanyike?
Uno watachikiza tahi?
Vinjiho jaYehova veji kulovolanga vinoma vyavivulu vyakukafwa visemi kunangula vana vavo chihande chakulisavala namwakuvakingila kuchina navavasavala. Chakutalilaho, tala vinoma vino:
-
Kingenu Vana Venu (vindiyo)
-
Linangule Kuli Mulongeshi Wamunene, kapetulu 10 na 32
-
“Kunangula Vana Chihande chaKulisavala chaLunga naPwevo” (Tonenu! Na. 5 2016)
6. Vumbikanga visemi jove
Vana vanahase kusolola ngwavo vavumbika visemi javo mujila navahanjikilamo navo. Talenu VINDIYO, nakushimutwila havihula vinakavangizaho.
-
Mwomwo ika chapwila chachilemu vana kushimutwilanga navisemi javo mukavumbi?
-
Uno mwana nahase kusolola ngachilihi ngwenyi avumbika visemi jenyi muhanjikiso?
Tangenu Vishimo 1:8, nakushimutwila hachihula chino:
-
Uno mwana atela kulinga ngachilihi nge visemi jenyi vanamulweze kulinga vyuma vimwe?
7. Lemeselanga Yehova hamwe natanga yove
Vinjiho jaYehova veji kunonekanga lwola chalumingo hichalumingo mangana valemese Kalunga mwatanga. Vyuma muka veji kulinganga halwola kanelu? Talenu VINDIYO, nakushimutwila havihula vino:
-
Vyuma muka navikafwa tanga yipwenganga nachilongesa chaKulemesa Kalunga mwaTanga chalumingo hichalumingo?
-
Vyuma muka atela kulinga chisemi mangana vatu mutanga valivwise kuwaha kulemesa Kalunga mwatanga?—Tala muvwimbimbi wakulivanga muchilongesa chino.
-
Chuma muka chinahase kulingisa chimikaluhwile kulinangwilanga hamwe mwatanga?
Kushikulu, Yehova asakile vaIsalele vashimutwilenga haVisoneka mwatanga lwola lwosena. Tangenu Lushimbi lwamuchivali 6:6, 7, nakushimutwila hachihula chino:
-
Uno unahase kukavangiza ngachilihi elu lundongi?
Vyuma munahase kulinga hakulemesa Kalunga mwatanga:
-
Hitulukenu vyakukunguluka.
-
Tangenu mujimbu wamuMbimbiliya uze tanga yenu nayilivwisa kuwaha nakushimutwilaho.
-
Nge watwama navana vavandende, kaha tutulula chipwe kupulita milimo yavanyike ha jw.org.
-
Nge watwama navana vavakweze, kaha shimutwilenu hachihande chimwe chahanjika havakweze chili ha jw.org.
-
Linga chimweso chamuMbimbiliya hamwe navana vove.
-
Talenu vindiyo yaha jw.org nakushimutwilaho.
VATU VAMWE NGWAVO: “Vanyike kaveshi kuhasa kwivwishisa Mbimbiliyako.”
-
Ove ngwove ngachilihi?
CHISHINA UNALINANGULA
Yehova asaka visemi vazange vana vavo, nakuvanangula nakuvakinga. Asaka nawa vana vavumbikenga visemi javo nakuvononoka. Kaha nawa asaka vatu mutanga vamulemeselenga hamwe.
Kuhituluka
-
Uno visemi vanahase kunangula ngachilihi vana vavo nakuvakinga?
-
Uno vana vanahase kusolola ngachilihi ngwavo vavumbika visemi javo?
-
Mwomwo ika chapwila chamwaza tanga kunoneka lwola lwakulemesanga Kalunga chalumingo hichalumingo?
WANA VYAVIVULU
Vishina muka vinahase kukafwa mwanove akapwe mutu wamwenemwene nge nakolo?
Wana vyuma yahanjika Mbimbiliya vize vinahase kukafwa vaze vali nakuzakama visemi javo vatushinakaji.
Tala vyuma vyakafwile lunga uze katachikijile mwakulelela vanako apwenga jino chisemi wamwenemwene.
Wana vyuma navikafwa visemi vamalunga vapwenga nausoko wamwaza navana vavo vamalunga.
“Visemi vaMalunga Vanahase Kupandama Ngachilihi kuVana Vavo vaMalunga?” (Kaposhi Kakutalila, January 1, 2012)
a Kweseka naMbimbiliya, lizu “kuzangamisa” kalyalumbununa kuyanjisa mutu chipwe kumukenyukilako, oloze lyatalisa kukunangula, nakutwaminyina nakwolola.—Vishimo 4:1.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
