Tuvosena tweji kusakulanga vyakuvwala najila natulilengelamo. Nge natukavangizanga jindongi jamuMbimbiliya, kaha natusakulanga uvwalo uze nawivwisa Yehova kuwaha. Tukekese jindongi jimwe.

1. Jindongi muka jinahase kutukafwa tusakulenga kanawa vwaliso namwakulilengela?

Twatela kusakulanga “uvwalo wakutamo, [nakuvwala] mukavumbi nakushinganyeka mwamangana,” nakupwa vaunyoji mangana tusolole ngwetu ‘twevwa Kalunga woma.’ (WaChimoteu 1, 2:9, 10) Shinganyeka hajindongi jino jiwana: (1) Uvwalo wetu watela kupwa “wakutamo.” Ngana muze weji kumonanga kukukunguluka chachikungulwilo, etu vatu jaYehova tweji kuvwalanga mujijila jakulisezaseza. Chipwe ngocho, vwaliso yetu, natewiso yetu, navinjiso yetu nasakwiso yetu yeji kusololanga nge twavumbika Kalunga uze tweji kulemesanga. (2) Kuvwala “mukavumbi” kachalumbununa nge twatela kuvwala mujila yize nayilingisa vatu vatwivwile peha yakusaka kulisavala chipwe yize nayikomwesa vakwetuko. (3) Tweji kusololanga ngwetu ‘twashinganyeka mwamangana’ hakuhona kulondezeza kala vwaliso nakulilenga chize vanasungumuka vatu. (4) Solokeso yetu yatela kusolola nge ‘twevwa Kalunga woma,’ nakulingisa nawa vakwetu vamone ngwavo tweji kulemesanga Kalunga wamuchano.—Wavaka-Kolinde 1, 10:31.

2. Mwomwo ika twatela kushinganyekela hali vandumbwetu nge tuli nakusakula uvwalo?

Numba tuhu tukwechi lisesa lyakulisakwila uvwalo, oloze twatela kushinganyeka omwo navevwa vakwetu havyuma natuvwala. Twatela kukilikita tulihende kukuhukanyisa vakwetu, oloze ‘tuvasuulwisenga nakuvalingila vyuma vyamwaza vyakuvatunga.’—Tanga Wavaka-Loma 15:1, 2.

3. Uno solokeso yetu yinahase kulingisa ngachilihi vatu vazange kulinangula muchano?

Numba tuhu lwola lwosena tweji kuvwalanga uvwalo wakutamo, oloze tweji kulinganga ngocho chikumanyi nge tuli nakuya kukukunguluka chachikungulwilo namumulimo wakwambulula. Twatela kuzata nangolo kuchina vwaliso yetu nayilingisa vatu vahone kuhaka mangana kumujimbu natuvambulila. Oloze solokeso yetu yatela kulingisa vatu vazange kulinangula vyavivulu ‘nakuwahisa nawa kunangula chakuli Mulwilo wetu.’—WaChituse 2:10.

 LINANGULE VYAKUJIMINYINA

4. Solokeso yamwaza yeji kusololanga nge twavumbika Yehova

Chuma muka chachilemu chatela kutulingisa tufwile kusoloka kanawa? Tangenu Kusoloka 4:11, nakushimutwila havihula vino:

• Uno vwaliso yetu yatela kupwa ngachilihi hakuwana nge tweji kwimanyinangako Yehova?

• Uno washinganyeka ngwove chapwa chakutamo kuhaka mangana kusolokeso yetu nge tuli nakuya kukukunguluka namumulimo wakwambulula tahi? Mwomwo ika?

 5. Vyuma navitukafwa tusakulenga kanawa uvwalo namwakulilengela

Talenu VINDIYO.

Numba tuhu uvwalo wetu naupwa wandando yayinene, chipwe yayindende, oloze watela kupwa waunyoji, kaha nawa wakulita navyuma tuli nakulinga. Tangenu Wavaka-Kolinde 1, 10:24 naWaChimoteu 1, 2:9, 10. Kufumaho, shimutwilenu ovyo twatela kulihendela kuuvwalo . . .

• wamajilo chipwe wakuhona kuta.

• wakutukwata chikuma, wahwanyanya chipwe kala uvwalo uze naulingisa vatu vatwivwile peha yakusaka kulisavala.

Numba tuhu vaka-Kulishitu kavatwama mujishimbi jize Kalunga ahanyine Moseko, oloze jishimbi kana jinahase kuvakafwa vatachikize vishinganyeka vyaYehova. Tangenu Lushimbi lwamuchivali 22:5, nakushimutwila hachihula chino:

• Mwomwo ika twatela kulihendela kuvwaliso nakukulilenga mujila yize nayilingisa pwevo asoloke nge lunga chipwe lunga asoloke nge pwevo?

Tangenu Wavaka-Kolinde 1, 10:32, 33 naWaYowano 1, 2:15, 16, nakushimutwila havihula vino:

• Mwomwo ika twatela kulihendela kusolokeso yize nayihukanyisa vatu vamungalila twatwama chipwe muchikungulwilo?

• Miyachi muka yavwaliso nakulilenga yavula kungalila watwama?

• Washinganyeka ngwove miyachi yimwe kayeshi kuhasa kupwa yakutamo kuli vaka-Kulishituko tahi? Mwomwo ika?

 CHISHINA UNALINANGULA

Nge natuvwala nakulilenga mujila yamwaza, kaha natusolola ngwetu twavumbika Yehova navakwetu.

Kuhituluka

• Mwomwo ika vwaliso yetu nakulilenga chetu vyapwila vyavilemu kuli Yehova?

• Jindongi muka jatela kutukafwa tusakulenga kanawa uvwalo namwakulilengela?

• Uno solokeso yetu yinahase kulingisa vatu vamone ngachilihi kwitava chetu?