CHILONGESA 53
Sakulanga Vyakuhemahema Vize Navivwisa Yehova Kuwaha
Yehova apwa ‘Kalunga wakuwahilila.’ (WaChimoteu 1, 1:11) Asaka tupwenganga vakuwahilila nakulivwisa kuwaha kuyoya. Eji kwivwanga kuwaha nge natuwanangako lwola lwakunoka. Muchilongesa chino, natumona omwo tunahase kuzachisa lwola lwakunoka mujila yize nayitwivwisa kuwaha, nakutusuulwisa nakwivwisa nawa Yehova kuwaha.
1. Vyuma muka twatela kushinganyekaho nge tuli nakusaka kusakula vyakuhemahema?
Vyuma muka wasaka kulinga halwola lwakunoka? Vamwe vasaka kuzachisa lwola lwavo lwakunoka hakutwama hembo nakutanga mikanda, chipwe kwivwilila kumyaso, chipwe kutala jivindiyo chipwe kuya haInternet. Veka veji kuzachisanga lwola kana hakupwa hamwe namasepa nakuvuwa jikinga, chipwe kuya kulwiji nakuhala chipwe kuhemahema cheka. Chamokomoko navyuma twasaka, twatela kusakulanga vyakuhemahema vize “etavila Mwata.” (Wavaka-Efwesu 5:10) Chapwa chachilemu kutachikiza chishina kana mwomwo vyakuhemahema vyavivulu vize vazanga vatu vyeji kukundwizanga ulyanyi, naujila, nakupanda navyuma vyeka vize ahunga Yehova. (Tanga Samu 11:5.) Vyuma muka navitukafwa tusakulenga kanawa vyakuhemahema?
Nge natusakula masepa vaze vazanga Yehova, kaha navatukafwa tupwenga navilinga vyamwaza nakusakulanga kanawa vyakuhemahema. Ngana muze twalinangwile muchilongesa 48, “ou mwatambuka navaka-mangana mwakapwa muka-mangana.” Oloze nge natulikatanga chikuma navatu vaze kavasaka jishimbi jaKalungako, kaha ‘natukamona lupi.’—Vishimo 13:20.
2. Mwomwo ika chapwila chachilemu kukehesako lwola lwakuhema?
Numba tuhu natusakula vyakuhemahema vyamwaza, oloze katwatela kuzachisa lwola lwaluvulu kuvyakuhemahema kanako. Echi nachitukafwa tupwenga nalwola lwaluvulu lwakulinga vyuma vyavilemu chikuma. Mbimbiliya yatulweza ‘tuzachisenga kanawa lwola lwetu.’—Tanga Wavaka-Efwesu 5:15, 16.
LINANGULE VYAKUJIMINYINA
Linangule mwakusakwila kanawa vyakuhemahema.
3. Lihende kuvyakuhemahema vyavipi
Mwomwo ika twatela kusakwilanga kanawa vyakuhemahema? Talenu VINDIYO, nakushimutwila havihula vino:
-
Uno kuhema chapwilenga muLoma kushikulu chalifwana ngachilihi navyakuhemahema vimwe vyamakumbi ano?
-
Kweseka navindiyo, vyuma muka alinangwile Danny kutalisa kuvyakuhemahema?
Tangenu Wavaka-Loma 12:9, nakushimutwila hachihula chino:
-
Uno eyi vesi nayikukafwa ngachilihi usakulenga kanawa vyakuhemahema?
Vyuma muka vimwe vize ahunga Yehova? Tangenu Vishimo 6:16, 17 naWavaka-Ngalesha 5:19-21. Hanyima yakutanga chisoneka hichisoneka shimutwilenu hachihula chino:
-
Vyuma muka vanavuluka mujivesi kana vize vinalisale muvyakuhemahema vyamakumbi ano?
Vihula vize navikukafwa usakulenga kanawa vyakuhemahema
Lihulise ngwove:
-
Uno mukuhema kana mwaliweza navyuma vize ahunga Yehova tahi?
-
Uno cheji kungulilanga lwola lwakulinga vyuma vyavilemu tahi?
-
Kutala cheji kungulingisanga ngulikatenga chikuma navatu vaze kavazanga Yehovako tahi?
Chapwa chamwaza kulihenda kuvyuma vize navitunehela ponde. Shikaho, nachiwaha kulihenda kuvyakuhemahema vize tunamono ngwetu vinahase kutwenyeka
4. Zachisanga kanawa lwola lwove
Talenu VINDIYO, nakushimutwila hachihula chino:
-
Numba tuhu ou ndumbwetu katalilenga vyuma vyavipiko, oloze ukalu muka wapwileho?
Tangenu Wavaka-Fwilipi 1:10, nakushimutwila hachihula chino:
-
Uno eyi vesi nayitukafwa ngachilihi tutachikize lwola twatela kuzachisa kukulihizumuna?
5. Sakula vyakuhemahema vyamwaza
Numba tuhu vyakuhemahema vimwe vyeji kwivwisanga Yehova kupihya, oloze kuli vyakuhemahema vyeka vyavivulu unahase kulivwisa kuwaha vize kavyevwisa Yehova kupihyako. Tangenu Muka-kwambulula 8:15 naWavaka-Fwilipi 4:8, nakushimutwila hachihula chino:
-
Kuhema muka chamwaza chize wazanga?
Unahase kulivwisa kuwaha vyakuhemahema vyamwaza
VATU VAMWE NGWAVO: “Kachapwa chachipi kutala chipwe kwazana muvyakuhemahema vize vyakundwiza ulyanyi, chipwe ujila chipwe kupandako, kachi nge kangweshi kuvilingako.”
-
Ove ngwove ngachilihi?
CHISHINA UNALINANGULA
Yehova asaka tusakulenga vyakuhemahema vyamwaza nakulivwisavyo kuwaha.
Kuhituluka
-
Vyakuhemahema muka vatela kulihendako vaka-Kulishitu?
-
Mwomwo ika twatela kushinganyekanga halwola natuzachisa kuvyakuhemahema?
-
Uno uli nakusaka kusakula vyakuhemahema vize navivwisa Yehova kuwaha tahi? Mwomwo ika?
WANA VYAVIVULU
Tanga utachikize owo atwama nangolo jakutusakwila vyakuhemahema.
Wana vyuma navikukafwa usakulenga kanawa vyakuhemahema.
“Uno Kulihizumuna Chenu Cheji Kuminganyalisanga Tahi?” (Kaposhi Kakutalila, October 15, 2011)
Muchihande chakwamba ngwavo “Ngunahonesa Muchima Wami Wakumonanga Vatu Ulumbi,” wana vyuma vyalingishile lunga umwe alumuneko vyakuhemahema.
“Mbimbiliya Yeji Kwalumunanga Kuyoya chaVatu” (Kaposhi Kakutalila, July 1, 2010)
Wana chuma mwasakula chisemi wapwevo kutalisa kuvyakuhemahema vize vyakundwiza mijimbu yavandemone.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
