Yesu ikiye Mutwe wachikungulwilo chavaka-Kulishitu. (Wavaka-Efwesu 5:23) Makumbi ano, Yesu apwa mwangana mwilu, kaha ali nakutetekela vaka-kumukavangiza kuhichila muli “ndungo wakushishika wakuzangama.” (Tanga Mateu 24:45.) Yesu ikiye atongola ou “ndungo” nakumuhana wata. Chipwe ngocho, ou ndungo atela kuliluula kuli Kulishitu nakuzachila vandumbu jaKulishitu. Uno ou ndungo apwa iya? Kaha eji kutuzakamanga ngachilihi?

1. Uno “ndungo wakushishika wakuzangama” apwa iya?

Lwola lwosena, Yehova nahanenga vatu jenyi jindongi kuhichila muli mutu umwe chipwe lizavu lyavatu. (Malaki 2:7; WavaHepeleu 1:1) Kufuma hakufwa chaYesu, vaposetolo navakulwane vapwile muYelusalema vakiko vapwile nakutwaminyina chikungulwilo. (Vilinga 15:2) Makumbi ano, lizavu lyalindende lyavakulwane lize vavuluka ngwavo Lizavu lyaKutwaminyina lyaVinjiho jaYehova, lili nakulinga mwomumwe hakuwahisa kulya chakushipilitu nakutwaminyina mulimo wakwambulula. Eli lizavu likiko vavuluka ngwavo, “ndungo wakushishika wakuzangama, uze vatongwele kuli [Yesu].” (Mateu 24:45a) Vosena vaze vatwama muLizavu lyaKutwaminyina vapwa vaka-Kulishitu vakuwavisa nashipilitu, vaze vatalilila kukapwa hamwe naKulishitu muWangana wenyi wamwilu nge kuyoya chavo chahamavu chinakumu.

2. Uno kulya muka chakushipilitu eji kutuhananga ndungo wakushishika?

Yesu ambile ngwenyi ndungo wakushishika mwakahananga vakwavo vaka-Kulishitu “kulya chavo halwola lwakutamo.” (Mateu 24:45b) Ngana muze kulya cheji kutukafwanga tupwenga vakujikiza nakulikangula, nakulya chakushipilitu, kulumbununa jindongi jamuMazu aKalunga, cheji kutuhananga ngolo tutwaleho kupwa vakushishika kuli Yehova nakuzata mulimo atuhana Yesu. (WaChimoteu 1, 4:6) Kulya chakushipilitu tweji kuchitambwilanga kukukunguluka chachikungulwilo, nachachihanda, nachangalila, namujivindiyo namumikanda yahanjika haMbimbiliya. Kaha cheji kutukafwanga tutachikize mwaya muchima waKalunga nakuzamisa usoko wetu naikiye.

 LINANGULE VYAKUJIMINYINA

3. Vatu jaYehova vasakiwa kuzata mukulonga

Lizavu lyaKutwaminyina lyeji kulongesanga mwakuzachila mulimo waVinjiho jaYehova hakuvatetekela kuli Yesu. Omu mukiko chapwile nakuli vaka-Kulishitu vakulivanga. Talenu VINDIYO.

Tangenu Wavaka-Kolinde 1, 14:33, 40, nakushimutwila hachihula chino:

• Uno eji jivesi jasolola ngachilihi nge Yehova asaka Vinjiho jenyi vazatenga mukulonga?

4. Ndungo wakushishika eji kulongesanga mwakuzachila mulimo wetu wakwambulula

Mulimo wakwambulula ukiko mulimo waulemu chikuma vazachilenga vaka-Kulishitu vakulivanga. Tangenu Vilinga 8:14, 25, nakushimutwila havihula vino:

• Uno jindongi vakavangijilenga vaka-Kulishitu vakulivanga hakuzata mulimo wakwambulula jafuminenga kuli iya?

• Uno Petulu naYowano vakwileko ngachilihi kujindongi jafumine kuli vakwavo vaposetolo?

Mulimo wakwambulula ukiko mulimo waulemu chikuma uze veji kulongesanga kuLizavu lyaKutwaminyina. Talenu VINDIYO.

 Yesu ashindakanyine hakulema chamulimo wakwambulula. Tangenu Mako 13:10, nakushimutwila havihula vino:

• Mwomwo ika Lizavu lyaKutwaminyina lyamwena mulimo wakwambulula kupwa waulemu?

• Mwomwo ika twasakiwila “ndungo wakushishika wakuzangama” alongese ou mulimo wamukaye kosena?

5. Ndungo wakushishika eji kutuhananga jindongi

Lizavu lyaKutwaminyina lyeji kuhananga jindongi vaka-Kulishitu mukaye kosena. Uno lyeji kusakulanga ngachilihi jindongi jakuvahana? Wana omwo lizavu lyakutwaminyina lyavaka-Kulishitu vakulivanga lyalingilenga ngocho. Tangenu Vilinga 15:1, 2, nakushimutwila havihula vino:

• Chihande muka chalingishile vaka-Kulishitu vamwe vakulivanga valikokojwese?

• Uno Paulu naMbalanape navakwavo vayile kuli veya mangana vavakafwe kuvatula chihande kana?

Tangenu Vilinga 15:12-18, 23-29, nakushimutwila hachihula chino:

• Uno shimbu kanda vakulwane vamulizavu lyakutwaminyina vasakule vyakulinga, chuma muka valingile mangana Kalunga avakafwe?—Tala vesi 12, 15, na 28.

Tangenu Vilinga 15:30, 31 na 16:4, 5, nakushimutwila havihula vino:

• Uno vaka-Kulishitu vakulivanga vevwile ngachilihi omu vatambwile jindongi jakufuma kulizavu lyakutwaminyina?

• Uno Yehova avakiswile ngachilihi hakwononoka chavo?

Tangenu WaChimoteu 2, 3:16 naWaYakova 1:5, nakushimutwila hachihula chino:

• Uno Lizavu lyaKutwaminyina lyeji kupendaminanga haka nge lili nakusakula vyakulinga?

 CHISHINA UNALINANGULA

Lizavu lyaKutwaminyina likiko lyapwa “ndungo wakushishika wakuzangama” uze vatongola kuli Kulishitu. Lyeji kuhananga jindongi nakulya chakushipilitu kuli vaka-Kulishitu mukaye kosena.

Kuhituluka

• Iya atongola “ndungo wakushishika wakuzangama”?

• Uno Lizavu lyaKutwaminyina lyeji kutuzakamanga ngachilihi?

• Kutala wafwelela ngwove Lizavu lyaKutwaminyina likiko vene “ndungo wakushishika wakuzangama” tahi?