Nge tuli hamwe navandumbwetu, tweji kwivwanga ngana muze evwile Mwangana Ndavichi uze ambile ngwenyi: “Omwo chawaha nomwo chayema vatu muundumbwavo kutwama hamwe mukulinunga!” (Samu 133:1) Kulinunga chetu kachalijila chiveneko. Tuvosena twatela kukilikita mangana tutwame mukulinunga.

1. Chuma muka chapwa chakulipwila kuvatu jaKalunga?

Nge uli kuchihela chaungeji, kaha hinauya nakukunguluka, pamo kaweshi kwivwa lilimi navahanjikako, olozenyi kaweshi kwivwa nge unajimbalako. Mwomwo ika? Mwomwo tuvosena tweji kulinangulanga Mbimbiliya kuzachisa mikanda yoyimwe. Kaha nawa tweji kuzatanga nangolo mangana tulisolwele zangi. Chamokomoko nokwo twatwama, tuvosena tweji ‘kusanyikanga halijina lyaYehova mangana tulinunge hamwe nakumulemesa.’—Zefwanyiya 3:9, kwinyikila chamwishi.

2. Vyuma muka watela kulinga mangana ulinunge navakwenu?

Mbimbiliya ngwayo, “Lizangenunga chikuma navakwenu nazangi yakufuma kumuchima.” (WaPetulu 1, 1:22) Uno unahase kukavangiza ngachilihi mazu kana? Kanda kutokomenyanga hatutenga twavakwenuko, oloze talanga havilinga vyavo vyamwaza. Kanda kulikatanga kaha navaze vatwama nachiyoyelo nge echi chove, navaze kaha vasaka vyuma wasakako, oloze fwila kulitachikiza navandumbwetu vakulisezaseza. Twatela nawa kuzata nangolo mangana tumbile vishinganyeka vyakumonanga vakwetu ulumbi.—Tanga WaPetulu 1, 2:17. a

3. Vyuma muka naulinga nge unalimbalaka nandumbwove?

Numba tuhu katwakupukako, oloze twapwa vakulinunga. Lwola lumwe tweji kulimbalakanga chipwe kulivwisa kupihya. Echi chikiko Mazu aKalunga atulwezela ngwawo ‘tulikonekelenga navakwetu.’ Amba nawa ngwawo: “Nge muze Yehova amikonekelele namuchima wakusuuluka, nayenu mwatela kulinga mwomumwe.” (Tanga Wavaka-Kolose 3:13.) Yehova eji kutukonekelanga numba tuhu tweji kumwivwisanga kupihya mapapa kakavulu. Shikaho asaka nayetu tukonekelenga vandumbwetu. Nge unamono ngwove unevwisa mukwenu kupihya, kaha muwane mangana mulivwasane.—Tanga Mateu 5:23, 24. b

 LINANGULE VYAKUJIMINYINA

4. Mbila muchima wakumona vakwenu ulumbi

Twazanga vandumbwetu vosena. Chipwe ngocho, chinahase kutukaluhwila kulikata navatu vaze twalihandununa navo muvyuma vimwe. Vyuma muka navitukafwa? Tangenu Vilinga 10:34, 35, nakushimutwila havihula vino:

• Yehova eji kwitavilanga vatu veka naveka vosena vapwenga Vinjiho jenyi. Uno echi nachikukafwa umonenga ngachilihi vatu vaze walihandununa navo muvyuma vimwe?

• Vyuma muka vyeji kulingisanga vatu vakungalila watwama valimonenga ulumbi, kaha naulihendako ngachilihi?

Tangenu Wavaka-Kolinde 2, 6:11-13, nakushimutwila hachihula chino:

• Vyuma muka navikukafwa utwaleho lika kuzanga vandumbwove vosena?

5. Konekelanga vakwenu namuchima wakusuuluka nakuneha kuunda

Yehova eji kutukonekelanga namuchima wakusuuluka numba tuhu ikiye kasakiwa kumukonekelako. Tangenu Samu 86:5, nakushimutwila havihula vino:

• Uno eyi vesi yasolola ika hali Yehova?

• Uno wasakwilila Yehova hamuchima wenyi wakukonekela tahi? Mwomwo ika?

• Vyuma muka vinahase kutulingisa chitukaluhwile kutwama mukuunda navakwetu?

Uno tunahase kulondezeza ngachilihi Yehova nakutwama mukuunda navandumbwetu? Tangenu Vishimo 19:11, nakushimutwila hachihula chino:

• Nge mutu nakwivwisa kupihya, vyuma muka naulinga mangana mutwame mukuunda?

 Lwola lumwe tweji kwivwisanga vakwetu kupihya. Jino vyuma muka twatela kulinga halwola kana? Talenu VINDIYO, nakushimutwila hachihula chinakavangizaho.

• Kweseka navindiyo, vyuma muka alingile ou ndumbwetu mangana anehe kuunda?

 CHISHINA UNALINANGULA

Naukafwa chikungulwilo chitwame mukulinunga nge naukonekelanga vakwenu nakuzanga vandumbwove vosena.

Kuhituluka

• Vyuma muka navikukafwa wechenga kumona vandumbwove ulumbi?

• Vyuma muka naulinga nge unalimbalaka nandumbwove?

• Uno uli nakusaka kulondezeza Yehova hakukonekelanga vakwenu tahi? Mwomwo ika?