CHILONGESA 57
Vyuma Muka Watela Kulinga Nge Unalingi Shili Yayinene?
Numba tuhu wazanga chikuma Yehova nakukilikita ulihende kukulinga vyuma vize navimwivwisa kupihya, oloze lwola lumwe unahase kulimbenja. Chipwe ngocho, jishili jimwe japwa jajinene. (Wavaka-Kolinde 1, 6:9, 10) Nge unalingi shili yayinene, tachikiza ngwove Yehova kechele kukuzangako. Alizanga kukukonekela nakukukafwa.
1. Vyuma muka twatela kulinga numba Yehova atukonekele?
Vaze vazanga Yehova veji kwivwanga kukola kumuchima nge vanamono ngwavo vanalingi shili yayinene. Oloze chuma cheji kuvavendejekanga shina mazu aze Yehova afwelelesa vatu jenyi ngwenyi: “Numba tuhu jishili jenu jinapu nge ulombo uchila, oloze najitoma to nge lihina litoma.” (Isaya 1:18) Nge natupihilila nakwalumuka, kaha Yehova mwatukonekela chikupu. Vyuma muka tweji kulinganga hakupihilila nakwalumuka? Tweji kuliveyanga havyuma tunalingi, nakwecha kuvilinga nakulembelela Yehova atukonekele. Kufumaho, tweji kuzatanga nangolo tumbile vishinganyeka najitato jize jatulingishile tulinge shili kana, nakukilikita nawa tuyoye kweseka najishimbi jaYehova jitoma.—Tanga Isaya 55:6, 7.
2. Uno Yehova eji kuzachisanga ngachilihi vakulwane vatukafwe nge tunalingi shili?
Yehova atulweza ngwenyi nge tunalingi shili yayinene, twatela “[kusanyika] vakulwane vachikungulwilo.” (Tanga WaYakova 5:14, 15.) Ava malunga vatongola vazanga Yehova namikoko jenyi. Vatamo kutukafwa mangana tupwenga cheka nausoko wamwaza naYehova.—Wavaka-Ngalesha 6:1.
Uno vakulwane veji kutukafwanga ngachilihi nge tunalingi shili yayinene? Vakulwane vavali chipwe vatatu navatwolola kuzachisa Visoneka. Navatukolezeza nawa nakutulweza vyuma twatela kulinga mangana tuzeneke kulinga cheka shili. Vanahase kutukanyisa kulinga vyuma vimwe muchikungulwilo swi nomu natukapwa cheka vakulikangula kushipilitu. Hakusaka kukinga chikungulwilo kuvilinga vyavipi, vakulwane veji kufumisanga mutu muchikungulwilo, nge kapihililile nakwalumukako.
LINANGULE VYAKUJIMINYINA
Wana omwo eji kutukafwanga Yehova nge tunalingi shili yayinene.
3. Kulitavila shili yetu kuli Yehova nachitukafwa tupwenga cheka nausoko naikiye
Kala shili natulinga nayivwisa Yehova kupihya, shikaho twatela kulitavilayo kuli ikiye. Tangenu Samu 32:1-5, nakushimutwila hachihula chino:
-
Mwomwo ika chapwila chamwaza kulitavila jishili jetu kuli Yehova muchishishisa chakujisweka?
Nge tunalitavila lyehi jishili jetu kuli Yehova, twatela nawa kulweza vakulwane mangana vatukafwe. Talenu VINDIYO, nakushimutwila hachihula chinakavangizaho.
-
Kweseka navindiyo, uno vakulwane vakafwile ngachilihi Canon akinduluke kuli Yehova?
Twatela kupwa vakukasunuka nakulweza vakulwane muchano mwomwo vavahakako mangana vatukafwe. Tangenu WaYakova 5:16, nakushimutwila hachihula chino:
-
Uno kulweza vakulwane muchano, nachivakafwa ngachilihi vawane kanawa mwakutukafwila?
Litavile shili yove, nakulweza vakulwane muchano nakwitavila Yehova akukafwe
4. Kuwaha chatwama hakufumisa mutu muchikungulwilo
Nge mutu uze nalingi shili yayinene mwakana kukavangiza jishimbi jaYehova, kaha keshi kutwalaho kupwa cheka muchikungulwiloko. Navamufumisa muchikungulwilo kaha katweshi kulikatanga nenyiko, chipwe vene kumuhanjikisa. Tangenu Wavaka-Kolinde 1, 5:6, 11 naWaYowano 2, 9-11, nakushimutwila hachihula chino:
-
Ngana muze chimbalwila cheji kufutunwisanga muunga, uno kulikata namutu uze nakane kupihilila nakwalumuka nachineha ukalu muka muchikungulwilo?
Vatu vavavulu vaze vafumishile muchikungulwilo vakinduluka. Mwomwo ika? Mwomwo yakumona jino ngwavo chuma valingile chachipi, numba tuhu halwola vavazangamishile vevwile kupihya. (Samu 141:5) Talenu VINDIYO, nakushimutwila hachihula chinakavangizaho.
-
Kweseka navindiyo, uno kufumisa Sonja muchikungulwilo chamukafwile ngachilihi?
Uno kufumisa mutu muchikungulwilo cheji . . .
-
kunehanga ngachilihi kavumbi halijina lyaYehova?
-
kusololanga ngachilihi nge Yehova apwa wachiyulo nazangi?
5. Yehova mwatukonekela nge natupihilila nakwalumuka
Yesu ahanjikile chifwanyisa chize cheji kutukafwanga tutachikize omwo eji kwivwanga Yehova nge mutu napihilila nakwalumuka. Tangenu Luka 15:1-7, nakushimutwila hachihula chino:
-
Uno echi chifwanyisa chatunangula ika hali Yehova?
Tangenu Ezekele 33:11, nakushimutwila hachihula chino:
-
Chuma muka chachilemu atela kulinga mutu mangana asolole ngwenyi napihilila nakwalumuka?
Yehova azakama chikuma mikoko jenyi ngana mwakafunga
VATU VAMWE NGWAVO: “Nguli nakwivwa woma ngwami nge nangulweza vakulwane shili yami, kaha navangufumisa muchikungulwilo.”
-
Uno vyuma muka nauhanjika mangana ukafwe mutu wakufwana ngana?
CHISHINA UNALINANGULA
Nge tunalingi shili yayinene oloze tunevu kukola kumuchima hachuma tunalingi nakufwila kwecha kulinga vyuma vyavipi, kaha Yehova mwatukonekela.
Kuhituluka
-
Mwomwo ika chapwila chamwaza kulitavila jishili jetu kuli Yehova?
-
Vyuma muka twatela kulinga mangana Yehova atukonekele?
-
Mwomwo ika twatela kuya kuli vakulwane vatukafwe nge tunalingi shili yayinene?
WANA VYAVIVULU
Wana omwo Yehova atetelelele lunga umwe ngana muze vasoneka hali Isaya 1:18.
Uno kufumisa mutu muchikungulwilo nachikafwa ngachilihi vatu vosena muchikungulwilo?
“Kufumisa Mutu muChikungulwilo Chapwa Chamwaza” (Kaposhi Kakutalila, April 15, 2015)
Wana mwakulumbunwinyina mutu uze kapwa Chinjihoko, chihande chakufumisa mutu muchikungulwilo.
Muchihande chakwamba ngwavo, “Ngwatelelele Kukinduluka Kuli Yehova,” wana vyuma vyalingishile lunga uze asezele muchano amone ngwenyi Yehova ikiye amukindulwishile.
“Mbimbiliya Yeji Kwalumunanga Kuyoya chaVatu” (Kaposhi Kakutalila, April 1, 2012)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
