CHILONGESA 59
Unahase Kutwalaho Lika Kumika Numba Nge Vali Nakukuyanjisa
Vaka-Kulishitu vosena vanahase kuvafumbukila chipwe kuvayanjisa oholyapwa chipwe kulutwe. Uno echi chatela kutwivwisa woma tahi?
1. Mwomwo ika twatela kwijivila ngwetu navatuyanjisanga?
Mbimbiliya yahanjika hatoma ngwayo: “Vosena vaze vafwila kuyoya mwaya muchima wakuzachila Kalunga hakulikata naKulishitu Yesu, navakiko navavayanjisanga.” (WaChimoteu 2, 3:12) Yesu vamuyanjishile mwomwo kapwile wamukaye kaSatanako. Katweshi kulikomokelako nge navatuyanjisa kujifulumende nakumauka akwitava, mwomwo nayetu nawa katwapwa tuvaka-kayeko.—Yowano 15:18, 19.
2. Natulizanga ngachilihi vyaluyanjisa?
Twatela kuzamisa lufwelelo lwetu muli Yehova oholyapwa. Hakumbi hakumbi, wanangako lwola lwakulomba kuli ikiye nakutanga Mazu enyi. Kaha nawa kungulukanga lwola lwosena. Kulinga vyuma kana nachikukafwa umike muluyanjisa, numba nge luyanjisa kana nalufuma kuvausoko. Kaposetolo Paulu uze vayanjishilenga mapapa kakavulu asonekele ngwenyi: “Yehova ikiye muka-kungukafwa, kangweshi kwivwa womako.”—WavaHepeleu 13:6.
Chuma chikwavo nachitukafwa tupwenga vakumika shina kwambululanga lwola lwosena. Kwambulula cheji kutukafwanga tufwelele chikuma Yehova nakuhona kwivwa woma vatu. (Vishimo 29:25) Nge nawambululanga nakumika oholyapwa, kaha naukatwalaho kwambulula numba nge fulumende yinatukanyisa kuzata mulimo wetu mujijila jimwe.—Wavaka-Tesolonyika 1, 2:2.
3. Kuwaha muka natuwanamo nge natumika hakutuyanjisa?
Numba tuhu katwasuulukako nge vali nakutuyanjisa, oloze nge natumika, kaha lufwelelo lwetu naluzaminako chikuma. Natupandama nawa chikuma kuli Yehova hakumona omwo natukafwenga halwola jinatukumunga ngolo. (Tanga WaYakova 1:2-4.) Yehova eji kwivwanga kupihya hakutumona tuli nakuyanda oloze eji kwivwanga kuwaha nge natumika. Mbimbiliya ngwayo: “Kachi nge namumika hakumiyanjisa mwomwo yakulinga mwamwaza, kaha echi vachitavila kuli Kalunga.” (WaPetulu 1, 2:20) Fweto yize Yehova mwakahana vaze veji kumikanga hakuvayanjisa shina kuyoya chahaya myaka mukaye muze navakamulemesanga chakuzeneka wakuvafumbukila.—Mateu 24:13.
LINANGULE VYAKUJIMINYINA
Wana vyuma navikukafwa ufwelele ngwove unahase kupwa wakushishika kuli Yehova numba tuhu navakuyanjisa, nakuwaha nachifumamo.
4. Unahase kumika nge vali nakukufumbukila kuli vausoko
Yesu ahanjikile ngwenyi vausoko wetu vanahase kupihilila hakutumona tunasakula kulemesa Yehova. Tangenu Mateu 10:34-36, nakushimutwila hachihula chino:
-
Chuma muka chinahase kusoloka nge mutu umwe mutanga nasakula kuzachila Yehova?
Hakusaka kumona chakutalilaho chimwe, talenu VINDIYO, nakushimutwila hachihula chinakavangizaho.
-
Uno naulinga ngachilihi nge kausoko kove chipwe sepa lyove mwasaka kukuhonesa kuzachila Yehova?
Tangenu Samu 27:10 naMako 10:29, 30. Hanyima yakutanga chisoneka hichisoneka shimutwilenu hachihula chino:
-
Uno elu lushiko nalukukafwa ngachilihi nge vali nakukufumbukila kuli vausoko wove chipwe masepa jove?
5. Twalaho kulemesa Yehova chamokomoko naluyanjisa
Twasakiwa kupwa vakumika numba tuzachile Yehova kachi nge vatu vamwe vali nakusaka kutuhonesa. Talenu VINDIYO, nakushimutwila hachihula chinakavangizaho.
-
Uno evi vyakutalilaho vili omu muvindiyo vinakukafwe ngachilihi upwenga uwakumika?
Tangenu Vilinga 5:27-29 naWavaHepeleu 10:24, 25. Hanyima yakutanga chisoneka hichisoneka shimutwilenu hachihula chino:
-
Mwomwo ika chapwila chachilemu kutwalaho kulemesa Yehova numba tuhu mulimo wetu wakwambulula nakukunguluka vanavikanyisa mujijila jimwe?
6. Yehova mwakukafwa umike
Vinjiho jaYehova vamyaka naviyoyelo vyakulisezaseza vanazachilanga Yehova nakashishi chamokomoko nakuvayanjisa. Hakusaka kumona vyuma vyavakafwile, talenu VINDIYO. Kufumaho shimutwilenu hachihula chino:
-
Kweseka navindiyo, vyuma muka vyakafwile ava Vinjiho vomike?
Tangenu Wavaka-Loma 8:35, 37-39 naWavaka-Fwilipi 4:13. Hanyima yakutanga chisoneka hichisoneka shimutwilenu hachihula chino:
-
Uno echi chisoneka chinakukafwe ngachilihi ufwelele ngwove unahase kumika mukala cheseko?
Tangenu Mateu 5:10-12, nakushimutwila hachihula chino:
-
Mwomwo ika watela kuwahilila chamokomoko naluyanjisa?
Makombakaji avaka-kulemesa Yehova vanomikanga hakuvafumbukila. Nayove unahase kumika
VATU VAMWE NGWAVO: “Ami kangweshi kuhasa kumika nge vali nakunguyanjisako.”
-
Visoneka muka vinahase kuvakolezeza vafwelele ngwavo vanahase kumika?
CHISHINA UNALINANGULA
Yehova eji kwivwanga kuwaha hakutumona tuli nakumuzachila chamokomoko naluyanjisa. Kaha tunahase kumika hakutukafwa kuli ikiye.
Kuhituluka
-
Mwomwo ika vaka-Kulishitu vatela kutachikijila ngwavo navavayanjisanga?
-
Vyuma muka watela kulinga oholyapwa mangana ulizange vyaluyanjisa nalwiza kulutwe?
-
Vyuma muka navikukafwa ufwelele ngwove unahase kuzachila Yehova chamokomoko nakala cheseko?
WANA VYAVIVULU
Tala omwo ndumbwetu wamukweze mwalumbununa omwo Yehova amukafwile omike halwola vamukashile mukamenga mwomwo yakukana kwazana muvihande vyalifuchi nachiyulo.
Wana vyuma vyakafwile vapwevo nalunga vazachile Yehova nakashishi hamyaka yayivulu chamokomoko nakuvafumbukila.
Wana vyuma navikukafwa umike nge vali nakukuyanjisa.
“Lizangenu vyaLuyanjisa Luli Nakwiza Kulutwe” (Kaposhi Kakutalila, July 2019)
Uno twatela kumona ngachilihi kutufumbukila kuli vausoko? Kaha vyuma muka navitukafwa tuunde muchima nakutwalaho kupwa vakushishika kuli Yehova?
“Muchano Kaweshi Kuneha ‘Kuundako, Oloze Poko Yamukwale’” (Kaposhi Kakutalila, October 2017)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
