Yehova atumbile milemba muEtene. Mumilemba kana mwapwile vyuma vyavivulu vyakufwana nge jitemo, namitondo natunyama. Kufumaho, Kalunga atengele lunga watete Alama nalukungu lwahamavu nakumuhwimina mumazulu enyi. Uno unatachikiza vyuma vyasolokele tahi? Ou lunga apwile jino mutu wakuyoya. Yehova ahanyine Alama mulimo wakulama milemba, nakuluka majina tunyama vosena.

Yehova alwezele Alama lushimbi lwalulemu. Ambile ngwenyi: ‘Kumitondo yoseneyi yili mumilemba unahase kulyangako tuhu, kufumisako mutondo umwe kaha wakulipwila. Nge mulya kumutondo kana mukafwa.’

Kufumaho Yehova ambile jino ngwenyi: ‘Nangutengela Alama muka-kumukafwa.’ Ngocho asavalikile Alama tulo twatuvulu, nakumufumisa lupachi lumwe nakuluzachisa hakumutengela pwevo. Lijina lyenyi apwile ikiye Eve. Alama naEve vapwile jino  tanga yatete. Uno Alama evwile ngachilihi hakumutengela pwevo? Alama evwile kuwaha chikuma, ngocho ambile ngwenyi: ‘Yehova natenge mutu kuzachisa lupachi lwami, napu wakulifwana nayami.’

Yehova alwezele Alama naEve ngwenyi vasemenga vana nakuzalisa hamavu. Asakile mangana valivwise kuwaha kuzachila hamwe nakulingisa mavu kupwa palachise chipwe ngwetu milemba yamwaza ngana muze yapwile milemba yaEtene. Oloze vyuma kana kavyalingiwileko. Mwomwo ika? Natulinangula vyavivulu muchilongesa chinakavangizaho.