Yehova Kalunga ikiye Tengi yetu. Atengele vyuma vyosena vize tweji kumonanga navize katwamonako. Shimbu kanda atenge vyuma tweji kumonanga, avangilile kutenga vangelo vavavulu. Uno watachikiza omu vapwa vangelo tahi? Vangelo vapwa vatu vakushipilitu vaze atengele Yehova, kaha vapwa ngana mwaikiye. Katweshi kuhasa kuvamona ngana muze katwamona Kalungako. Yehova atengele kangelo watete uze apwile muka-kumukafwa. Kangelo kana akafwile Yehova kutenga vatanganyika, najipulaneti navyuma vyeka vyosena. Pulaneti yimwe hajipulaneti vatengele shina mavu, aze apwa limbo lyetu lyamwaza.

Yehova awahishile jino ano mavu mangana hatwamenga tunyama navatu. Atengele nalikumbi mangana limunyikenga hano hamavu. Atengele jipili, natulungalwiji natulwiji.

Kufumaho vyuma muka vyakavangijileho? Yehova ambile ngwenyi: ‘Nangusokesa mwila, navyuma vituta namitondo.’ Jino mihako yakulisezaseza, navisakwola najitemo vyaputukile kusoka. Kaha Yehova atengele tunyama vosena, navyuma vyakutuka mwilu, navyuma vyakuhalala hamavu navyuma vyosena vyamumeya. Atengele tunyama vavandende vakufwana nge vambwanda, natunyama vavanene vakufwana nge vanjamba. Kanyama muka wazanga chikuma?

Kaha Yehova alwezele uze kangelo watete ngwenyi: “Tutenge mutu.” Vatu valihandununa natunyama. Vatu vavatenga  nauhashi wakutunga vyuma, nakuhanjika, nakuseha, nakulomba, nakulama kanawa mavu natunyama. Uno unejiva mutu watete kutenga tahi? Mana utale.