Mwahichile myaka kafwe 70, kufuma halwola luze vaIsalele vakindulukile kuYelusalema, oloze vaIsalele vamwe vachapwilenga nakutwama mujinganda jakulisezaseza jamuWangana waPeleja. Umwe hali ava apwile kapilishitu Ezela, uze anangwilenga Jishimbi jaYehova. Omu Ezela atachikijile ngwenyi vatu muYelusalema kavapwile nakukavangiza Jishimbi jaYehova, afwililile kuyako mangana avakafwe. Mwangana waPeleja Alatakaseleke amulwezele ngwenyi: ‘Kalunga nakuhane chinyingi mangana unangule vatu Jishimbi jenyi. Sakula kala mutu musaka ayenga nayove.’ Ngocho, Ezela aliwanyine navatu vosena vaze vasakile kukinduluka kuYelusalema. Kaha valombele kuli Yehova mangana avakinge omu navatambuka ungeji wausuku, kufumaho, vakatukile nakuya.

Kahomu mwahichile tukweji vawana, vahetele muYelusalema. Kaha vilolo valwezele Ezela ngwavo: ‘VaIsalele vanalikange kuli Yehova nakumbata mapwevo vaze veji kulemesanga tulunga vamakuli.’ Uno Ezela alingile ngachilihi? Hahaze vene afukamine nakuputuka kulomba kumeso avatu ngwenyi: ‘Ove Yehova unatulingila vyuma vyavivulu, oloze etu tunalingi shili.’ Numba tuhu vatu vapihililile nakwalumuka, oloze vapwile nakusakiwa kuvakafwa numba valinge vyuma vyakwoloka. Ngocho, Ezela asakwile vakulwane navaka-kuyula mangana vakafwe vatu vaseze vilinga kana. Kahomu mwahichile tukweji vatatu, vahangile vatu vaze vakanyine kulemesa Yehova vafume mulifuchi.

Omu mwahichile myaka 12, lwola jino lwahetele lwakuputuka kutungulula jikembwe jaYelusalema. Ngocho, Ezela akungulwile vatu kuchihela chasanga nakuvatangila Jishimbi jaKalunga. Omu Ezela apandumwine mukanda, vatu vemanyine. Kaha alishile Yehova, vatu vosena vazundwile mavoko avo helu, mangana vasolole ngwavo vanetavila vyuma apwile nakuhanjika. Ngocho, Ezela atangile nakulumbununa Jishimbi, kaha vatu vapwile nakwivwilila kanawa. Kaha valitavilile ngwavo vasezele cheka Yehova, ngocho valilile chikuma. Likumbi lyakavangijileho, Ezela avatangilile cheka Jishimbi. Omu vatachikijile ngwavo vatela kulinga Chiwanyino chaVisakila, hahaze vene vaputukile kuliwahisa vyachilika kana.

 Omu valingile chiwanyino hamakumbi 7, vatu vawahililile chikuma nakusakwilila Yehova hakwaha jimbuto jamwaza. Kakwapwile chiwanyino cheka chakuhambakana echi putu vene kumakumbi aYoshuwa. Omu vakumishile kulinga chiwanyino kana, vatu valikungulwile hamwe nakulomba kuli Yehova ngwavo: ‘Ove Yehova watuyowele muundungo, nakutuhana vyakulya omu twapwile mupambo, nakutuhana lifuchi lino lyamwaza, oloze tunalikangenga kuli ove mapapa kakavulu. Watuminenga vapolofweto jove mangana vatuhuhumune, oloze katwononokeleko. Watutalililenga lika chikoki, walaminenga lushiko lwove luze washikile Apalahama. Shikaho, oholyapwa jino, natukushika ngwetu natukwononokanga.’ Ngocho, vasonekele lushiko lwavo, kaha vilolo, navaLevi navapilishitu vahakileko katachikijilo.