Tuchishimutwilenu havyuma vyasolokele myaka yayindende yinahichi kunyima. Nehemiya apwile kaIsalele uze atwaminenga munganda yaShushane muPeleja, kaha nawa ndungo yaMwangana Alatakaseleke. Kaha ndumbu yaNehemiya ejile kufuma kuYuta namujimbu waupi ngwenyi: ‘Vatu vaze vafumine kuYelusalema vali muukalu. Mwomwo jikembwe janganda yaYelusalema jize vapuzwile vaMbavilone kavajitungulwileko.’ Mujimbu kana wevwishile Nehemiya kupihya kumuchima. Ngocho afwililile kuya kuYelusalema mangana akavakafwe, kaha alombele kuli Yehova ngwenyi mwangana amwitavise ayenga.

Likumbi limwe mwangana amwene Nehemiya nahombo. Kaha ambile kuli ikiye ngwenyi: ‘Mwomwo ika unapihilila? Kanda lyehi nguchikumonengaho ngana.’ Kaha Nehemiya ambile ngwenyi: ‘Mwomwo ika nanguhonena kupihilila oku nganda yaYelusalema yili muukalu?’ Kaha mwangana amuhulishile ngwenyi: ‘Vyuma muka uli nakusaka?’ Hahaze vene Nehemiya alombele muuholela. Kufumaho alwezele mwangana ngwenyi: ‘Ngwitavise nguyenga kuYelusalema nakutungulula kembwe.’ Mwangana Alatakaseleke etavishile Nehemiya ayenga, kaha amukafwile apwenga wakukingiwa hakutambuka ungeji wenyi wausuku. Atongwele nawa Nehemiya kupwa nguvulu wamuYuta nakumuhana mitondo yakuzachisa hakutungulula kembwe.

Omu Nehemiya ahetele muYelusalema, akekesele jikembwe janganda. Ngocho akungulwile vapilishitu, navaka-kuyula nakuvalweza ngwenyi: ‘Munamono ukalu tuli nawo, tuyenu tuputuke kuzata.’ Ngocho vatu vetavile, kaha vaputukile kutungulula jikembwe.

Chipwe ngocho, vaka-kole javaIsalele vamwe vaputukile kuvatoleka ngwavo: ‘Mumbwe nahase kupuzula kembwe muli nakutungulula.’ Vaka-kuzata valiwile mazu akasautu vapwile nakuvatoleka, nakutwalaho lika kutunga. Ngocho, mulimo wapwile nakutambuka kanawa.

Vaka-kole javo vatwalilileho kuwana jijila jakulisezaseza mangana valukuke Yelusalema. Omu vaYuleya vevwile mujimbu kana, wavalingishile vevwenga woma chikuma. Oloze Nehemiya avalwezele ngwenyi: ‘Kanda namwivwa womako. Yehova ali nayetu.’ Jino atongwele vatu  vakinge vaka-kuzata, kaha vaka-kole javo vachiwanyine kupwa chachikalu kuvalukuka.

Jikembwe navikolo vyambachile makumbi 52, numba jino vakumise kuvitunga. Kaha Nehemiya akungulwile vaLevi navapilishitu muYelusalema mangana vavikunjike. Ngocho, atongwele mazavu avali avaka-kwimba. Omu vahetele kuChikolo chaKaselwoke, vakandukile hajindondelo nakuya helu lyakembwe. Kaha vembililile Yehova myaso kuzachisa jineta, navisaji vyamikole, natulyalya. Ngocho, Ezela ayile nalizavu limwe lyavaka-kwimba, lizavu likwavo lyayile naNehemiya kaha valiwanyinyine kutembele. Vatu vosena malunga, namapwevo navana vahanyine Yehova wana wakulumba nakulinga chiwanyino. Kaha kuwahilila chavo vachivwile nakuvihela vyakwakusuku.