Yehova asakwile Yelemiya kupwa kapolofweto kuli vatu vamuYuta. Amulwezele ambulile vatu nakuvahuhumuna vaseze vilinga vyavo vyavipi. Oloze, Yelemiya ambile ngwenyi: ‘Ove Yehova ami ngukanyike wamundende. Kangwatachikijile mwakuhanjikila navatuko.’ Yehova amulwezele ngwenyi: ‘Kanda kwivwa womako. Nangukulweza vyuma mukahanjika, nangukukafwa.’

Yehova alwezele Yelemiya akungulule vakulwane javatu, nakuchika mulondo kumeso avo, nakwamba ngwenyi: ‘Omu mukiko navakachika Yelusalema.’ Omu Yelemiya alingile vyuma amulwezele Yehova, vaze vakulwane vapihililile chikuma. Ngocho kapilishitu Pashule avetele Yelemiya, kaha amuhakile mujikuli. Kahashile kutambuka ufuku wosenako. Omu lyachele nachimene Pashule afumishile Yelemiya mujikuli. Yelemiya ambile jino ngwenyi: ‘Ukalu unangutohwela, ngunazeye, nangulitwamina kwambulula.’ Kutala Yelemiya azeyele chikupu nakulitwamina kwambulula tahi? Nduma. Omu ashinganyekele hamulimo vamuhanyine, ambile ngwenyi: ‘Mazu aYehova anapu nge kakahya mumuchima wami. Kangweshi kulitwamina kwambululako.’ Shikaho Yelemiya atwalileho lika kuhuhumuna vatu.

Omu mwahichile myaka yayivulu, muYuta jino mwapwile mwangana weka. Vapilishitu navapolofweto vamakuli vajinjile mujimbu ambulwilenga Yelemiya. Ngocho valwezele vilolo ngwavo: ‘Mutu kana atela kufwa.’ Yelemiya ambile kuli vilolo ngwenyi: ‘Kachi nge namungujiha, kaha namujiha mutu chakuzeneka mulonga. Ngweji kuhanjikanga mazu aYehova keshi amiko.’ Omu vilolo vevwile vyuma ahanjikile Yelemiya vambile ngwavo: ‘Ou mutu katela kufwako.’

 Yelemiya atwalileho lika kwambulula kaha vilolo vapihililile. Valwezele mwangana ajihe Yelemiya. Kaha uze mwangana avalwezele ngwenyi vatela kulinga Yelemiya kala mweshomwo vanasake. Ngocho, vambachile Yelemiya nakuya nakumumbila mulishima lyalisuku lize mwapwile ulova, vasakile mangana afwenga. Ngocho, Yelemiya aputukile kwingila muulova.

Evete-meleke uze apwile chilolo muzuvo yamwangana alwezele mwangana ngwenyi: ‘Vilolo vanambili Yelemiya mulishima! Nge natumwechelela mwafwilamo.’ Ngocho, uze mwangana alwezele Evete-meleke ambate malunga 30 mangana vayenga nakufumisa Yelemiya mulishima. Uno nayetu tunahase kulondezeza Yelemiya uze kechelele chuma numba chimwe chimuhonese kwambulula tahi?