Eseta apwile mwanapwevo wakaYuleya uze atwaminenga muPeleja nganda yamuShushane. Apwile wakutanga yize Nevukataneza akwachile undungo muYelusalema. Vamulelele kuli musonyenyi walunga Molotekai, uze apwile ngamba yaMwangana Ahaswelu waPeleja.

Mwangana Ahaswelu asakile kumbata lisano weka. Ngocho, vangamba jenyi vamunehelele mapwevo vamwaza vamulifuchi lyenyi kuhakilako vene naEseta. Oloze, mwangana asakwile Eseta kupwa lisano lyenyi hamapwevo vosena. Ngocho, Molotekai alwezele Eseta ngwenyi katela kulyambulula nge apwile kaYuleyako.

Lunga wakulivwimba Hamane ikiye apwile mukulwane wakutwaminyina vilolo vosena. Asakilenga vatu vosena vafukamenga nakulifukula kuli ikiye. Oloze Molotekai akanyine kulinga ngocho, echi chalingishile Hamane apihililile chikuma nakusaka kumujiha. Omu Hamane atachikijile jino ngwenyi Molotekai apwile kaYuleya, ajinyine kujiha vaYuleya vosena mulifuchi. Jino alwezele mwangana ngwenyi: ‘VaYuleya vapwa vatu vakulikanga, shikaho watela kuvanongesa.’ Kaha Ahaswelu ambile ngwenyi: ‘Linga mweshomwo unasake.’ Mwangana amuhanyine ngolo jakukasa lushimbi. Ngocho, Hamane akashile lushimbi luze lwahanyine vatu lisesa lyakujiha vaYuleya vosena halikumbi lyakusokesa 13 lyakakweji waAtale. Yehova apwile nakumona vyuma vyosenevi.

Eseta katachikijile vyalushimbi kanako. Ngocho, Molotekai atuminyine Eseta mukanda nakumulweza ngwenyi: ‘Yako ukahanjike namwangana.’ Kaha Eseta ambile ngwenyi: ‘Kala mutu uze mwaya kuli mwangana chakuzeneka kumusanyika navamujiha. Mwangana kangusanyikileko hamakumbi 30! Oloze nanguya. Nge mwangana mwangwinyika mbwechi yenyi, kaha nanguyoya, nge chiku kaha nangufwa.’

Eseta ayile kuchipango chamwangana. Kahomu mwangana amumwene, amwinyikile mbwechi yenyi, kaha Eseta ayile kuli mwangana. Jino ikiye amuhulishile ngwenyi: ‘Unakusaka ngukulingile ika Eseta?’ Kaha ikiye amukumbulwile ngwenyi: ‘Ngunakusaka yove naHamane mwizenga kukulya chize  nanguwahisa.’ Kufumaho, Eseta avasanyikile kamuchivali. Kahomu vapwile kukulya kana, mwangana ahulishile cheka Eseta ngwenyi: ‘Unakusaka ngukulingile ika?’ Kaha ikiye ambile ngwenyi: ‘Mutu umwe ali nakusaka kungujiha hamwe kaha navatu jami. Ngunakukulembelela utuyovole.’ Kaha mwangana amuhulishile ngwenyi: ‘Mutu muka vene owo?’ Eseta ambile ngwenyi: ‘Mutu kana wamupi shina ou lunga Hamane.’ Ahaswelu apihililile chikuma, hahaze vene alwezele vatu vajihe Hamane.

Oloze kakwapwile mutu numba umwe chipwe mwangana yavene ahashile kufumisako luze lushimbi akashile Hamaneko. Ngocho, alingishile Molotekai kupwa mukulwane wakutwaminyina vilolo nakumuhana ngolo jakukasa lushimbi lweka lwaluhya. Molotekai akashile lushimbi lwaluhya lwakuhana vaYuleya lisesa lyakulikinga vavene kuvatu vaze navavafumbukila. Shikaho, vaYuleya vafungulwile vaka-kole javo halikumbi lyakusokesa 13 lyakakweji waAtale. Ngocho, mwaka himwaka vawahilililenga nakulinga chiwanyino chakwanuka likumbi lyakufungulula.