CHILONGESA 64
Ndanyele Muwina wavaNdumba
Mbavilone vayiyulile jino kuli mwangana weka lijina lyenyi ikiye Ndaliu uze apwile kaMete. Ndaliu evwililile Ndanyele kuwaha. Ngocho, amutongwele kupwa muka-kutwaminyina malunga vavalemu mulifuchi. Ava malunga vevwililile Ndanyele lwiso ngocho vasakile kumujiha. Vatachikijile ngwavo Ndanyele alombelenga kuli Yehova mapapa katatu halikumbi, ngocho valwezele Ndaliu ngwavo: ‘Ove mwangana, kasa lushimbi lwakwamba nge, vatu vosena valemesenga kaha yove. Kaha weshowo mwakana kukavangiza lushimbi kana, kaha vatela kumumbila muwina wavandumba.’ Ndaliu azangile vyuma vamulwezele ngocho akashile lushimbi nakusonekaho lijina lyenyi.
Omu Ndanyele evwile lushimbi kanelu, ayile kuzuvo yenyi. Kaha afukamine kwakamwihi nanjanena yakusokolola nakuputuka kulomba kuli Yehova. Vaze malunga vevwililile Ndanyele lwiso valahililile kuzuvo yenyi kumuwana ali nakulomba. Ngocho vayile kuli Ndaliu nakumulweza ngwavo: ‘Ndanyele nalikange kuli ove. Eji kulombanga kuli Kalunga kenyi mapapa katatu halikumbi.’ Hakuwana nge Ndaliu azangile chikuma Ndanyele ngocho kasakile mangana afwengako. Kaha likumbi lyosena lyamuundu atondele jila yakuyowelamo Ndanyele. Oloze kakwapwile mutu uze ahashile kwalumuna lushimbi kana, kuhakilako vene namwangana yavene. Ngocho, alwezele vaze malunga vambile Ndanyele muwina wavandumba.
Ufuku wosena Ndaliu alizakaminyine chikuma hali Ndanyele kaha kahashile kusavala tuloko. Lichako nachimene, Ndaliu ayile kuze kuwina nakutambakana Ndanyele ngwenyi: ‘Uno Kalunga kove nakuyovola tahi?’
Omu Ndaliu evwile lizu lyaNdanyele muwina awahililile, ngocho Ndanyele ambile kuli ikiye ngwenyi: ‘Yehova atumanga kangelo kenyi, kaha asokanga kutunwa twavandumba. Kavangulemekeleko.’ Chikupu vene, Ndaliu awahililile chikuma! Ngocho, alwezele vatu vafumise Ndanyele muze muwina. Omu vamufumishilemo vamwene Ndanyele kalemanyineko. Kaha mwangana alwezele vatu ngwenyi: ‘Mbilenu malunga muwina vaze vahananga Ndanyele mulonga.’ Omu vavambilile muwina vandumba vavalile.
Kufumaho, Ndaliu asonekelele vatu vosena lushimbi lwakwamba ngwenyi: ‘Vatu vosena vevwenganga Kalunga kaNdanyele woma, uze amuyovolanga mutunwa twavandumba.’
Kutala weji kulombanga kuli Yehova hakumbi hakumbi ngana muze alingilenga Ndanyele tahi?
“Yehova atachikiza mwakuyowela vatu vaze vakwechi muchima wakumuzachila muvyeseko vyavo.”—WaPetulu 2, 2:9
