Ufuku umwe, Nevukataneza alotele chilota chize chamwivwishile woma. Asanyikile vatu jenyi vaka-mangana vamulweze ulumbunwiso wacho. Oloze naumwe wauchi ahashile kuchilumbununa. Kufumaho, mwangana ahanjikile naNdanyele.

Nevukataneza alwezele Ndanyele ngwenyi: ‘Muchilota chami ngwamwene mutondo, kaha wakolele nakusuhwa chikuma nakuheta mwilu. Wapwile nakusoloka nakusongosongo yamavu. Wapwile namafwo amwaza kaha wemine mihako yayivulu. Tunyama vautamine mumuvule wawo, tujila nawa vatongamine hamitango yawo. Jino kangelo ejile kufuma mwilu, kaha ambile ngwenyi: “Pakulenu ou mutondo, saululenu mitango yawo. Oloze sezenu chimbunji namiji yacho mumavu, chimbunji kana chikasenu muhya wafwelu nawaunengu. Muchima wacho wautu vawalumune upwenga muchima waunyama. Echenu muhite jitando 7. Vatu vosena vatachikize ngwavo ou Wakulitulaho Chikuma ikiye Muka-kuyula wangana wavatu. Eji kuuhananga kuli weshowo nasake.”’

Yehova asolwele mwalumbunukilile chilota kana kuli Ndanyele. Omu Ndanyele atachikijile ulumbunwiso wacho evwile woma kaha ambile ngwenyi: ‘Ove Mwangana, vyuma unaloto muchilota chove vyatelanga kusolokela kaha vaka-kole jove, oloze navisolokela yove. Shikaho, mutondo uze vapakwile unemanyinako yove. Kaweshi kupwa cheka umwanganako, kaha nawa mulyanga mwila ngana mwatunyama vamuchipapa. Oloze, hakuwana nge uze kangelo ambile ngwenyi sezenu chimbunji namiji yacho, shikaho naukapwa cheka umwangana.’

Kahomu mwahichile mwaka umwe, Nevukataneza apwile nakutambuka helu lyazuvo yenyi muMbavilone. Kaha ambile ngwenyi: ‘Eyi ikiko Mbavilone Yayinene, ngunatungu nangolo jami jajinene! Talenu kumana nguwamulemu chikuma.’ Shimbu apwile nakuhanjika mazu awa, mwilu mwafumine lizu ngwalyo: ‘Ove Nevukataneza! Wangana vanakutambulawo.’

Kaha hahaze vene, Nevukataneza vishinganyeka vyamukumine, apwile jino nge kanyama wamuchipapa. Vamufumishile muzuvo yenyi nakuya nakutwama natunyama vamuchipapa. Kaha jikambu jenyi jasuwile nge mangona angonga, kaha vyala vyenyi vyasuhwile nge vyala vyakajila.

 Omu yakumine myaka 7, Nevukataneza aputukile jino kushinganyeka kanawa, kaha Yehova amulingishile cheka kupwa mwangana waMbavilone. Nevukataneza ambile jino ngwenyi: ‘Nangwalisanga Yehova, Mwangana wamelu. Ngunatachikiza jino ngwami, Yehova Ikiye Muka-kuyula. Eji kwinyisanga vatu vaze veji kulivwimbanga, kaha eji kuhananga wangana kuli weshowo nasake.’