Likumbi limwe naufuku, Mwangana Nevukataneza alotele chilota chize chamwivwishile woma. Ashinganyekele chikuma hachilota kana, kaha chamulingishile ahone kuya cheka mutulo. Kufumaho asanyikile vaka-kulinga visava nakuvalweza ngwenyi: ‘Ngulumbunwinenu chilota ngunaloto.’ Vakiko vambile ngwavo: ‘Ove mwangana, tulweze chilota chove,’ oloze Nevukataneza ambile ngwenyi: ‘Nduma! Enu ngulumbunwinenucho kaha, nge chiku nangumijiha.’ Vakiko vambile cheka kuli ikiye ngwavo: ‘Natukulweza ulumbunwiso wacho, kachi nge mutulweza vyuma walotanga.’ Ikiye ambile ngwenyi: ‘Enu muvosena muli nakungwonga kaha. Ngulwezenu kaha vyuma ngwalotanga!’ Valwezele jino mwangana ngwavo: ‘Kakweshi mutu mwahasa kulinga chumechi uli nakusaka ove mwanganako. Mwomwo chuma unatulweze kulinga chachikalu chikuma.’

Nevukataneza apihililile chikuma ngocho ahanyine lushimbi lwakujiha vaka-mangana vosena. Kulumbununa nge vatelele kujihila kumwe naNdanyele, naShatalake, naMeshake, naAvete-nengo. Oloze Ndanyele alombele mwangana amuhaneko lwola. Ngocho, Ndanyele namasepa jenyi valombele kuli Yehova mangana avakafwe. Uno Yehova akumbulwile kulomba kana tahi?

Yehova alwezele Ndanyele chilota chaNevukataneza muchakumwenesa nakumulweza ulumbunwiso wacho. Likumbi lyakavangijileho Ndanyele ayile kuli ngamba yamwangana nakumulweza ngwenyi: ‘Kanda kujiha vaka-manganako. Ngunahase kulumbunwina mwangana chilota chenyi.’ Ngocho, uze ngamba atwalile Ndanyele kuli Nevukataneza. Kaha Ndanyele alwezele mwangana ngwenyi: ‘Kalunga wamwilu nasolola vyuma navikakusolokela kulutwe. Evi vikiko vyuma walotanga. Wamonanga chifwanyisa chachinene, kaha mutwe wacho wapwanga waulu. Kaha tulo yacho namavoko acho apwanga apalata, kaha lijimo lyacho najitungi jacho vyapwanga vyaunengu. Mahinji acho apwanga akufutula fwelu naunonga. Wamonanga nawa lilolwa lize lyafumanga hapili lize lyavetanga kumahinji achize chifwanyisa ngocho chize chifwanyisa chachikikanga chikichiki  nakupekumuka napeho. Lize lilolwa lyapwile jino pili yize yatohwele hamavu hosena.’

Kufumaho, Ndanyele ambile ngwenyi: ‘Ivwilila jino ulumbunwiso wachilota chove: Wangana wove ukiko mutwe waulu. Oloze wangana naukakushisa naukapwa nge palata. Kaha nakukeza weka uze naukapwa nge unengu kaha naukayula hamavu hosena. Kufumaho nakukeza wangana wangolo uze naukapwa nge fwelu. Wangana wamakumishilo naukapwa muvihanda vivali, chihanda chimwe nachikapwa chafwelu kaha chihanda chikwavo nachikapwa chakuhehela nge unonga. Oloze lize lilolwa nalikapwa pili linemanyinako Wangana waKalunga. Naukachika mawangana osena awa kaha ukiko naukapwangako haya myaka yosena.’

Jino Nevukataneza afukamine chameso hamavu kumeso aNdanyele nakwamba ngwenyi: ‘Kalunga kove ikiye asololanga echi chilota chami kuli ove. Kakweshi Kalunga weka wakufwana nge ikiyeko.’ Mukutela kujiha Ndanyele, oloze Nevukataneza atongwele Ndanyele kupwa mukulwane hali vaka-mangana vosena nakumutongola kupwa muka-kuyula muMbavilone. Kutala unamono jino omu Yehova akumbulwile kulomba chaNdanyele tahi?