Omu mwahichile myaka yayivulu kufuma haze Mwangana Nevukataneza alotele chize chifwanyisa chachinene, atungile likombelo lyalinene lyaulu. Kaha eli likombelo kana alitungililile muchana chaNdula nakusanyika vatu vavalemu vamuwangana wenyi kuhakilako vene naShatalake, naMeshake, naAvete-nengo mangana valikungulule nakwimana kulutwe lwalize likombelo. Kaha mwangana avalwezele ngwenyi: ‘Omu namwivwa chivumo chajineta, najipanda, natulyalya, mwatela kufukama nakulifukula kulikombelo! Kaha weshowo mwakana kufukama nakulifukula kulikombelo kana, navamumbila mulilungu lyakakahya.’ Uno ava vaHepeleu vatatu navafukama nakulifukula tahi nyi navalemesanga kaha Yehova?

Kaha mwangana alwezele vaka-kwimba vembenga visaji. Ngocho vatu vosena vafukamine nakulifukula kulikombelo, oloze Shatalake, naMeshake naAvete-nengo vakanyine kulifukula. Vatu vamwe vavamwene kaha vambulwile kuli mwangana ngwavo: ‘Vaze vaHepeleu vatatu vanakane kulifukula kulikombelo lyove.’ Shikaho, Nevukataneza avasanyikile, kaha avalwezele ngwenyi: ‘Nangumihana cheka lwola mangana mulifukule nakulemesa likombelo lyami, nge chiku kaha nangumimbila mulilungu lyakakahya. Kakweshi Kalunga uze nahase kumiyovola kuli amiko.’ Ngocho vamukumbulwile ngwavo: ‘Etu tunakane kulifukula kulikombelo lyove. Kalunga ketu mwatuyovola. Numba nge keshi kutuyovolako, oloze etu katweshi kulifukula kulikombelo lyoveko.’

Nevukataneza apihililile chikuma. Kaha alwezele vatu ngwenyi: ‘Yenu mukasambize lilungu lyakakahya mangana lyenyenga mapapa 7 kuhambakana makumbi osena!’ Kaha alwezele maswalale jenyi ngwenyi: ‘Kasenu ava malunga mangana muvambile mulilungu lyakakahya!’ Hakuwana nge  lize lilungu lyazumine chikuma, omu vaze maswalale vahetele kwakamwihi hahaze vene vawemene nakufwa. Oloze vaze vaHepeleu vatatu vapwile muze mulilungu. Kutwala muze Nevukataneza atalile mulilungu kaha amwene malunga vawana vali nakutambuka mulilungu. Ngocho, evwile woma chikuma kaha ahulishile vilolo jenyi ngwenyi: ‘Uno katwambilanga malunga vatatu mukakahyako nyi? Oloze ngunamonomo vawana, umwe ali nakusoloka nge kangelo!’

Nevukataneza apandamine chikuma kulilungu nakuhanjika nalizu lyakukanguka ngwenyi: ‘Enu vangamba jaKalunga Wakulitulaho Chikuma, fumenumo!’ Kaha vatu vosena valikomokelele chikuma hakumona Shatalake, naMeshake naAvete-nengo navafuma mukakahya chakuzeneka kuwema. Vikova vyavo, najikambu, nauvwalo wavo vyosena kavyawemene chipwe kunuka wishiko.

Kufumaho, Nevukataneza ambile ngwenyi: ‘Kalunga kaShatalake, naMeshake naAvete-nengo apwa wakukangana chikuma. Atumanga kangelo mangana avayovole. Kakweshi Kalunga weka nahase kuhambakana Kalunga kavoko.’

Uno nayove unakufwila kupwa lika wakushishika kuli Yehova chamokomoko naukalu mumona ngana mwavaHepeleu vatatu tahi?