Vatu vamuYuta vasezele Yehova mapapa kakavulu nakuputuka kulemesa tulunga vamakuli. Hamyaka yayivulu Yehova avakafwilenga. Atumine vapolofweto vavavulu mangana vavahuhumune, oloze vakiko kavevwililileko. Mukutela kwivwilila, vakiko vatolekelenga vapolofweto. Uno Yehova afumishileko ngachilihi makombelo?

Mwangana waMbavilone Nevukataneza afungulwilenga nganda hinganda. Chatete afungulwile Yelusalema, akwachile Mwangana Yehoyakine, navangamba jenyi, navamyata jenyi, navilolo jenyi nakuvatwala kuMbavilone. Kaha ambachile nawa vyuma vyavilemu mutembele yaYehova. Kufumaho, Nevukataneza alingishile Zetekiya kupwa mwangana waYuta.

Hakavanga, Zetekiya ononokelenga Nevukataneza. Oloze vatu vakumiyachi yapwile mwakamwihi navapolofweto vamakuli valwezele Zetekiya alikange kuli mwangana waMbavilone. Yelemiya amuhuhumwine ngwenyi: ‘Nge mulikanga, kaha muYuta namupwa jita, nazala yakalombolombo namusongo wachihita.’

Omu Zetekiya ayulile myaka 8, alikangile kuMbavilone. Ngocho, alwezelele maswalale vavaEjipitu mangana vamukafwe. Kaha Nevukataneza atumine maswalale vakalukuke Yelusalema nakuyihaka muchingombela. Kaha Yelemiya alwezele Zetekiya ngwenyi: ‘Kachi nge nauliluula kuMbavilone, kaha kaweshi kufwako. Nanganda yino nawa kaveshi kuyinongesako. Oloze nge kaweshi kuliluulako, vaka-Mbavilone navocha Yelusalema, kaha yove  navakukwata nakukuhaka mukamenga.’ Oloze Zetekiya ambile ngwenyi: ‘Kangweshi kulitwala chipwe kuliluulako.’

Omu mwahichile mwaka umwe nachimbwa, maswalale jaMbavilone valukukile Yelusalema nakuyocha. Vochele tembele, vajihile vatu vavavulu kaha veka vavatwalile mukamenga.

Zetekiya achinyine muYelusalema, oloze vaMbavilone vamuhangasanyine. Kahomu ahetele kwakamwihi naYeliko vamukwachile nakumutwala kuli Nevukataneza. Kaha ou mwangana waMbavilone ajihile vana vaZetekiya naivene ali nakumona nameso enyi kapu. Kufumaho, Nevukataneza atuvile meso aZetekiya nakumutwala mukamenga muze akafwililile. Oloze Yehova ashikile vatu vamuYuta ngwenyi: ‘Omu namuhita myaka 70, nangukamikindulwisa muYelusalema.’

Vyuma muka vyasolokele kuli vanyike vaze vatwalile kuMbavilone? Uno vashishikile lika kuli Yehova tahi?