Kesale Angusutu uze apwile muka-kuyula muWangana waLoma ahanyine lushimbi lwakulweza vaYuleya vosena nge vatela kukinduluka kwimbo lyavo nakulisonekesa. Ngocho, Yosefwe naMaliya vayile kuMbetelema kuze kwafumine tanga yaYosefwe. Halwola kanelu Maliya apwile hakamwihi nakusapuluka.

Kahomu vahetele kuMbetelema, kavawanyine chihela numba chimwe chamwaza chakusavalako, oloze vawanyine kaha muulilo wavimuna. Muchihela kana mukiko asapulukilile Maliya mwana walunga, Yesu. Ngocho, amuvungilile hamahina nakumusavalika muulilo wavimuna.

Jino mungalila yize yapwile kwakamwihi naMbetelema mwapwile tufunga vaze vapwile nakulama vimuna javo naufuku. Hahaze vene kangelo kaYehova emanyine kuli ava tufunga, kaha upahu waYehova wamunyikile kwosena kuze vapwile. Ngocho vevwile woma, oloze kangelo avalwezele ngwenyi: ‘Kanda namwivwa womako, mwomwo  nangumyambulila mujimbu wamwaza. Lelo lino munganda yino yaMbetelema munasemuka Meshiya.’ Halwola kana, kwasolokele vangelo vavavulu mwilu, vapwile nakwamba ngwavo: ‘Vamutohwesenga Kalunga wamwilu, kaha hamavu hapwenga kuunda.’ Kufumaho vaze vangelo vayile. Uno vaze tufunga valingile ngachilihi?

Vaze tufunga vahanjikile mwavomwavo ngwavo: ‘Tuyenu kuMbetelema oholili ngana.’ Kaha vayile washiwashi, vawanyine Maliya naYosefwe nauze kemba muulilo wavimuna.

Kaha vosena vaze vevwileko valikomokelele havyuma vize vangelo valwezele tufunga. Ngocho, Maliya ashinganyekele lika hamazu osena ahanjikile kangelo nakuhona kuwavulyama. Jino vaze tufunga vakindulukile nakwalisa Kalunga havyuma vyosena vize vevwile navize vamwene.