Kumututuko walifuchi lyaIsalele kwatwaminenga vatu vaze vafwelelelenga ngwavo vatanganyika vanahase kuvatwaminyina. Ufuku umwe, kwejile malunga vafumine kuMututuko vamwene tanganyika mwilu namunyika chikuma, ngocho vaputukile kumukavangiza. Uze “tanganyika” avatwalile kuYelusalema. Kaha vaze malunga vaputukile kuhulisa vatu ngwavo: ‘Uno ou mwana mwakapwa mwangana wavaYuleya ali kulihi? Tuneza nakulifukula kuli ikiye.’

Omu Helote mwangana waYelusalema evwile mujimbu kutalisa kumwangana wamuhya, alizakaminyine chikuma. Ngocho, ahulishile vapilishitu ngwenyi: ‘Uno ou mwangana, vambile ngwavo mwakasemukila kulihi?’ Kaha vamulwezele ngwavo: ‘Vapolofweto vambile ngwavo mwakasemukila kuMbetelema.’ Ngocho, Helote asanyikile malunga vaze vafumine kumututuko nakuvalweza ngwenyi: ‘Yenu kuMbetelema nakutondatonda owo mwana nasemuka. Omu namukakinduluka mukeze nakungulweza oku ali. Nayami ngunakusaka ngukalifukule kuli ikiye.’ Oloze kapwile nakuhanjika muchanoko.

Kaha uze “tanganyika” vamwene aputukile kutambuka cheka. Vaze malunga vakavangijile lika uze “tanganyika” palanga nomu vahetele kuMbetelema. Kaha uze “tanganyika” emanyine helu lyazuvo, vaze malunga vengilile mukachi. Vawanyine Yesu ali nanaye Maliya. Ngocho, valifukwile kuli uze mwana nakumuhana mawana aulu, nalavona namila. Uno Yehova ikiye atumine ava malunga vayenga nakutonda kwapwile Yesu tahi? Nduma.

Ufuku vene uze Yehova alwezele Yosefwe muchilota ngwenyi: ‘Helote ali nakufwila kujiha Yesu. Ngocho, mbata puwove namwanove muchinyine kuEjipitu. Utwamenga lika kuze palanga nomu nangukakulweza likumbi lyakukinduluka.’ Hahaze vene, Yosefwe natanga yenyi vayile kuEjipitu.

Yehova alwezele vaze malunga vafumine kuMututuko ngwenyi kavatela kukinduluka kuli Heloteko. Omu Helote atachikijile jino ngwenyi vaze malunga kavakindulukileko, apihililile chikuma. Hakuwana nge Helote kawanyine Yesuko, ngocho ahanyine lushimbi lwakujiha vana vamalunga vosena vamuMbetelema vamyaka yakusemuka ngana yize apwile nayo Yesu. Oloze apwile wakukingiwa mwomwo apwile kuEjipitu.

 Kutwala muze, Helote afwile. Kaha Yehova alwezele jino Yosefwe ngwenyi: ‘Unahase jino kukinduluka kulifuchi lyove.’ Ngocho Yosefwe, naMaliya naYesu vakindulukile kuIsalele, kaha vatungile limbo lyavo munganda yaNazaleta.