CHILONGESA 72
Omu Yesu Apwile Kanyike
Yosefwe naMaliya vatwaminenga muNazaleta hohamwe naYesu navana vavo vakwavo vamalunga navamapwevo. Yosefwe azachilenga mulimo wakusonga maliva uze wamukafwilenga azakame vaka-tanga yenyi, kaha nawa anangwilenga vana venyi jishimbi jaYehova. Eyi tanga yayilenga kusunangonga lwola lwosena nakulemesa Kalunga, kaha yayilenga nawa kuYelusalema nakulinga Paseka mwaka himwaka.
Omu Yesu apwile namyaka yakusemuka 12, ikiye natanga yenyi vayile kuYelusalema ngana muze valingilenga myaka yosena. Ngocho, munganda kana mwapwile vatu vavavulu chikuma vaze vejile kuchiwanyino chaPaseka. Omu chakumine chiwanyino, vaYosefwe naMaliya vaputukile ungeji wakukinduluka kwimbo lyavo, kaha vashinganyekele ngwavo Yesu apwile halizavu lyavatu vaze vapwile nakukinduluka. Oloze omu vamutondele hali vausoko wavo, kavamuwanyineko.
Ngocho, vakindulukile kuYelusalema, kaha vatondele lika mwanavo hamakumbi atatu. Kutwala muze, vayile jino mutembele kaha vamuwanyine natwame mukachi kavaka-kunangula ali nakwivwilila kanawa kuvyuma vapwile nakuhanjika, nakuvahulisa vihula. Ava vaka-kunangula valikomokelele chikuma havyuma apwile nakuhanjika Yesu, ngocho vaputukile kumuhulisa vihula. Kaha valikomokelele hakukumbulula chenyi. Vaze vaka-kunangula vamwene ngwavo Yesu atachikijile kanawa Jishimbi jaYehova.
Yosefwe naMaliya valizakaminyine chikuma. Jino Maliya ambile ngwenyi: ‘Ove mwanami, tunapunga nakukutondatonda! Uno wapwanga kulihi?’ Yesu akumbulwile ngwenyi: ‘Uno kamwatachikijile ngwenu ami ngwatela kupwa muzuvo yaTatako nyi?’
Kufumaho, Yesu akindulukile kuNazaleta navisemi jenyi. Yosefwe anangwile Yesu mulimo wakusonga maliva. Uno unashinganyeka ngwove Yesu apwile mutu wangachilihi halwola apwile kanyike? Yesu azovolokele lika mumangana omu apwile nakukola, kaha Kalunga navatu vamwivwililile uselewa.
“Ove Kalunga kami, ngwasaka kulinga mwaya muchima wove, Jishimbi jove jili mumuchima wami.”—Samu 40:8
Pamo Nauzanga Nawa
NANGULENU VANA VENU
Lwola Lwosena Yesu Ononokelenga
Chapwa chachikalu kwononoka kuli visemi lwola lwosena. Tala omu chakutalilaho chenyi chinahase kukukafwa wononoke kuli visemi jove.
YESU—IKIYE JILA, IKIYE MUCHANO, IKIYE KUYOYA
Tanga yaYesu Nayiya kuYelusalema
Yosefwe naMaliya valizakaminyine chikuma omu vahonene kuwana Yesu, oloze ikiye alikomokelele hakuwana nge kavatachikijile kwakumuwanyinako.
YESU—IKIYE JILA, IKIYE MUCHANO, IKIYE KUYOYA
Chiyoyelo chaYesu muNazaleta
Yesu apwile navandumbwenyi vamalunga navava vamapwevo vangahi?
