Omu Yowano mwanaZekaliya naElizaveta alingile hanakolo lyehi, apwile kapolofweto. Yehova ahanyine Yowano mulimo wakunangula vatu vyakwiza chaMeshiya. Yowano kanangwilenga vatu mujisunangonga namujingandako, oloze ayilenga nakwambulula mupambo. Vatu vamuYelusalema namujingalila jamuYuleya vayilenga kuli Yowano avanangule. Avanangwilenga ngwenyi hakusaka vevwise Kalunga kuwaha, vatelelele kumbila vilinga vyavipi vyosena. Vavavulu vetavilile vyuma avanangwile Yowano, kaha vapihililile nakwalumuka nakuseza vilinga vyaunyengwe valingilenga, kaha Yowano avambapachishile muKalwiji Yotau.

Yowano ayoyelenga chiyoyelo chachashi. Avwalilenga uvwalo wamangona avangamela, kaha alilenga vambimba nauchi wamuchipapa. Ngocho, vatu vasakile kutachikiza vyavivulu hali Yowano. Kaha vaFwaliseu vakulivwimba navaSatuse navakiko vayile nakumumona. Ngocho, Yowano avalwezele ngwenyi: ‘Mwatela kupihilila nakwalumuka nakuseza vilinga vyenu vyavipi. Kanda namushinganyeka ngwenu mwapwa vakulipwila mwomwo yakulivuluka kaha ngwenu muvana vaApalahamako. Echi kachalumbununa nge enu muvana vaKalungako.’

Vatu vavavulu vayilenga kuli Yowano nakumuhulisa ngwavo: ‘Vyuma muka twatela kulinga mangana twivwise Kalunga kuwaha?’ Yowano alwezele vaYuleya ngwenyi: ‘Ou ali nauvwalo uvali ahaneko umwe kuli ou keshi nawoko.’ Uno unatachikiza ovyo vyamulingishile ahanjike mazu kana tahi? Asakile mangana tumbaji twenyi vatachikize ngwavo, hakusaka kwivwisa Kalunga kuwaha vatelele kuzanga vatu.

Kufumaho, Yowano alwezele vaka-kutambula mitelo ngwenyi: ‘Mwatela kupwa vakashishi nakuhona kwonganga vakwenu.’ Kaha alwezele nawa maswalale ngwenyi: ‘Kanda namutambulanga maswekeza chipwe kuhanjika makuliko.’

 Kutwala muze, vapilishitu navaLevi navakiko vayile kuli Yowano nakumuhulisa ngwavo: ‘Ove yove iya? Vatu vosena vanakusaka kukutachikiza kanawa.’ Kaha Yowano avakumbulwile ngwenyi: ‘Ami yami lizu lyayauze ali nakutambakana mupambo, nakutwaminyina vatu vatachikize Yehova, ngana muze ahanjikile chimweza Isaya.’

Vatu vazangile chikuma vyuma apwile nakuvanangula Yowano. Ngocho, vatu vavavulu vashinganyekele ngwavo pamo ikiye apwile Meshiya. Oloze ikiye avalwezele ngwenyi: ‘Kuli nakwiza mutu wamulemu uze nanguhambakana, ngocho ami kangwatelemo nakukasununa mihya yakumendelo chipwe sapato yenyiko. Ami ngweji kumbapachisanga vatu mumeya, oloze ikiye mwakambapachisa vatu nashipilitu yajila.’