Omu mwahichile myaka yakuhambakana 400, kufuma haze vatungulwile kembwe yaYelusalema, kapilishitu Zekaliya napuwenyi Elizaveta vatwaminenga kwakamwihi nanganda kana. Vatwamine myaka yayivulu muulo wavo, oloze kavapwile namwanako. Likumbi limwe, omu Zekaliya apwile muchihela chajila mutembele nakuhana wana wakulumba vyuma vyalivumba lyamwaza, kangelo Ngavalyele asolokele kuli ikiye. Zekaliya evwile woma, jino Ngavalyele ambile kuli ikiye ngwenyi: ‘Kanda nawivwa womako, mwomwo ngunakunehela mujimbu wamwaza wakufuma kuli Yehova. Pwevo lyove Elizaveta mwakasema mwana walunga, kaha ukamuluka lijina ngwove Yowano. Yehova nasakula Yowano kuzata mulimo wakulipwila.’ Kaha Zekaliya amuhulishile ngwenyi: ‘Vyuma muka navingulingisa ngukufwelele? Mwomwo ami napuwami tunashinakaja lyehi, shikaho katweshi kuhasa kupwa namwanako.’ Jino Ngavalyele ambile ngwenyi: ‘Kalunga ikiye nangutumu kwiza nakukwambulila ou mujimbu kana. Oloze hakuwana nge kawangufweleleleko, ngocho mupwa ukamama palanga nakulikumbi mwakasemuka mwana.’

Ngocho Zekaliya ashimbwile muze muchihela chajila apwile, kuhambakana mwamakumbi osena. Kahomu alovokelemo vatu vaze vapwile nakumuvandamina haweluka vasakile kutachikiza vyuma vyasolokele kuli ikiye. Oloze, Zekaliya kapwile nakuhanjikako. Azachishilenga jino mavoko enyi hakuhanjika. Ngocho vatu jino vatachikijile ngwavo Zekaliya natambula mujimbu umwe kufuma kuli Kalunga.

Kutwala muze, Elizaveta emichile lijimo, kaha asemene mwana walunga, ngana muze ahanjikile uze kangelo. Masepa jenyi navausoko wenyi vejile nakumona mwana, kaha vevwile chikuma kuwaha. Ngocho, Elizaveta ambile ngwenyi: ‘Lijina lyenyi ikiye Yowano.’ Kaha vamwambile ngwavo: ‘Kakweshi kausoko kove numba umwe atwama nalijina kaneliko. Muluke lijina lyaise, Zekaliya.’ Oloze naZekaliya nawa asonekele ngwenyi: ‘Lijina lyenyi ikiye Yowano.’ Halwola vene luze Zekaliya aputukile cheka kuhanjika. Jino vatu vosena muYuleya vevwile mujimbu kanou, kaha valihulishile ngwavo: ‘Uno ou mwana kana mwakapwa ngachilihi?’

 Jino Zekaliya azalile nashipilitu yajila, kaha apolofwetele ngwenyi: ‘Vamwalisenga Yehova, uze ashikile Apalahama, ngwenyi mwakatuma muka-kutuyovola, Meshiya. Kaha Yowano mwakapwa kapolofweto uze mwakawahishila Meshiya jila.’

Kaha kwasolokele nawa chuma chakulipwila kuli Maliya kausoko kaElizaveta. Chilongesa chinakavangizaho nachishimutwila chuma kana.