Omu Yesu akumishile kusakula vaposetolo jenyi 12, ashikumukile kufuma hapili nakuya kuze valikungulwilile vatu vavavulu. Vatu kana vafumine kuNgalileya, naYuleya, naTule, naShitone, naSulya namusali yaYotau. Vanehele vatu vavijile misongo yakulisezaseza navatu vaze vapwile navandemone. Yesu avokile vosena. Ngocho, atwamine hapili nakuputuka kuvanangula. Alumbunwine vyuma twatela kulinga kachi nge natusaka kupwa tumasepa jaKalunga. Twatela kutachikiza ngwetu twasakiwa kututwaminyina kuli Yehova, nakufwila kumuzanga. Oloze katweshi kuhasa kuzanga Kalunga, kachi nge katwazanga vakwetuko. Twatela kusolwelanga vakwetu likoji, nakuvatetela kuhakilako vene navaka-kole jetu.

Yesu ambile ngwenyi: ‘Twatela kuzanga masepa jetu hohamwe navaka-kole jetu, nakuvakonekela kufuma kumichima yetu. Nge mutu napihilila nayenu, kaha hahaze vene mwatela kuya nakulikonekela kuli ikiye. Lingilenunga vakwenu vyuma vize namusaka vamilingile nayenu.’

 Yesu ahuhumwine vatu valihende kukufwila chikuma luheto. Ambile ngwenyi: ‘Chapwa chachilemu kupwa sepa lyaYehova kuhambakana kufwila kupwa najimbongo jajivulu. Mwomwo mwiji nahase kwiva jimbongo jenu, oloze naumwe wauchi nahase kwiva usepa wenu naYehova. Kanda kulizakaminanga havyakulya navyakunwa, chipwe vyakuvwalako. Achitalenu tujila, Kalunga eji kuvazakamanga hakuvahana vyakulya. Kulizakamina kacheshi kumilingisa muyoye myaka yayivuluko. Yehova atachikiza vyuma mwasaka.’

Vatu vavavulu valikomokelele mwomwo kanda vachivwengaho lyehi mutu mwavanangula ngana mwaYesuko. Vatwamina javo vamukwitava kavanangwilenga vyuma kanako. Mwomwo ika Yesu apwilile mulongeshi wamunene? Mwomwo vyuma vyosena anangwilenga vyafumine kuli Yehova.