Yesu okilenga vaveji, nakusangula vafu, kaha nawa apwile nangolo jakuunjisa peho navula. Omu akumishile kulomba hapili, Yesu atalile haKalungalwiji waNgalileya, kaha amwene peho yanyamanganda. Halwola kana vaposetolo jenyi vapwile muwato nakupindasana napeho. Ngocho, Yesu ashikumukile hamavu nakuputuka kutambuka hameya nakuya kuze kwapwile wato. Omu vaposetolo jenyi vamwene mutu ali nakutambuka hameya vevwile woma chikuma. Oloze Yesu avalwezele ngwenyi: ‘Yami, kanda namwivwa womako.’

Jino Petulu ambile ngwenyi: ‘Ove Mwata, kachi nge yove vene, kaha ngulweze ngwizenga kuli ove hameya.’ Ngocho Yesu amulwezele ngwenyi: ‘Twaya kuno.’ Kufumaho, Petulu afumine muwato nakuputuka kutambuka hameya, oku peho yanyamanganda yinakuhuhwa. Oloze omu apwile nakupandama kwakamwihi naYesu Petulu atalile peho yanyamanganda, kaha evwile woma. Ngocho aputukile kulondomana mumeya. Petulu atambakanyine ngwenyi: ‘Ove Mwata, nguyovole!’ Yesu amukwachile kulivoko nakwamba ngwenyi: ‘Mwomwo ika wahuhwasanyinanga? Uno lufwelelo lwove luli kulihi?’

Kufumaho, Yesu naPetulu vengilile muwato, kaha hahaze vene yize peho yanyamanganda yakumine. Achishinganyeke omu vevwile vaposetolo! Vambile ngwavo: “Chikupu vene ove uMwanaKalunga.”

Elu keshi lukiko kaha lwola Yesu aunjishile pehoko. Lwola lukwavo nawa, omu Yesu navaposetolo jenyi vapwile nakuya musali yakalungalwiji, ikiye asavalile tulo muwato. Peho yanyamanganda yaputukile kuhuhwa, kaha makimba asakile kupazula wato, ngocho wato wosena wazalile nameya. Jino vaposetolo vahindwile Yesu nakumulweza ngwavo: ‘Ove Muka-kunangula, natufwa, tulwile!’ Kufumaho Yesu ahindukile, kaha ambile kukalungalwiji ngwenyi: “Hola kulu!” Hahaze vene, yize peho nakalwiji vyosena vyaunjile. Jino Yesu ahulishile vaposetolo jenyi ngwenyi: ‘Lufwelelo lwenu luli kulihi?’ Ngocho vambile mwavomwavo ngwavo: “Napeho nakalungalwiji vinononoka kuli ikiye.” Echi chalingishile vaposetolo jenyi vatachikize ngwavo, kavatelele kwivwa woma chuma numba chimweko, oloze vatelelele kufwelela Yesu namichima yavo yosena.